7. пат̣хамачхиггал̣айугасуттам̣

1117. ‘‘сеййатха̄пи, бхиккхаве, пурисо маха̄самудде екаччхиггал̣ам̣ йугам̣ паккхипеййа. татра̄писса ка̄н̣о каччхапо. со вассасатасса вассасатасса аччайена саким̣ саким̣ уммуджджеййа. там̣ ким̣ ман̃н̃атха, бхиккхаве, апи ну кхо ка̄н̣о каччхапо вассасатасса вассасатасса аччайена саким̣ саким̣ уммуджджанто амусмим̣ екаччхиггал̣е йуге гӣвам̣ павесеййа̄’’ти? ‘‘йади нӯна, бханте, када̄чи карахачи дӣгхасса аддхуно аччайена̄’’ти.

‘‘кхиппатарам̣ кхо со, бхиккхаве, ка̄н̣о каччхапо вассасатасса вассасатасса аччайена саким̣ саким̣ уммуджджанто амусмим̣ екаччхиггал̣е йуге гӣвам̣ павесеййа, на твева̄хам̣, бхиккхаве, саким̣ винипа̄тагатена ба̄лена [винӣтагатена бахулена (ка.)] мануссаттам̣ вада̄ми’’.

там̣ кисса хету? на хеттха, бхиккхаве, аттхи дхаммачарийа̄, самачарийа̄, кусалакирийа̄, пун̃н̃акирийа̄. ан̃н̃аман̃н̃акха̄дика̄ еттха, бхиккхаве, ваттати дуббалакха̄дика̄. там̣ кисса хету? адит̣т̣хатта̄, бхиккхаве, чатуннам̣ арийасачча̄нам̣. катамесам̣ чатуннам̣? дуккхасса арийасаччасса…пе… дуккханиродхага̄минийа̄ пат̣ипада̄йа арийасаччасса.

‘‘тасма̄тиха, бхиккхаве, ‘идам̣ дуккха’нти його каран̣ӣйо…пе… ‘айам̣ дуккханиродхага̄минӣ пат̣ипада̄’ти його каран̣ӣйо’’ти. саттамам̣.