9. дутийамегхасуттам̣

157. ‘‘сеййатха̄пи, бхиккхаве, уппаннам̣ маха̄мегхам̣, таменам̣ маха̄ва̄то антара̄йева антарадха̄пети вӯпасамети; евамева кхо, бхиккхаве, бхиккху арийам̣ ат̣т̣хан̇гикам̣ маггам̣ бха̄венто арийам̣ ат̣т̣хан̇гикам̣ маггам̣ бахулӣкаронто уппаннуппанне па̄паке акусале дхамме антара̄йева антарадха̄пети вӯпасамети. катхан̃ча, бхиккхаве, бхиккху арийам̣ ат̣т̣хан̇гикам̣ маггам̣ бха̄венто арийам̣ ат̣т̣хан̇гикам̣ маггам̣ бахулӣкаронто уппаннуппанне па̄паке акусале дхамме антара̄йева антарадха̄пети вӯпасамети? идха, бхиккхаве, бхиккху самма̄дит̣т̣хим̣ бха̄вети…пе… самма̄сама̄дхим̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣…пе… евам̣ кхо, бхиккхаве, бхиккху арийам̣ ат̣т̣хан̇гикам̣ маггам̣ бха̄венто арийам̣ ат̣т̣хан̇гикам̣ маггам̣ бахулӣкаронто уппаннуппанне па̄паке акусале дхамме антара̄йева антарадха̄пети вӯпасаметӣ’’ти. навамам̣.