5. саттисатасуттам̣

1105. ‘‘сеййатха̄пи, бхиккхаве, пурисо вассасата̄йуко вассасатаджӣвӣ. таменам̣ евам̣ вадеййа – ‘ехамбхо пуриса, пуббан̣хасамайам̣ там̣ саттисатена ханиссанти, маджджханхикасамайам̣ саттисатена ханиссанти, са̄йанхасамайам̣ саттисатена ханиссанти. со кхо твам̣, амбхо пуриса, дивасе дивасе тӣхи тӣхи саттисатехи хан̃н̃ама̄но вассасата̄йуко вассасатаджӣвӣ вассасатасса аччайена анабхисамета̄ни чатта̄ри арийасачча̄ни абхисамессасӣ’’’ти.

‘‘аттхавасикена, бхиккхаве, кулапуттена алам̣ упагантум̣. там̣ кисса хету? анаматаггойам̣, бхиккхаве, сам̣са̄ро; пубба̄ кот̣и наппан̃н̃а̄йати саттиппаха̄ра̄нам̣ асиппаха̄ра̄нам̣ усуппаха̄ра̄нам̣ пхарасуппаха̄ра̄нам̣ [асиппаха̄ра̄нам̣ пхарасуппаха̄ра̄нам̣ (ка.)]. еван̃четам̣, бхиккхаве, асса. на кхо пана̄хам̣, бхиккхаве, саха дуккхена, саха доманассена чатуннам̣ арийасачча̄нам̣ абхисамайам̣ вада̄ми; апи ча̄хам̣, бхиккхаве, саха̄ва сукхена, саха̄ва соманассена чатуннам̣ арийасачча̄нам̣ абхисамайам̣ вада̄ми. катамесам̣ чатуннам̣? дуккхасса арийасаччасса…пе… дуккханиродхага̄минийа̄ пат̣ипада̄йа арийасаччасса.

‘‘тасма̄тиха, бхиккхаве, ‘идам̣ дуккха’нти його каран̣ӣйо…пе… ‘айам̣ дуккханиродхага̄минӣ пат̣ипада̄’ти його каран̣ӣйо’’ти. пан̃чамам̣.