1. пат̣хамакот̣ига̄масуттам̣

1091. екам̣ самайам̣ бхагава̄ ваджджӣсу вихарати кот̣ига̄ме. татра кхо бхагава̄ бхиккхӯ а̄мантеси – ‘‘чатуннам̣, бхиккхаве, арийасачча̄нам̣ ананубодха̄ аппат̣иведха̄ евамидам̣ дӣгхамаддха̄нам̣ сандха̄витам̣ сам̣саритам̣ маман̃чева тумха̄кан̃ча’’.

‘‘катамесам̣ чатуннам̣? дуккхасса, бхиккхаве, арийасаччасса ананубодха̄ аппат̣иведха̄ евамидам̣ дӣгхамаддха̄нам̣ сандха̄витам̣ сам̣саритам̣ маман̃чева тумха̄кан̃ча. дуккхасамудайасса арийасаччасса…пе… дуккханиродхасса арийасаччасса…пе… дуккханиродхага̄минийа̄ пат̣ипада̄йа арийасаччасса ананубодха̄ аппат̣иведха̄ евамидам̣ дӣгхамаддха̄нам̣ сандха̄витам̣ сам̣саритам̣ маман̃чева тумха̄кан̃ча. тайидам̣, бхиккхаве, дуккхам̣ арийасаччам̣ анубуддхам̣ пат̣ивиддхам̣, дуккхасамудайам̣ арийасаччам̣ анубуддхам̣ пат̣ивиддхам̣, дуккханиродхам̣ арийасаччам̣ анубуддхам̣ пат̣ивиддхам̣, дуккханиродхага̄минӣ пат̣ипада̄ арийасаччам̣ анубуддхам̣ пат̣ивиддхам̣; уччхинна̄ бхаватан̣ха̄, кхӣн̣а̄ бхаванетти; наттхида̄ни пунаббхаво’’ти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘чатуннам̣ арийасачча̄нам̣, йатха̄бхӯтам̣ адассана̄;

сам̣ситам̣ [сам̣саритам̣ (сйа̄. кам̣. ка.) дӣ. ни. 2.155] дӣгхамаддха̄нам̣, та̄су та̄свева джа̄тису.

‘‘та̄ни [йа̄ни (сйа̄. кам̣. пӣ. ка.)] ета̄ни дит̣т̣ха̄ни, бхаванетти самӯхата̄;

уччхиннам̣ мӯлам̣ дуккхасса, наттхида̄ни пунаббхаво’’ти. пат̣хамам̣;