6. девасабха̄гасуттам̣

1032. ‘‘чатӯхи, бхиккхаве, дхаммехи саманна̄гатам̣ аттамана̄ дева̄ сабха̄гатам̣ катхенти. катамехи чатӯхи? идха, бхиккхаве, арийаса̄вако буддхе авеччаппаса̄дена саманна̄гато хоти – итипи со бхагава̄…пе… саттха̄ деваманусса̄нам̣ буддхо бхагава̄ти. йа̄ та̄ девата̄ буддхе авеччаппаса̄дена саманна̄гата̄ ито чута̄ татрӯпапанна̄ та̄сам̣ евам̣ хоти – ‘йатха̄рӯпена кхо майам̣ буддхе авеччаппаса̄дена саманна̄гата̄ тато чута̄ идхӯпапанна̄, арийаса̄вакопи татха̄рӯпена буддхе авеччаппаса̄дена саманна̄гато ехӣти дева̄нам̣ сантике’’’ти.

‘‘пуна чапарам̣, бхиккхаве, арийаса̄вако дхамме…пе… сан̇гхе…пе… арийакантехи сӣлехи саманна̄гато хоти акхан̣д̣ехи…пе… сама̄дхисам̣ваттаникехи. йа̄ та̄ девата̄ арийакантехи сӣлехи саманна̄гата̄ ито чута̄ татрӯпапанна̄ та̄сам̣ евам̣ хоти – ‘йатха̄рӯпехи кхо майам̣ арийакантехи сӣлехи саманна̄гата̄ тато чута̄ идхӯпапанна̄, арийаса̄вакопи татха̄рӯпехи арийакантехи сӣлехи саманна̄гато ехӣти дева̄нам̣ сантике’ти. имехи кхо, бхиккхаве, чатӯхи дхаммехи саманна̄гатам̣ аттамана̄ дева̄ сабха̄гатам̣ катхентӣ’’ти. чхат̣т̣хам̣.