12. ра̄сийасуттам̣

364. атха кхо ра̄сийо га̄ман̣и йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо ра̄сийо га̄ман̣и бхагавантам̣ етадавоча – ‘‘сутам̣ метам̣, бханте, ‘саман̣о готамо саббам̣ тапам̣ гарахати, саббам̣ тапассим̣ лӯкхаджӣвим̣ екам̣сена упавадати упаккосатӣ’ти [упаккосати упавадатӣти (дӣ. ни. 1.381)]. йе те, бханте, евама̄хам̣су – ‘саман̣о готамо саббам̣ тапам̣ гарахати, саббам̣ тапассим̣ лӯкхаджӣвим̣ екам̣сена упавадати упаккосатӣ’ти, каччи те, бханте, бхагавато вуттава̄дино, на ча бхагавантам̣ абхӯтена аббха̄чиккханти, дхаммасса ча̄нудхаммам̣ бйа̄каронти, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхатӣ’’ти? ‘‘йе те, га̄ман̣и, евама̄хам̣су – ‘саман̣о готамо саббам̣ тапам̣ гарахати, саббам̣ тапассим̣ лӯкхаджӣвим̣ екам̣сена упавадати упаккосатӣ’ти, на ме те вуттава̄дино, аббха̄чиккханти ча пана мам̣ те асата̄ туччха̄ абхӯтена’’.

‘‘двеме, га̄ман̣и, анта̄ паббаджитена на севитабба̄ – йо ча̄йам̣ ка̄месу ка̄масукхаллика̄нуйого хӣно гаммо потхуджджанико анарийо анаттхасам̣хито, йо ча̄йам̣ аттакиламатха̄нуйого дуккхо анарийо анаттхасам̣хито. ете те, га̄ман̣и, убхо анте анупагамма маджджхима̄ пат̣ипада̄ татха̄гатена абхисамбуддха̄ – чаккхукаран̣ӣ н̃а̄н̣акаран̣ӣ упасама̄йа абхин̃н̃а̄йа самбодха̄йа нибба̄на̄йа сам̣ваттати. катама̄ ча са̄, га̄ман̣и, маджджхима̄ пат̣ипада̄ татха̄гатена абхисамбуддха̄ – чаккхукаран̣ӣ н̃а̄н̣акаран̣ӣ упасама̄йа абхин̃н̃а̄йа самбодха̄йа нибба̄на̄йа сам̣ваттати? айамева арийо ат̣т̣хан̇гико магго, сеййатхидам̣ – самма̄дит̣т̣хи…пе… самма̄сама̄дхи. айам̣ кхо са̄, га̄ман̣и, маджджхима̄ пат̣ипада̄ татха̄гатена абхисамбуддха̄ – чаккхукаран̣ӣ н̃а̄н̣акаран̣ӣ упасама̄йа абхин̃н̃а̄йа самбодха̄йа нибба̄на̄йа сам̣ваттати.

‘‘тайо кхо ме, га̄ман̣и, ка̄мабхогино санто сам̣виджджама̄на̄ локасмим̣. катаме тайо? идха, га̄ман̣и, екаччо ка̄мабхогӣ адхаммена бхоге парийесати, са̄хасена адхаммена бхоге парийеситва̄ са̄хасена на атта̄нам̣ сукхети на пӣн̣ети на сам̣вибхаджати на пун̃н̃а̄ни кароти. идха пана, га̄ман̣и, екаччо ка̄мабхогӣ адхаммена бхоге парийесати са̄хасена. адхаммена бхоге парийеситва̄ са̄хасена атта̄нам̣ сукхети пӣн̣ети, на сам̣вибхаджати на пун̃н̃а̄ни кароти. идха пана, га̄ман̣и, екаччо ка̄мабхогӣ адхаммена бхоге парийесати са̄хасена. адхаммена бхоге парийеситва̄ са̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти.

‘‘идха пана, га̄ман̣и, екаччо ка̄мабхогӣ дхамма̄дхаммена бхоге парийесати са̄хасенапи аса̄хасенапи. дхамма̄дхаммена бхоге парийеситва̄ са̄хасенапи аса̄хасенапи на атта̄нам̣ сукхети, на пӣн̣ети, на сам̣вибхаджати, на пун̃н̃а̄ни кароти. идха пана, га̄ман̣и, екаччо ка̄мабхогӣ дхамма̄дхаммена бхоге парийесати са̄хасенапи аса̄хасенапи. дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети, на сам̣вибхаджати, на пун̃н̃а̄ни кароти. идха пана, га̄ман̣и, екаччо ка̄мабхогӣ дхамма̄дхаммена бхоге парийесати, са̄хасенапи аса̄хасенапи. дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети сам̣вибхаджати пун̃н̃а̄ни кароти.

‘‘идха пана, га̄ман̣и, екаччо ка̄мабхогӣ дхаммена бхоге парийесати аса̄хасена. дхаммена бхоге парийеситва̄ аса̄хасена на атта̄нам̣ сукхети, на пӣн̣ети, на сам̣вибхаджати, на пун̃н̃а̄ни кароти. идха пана, га̄ман̣и, екаччо ка̄мабхогӣ дхаммена бхоге парийесати аса̄хасена. дхаммена бхоге парийеситва̄ аса̄хасена атта̄нам̣ сукхети пӣн̣ети, на сам̣вибхаджати, на пун̃н̃а̄ни кароти. идха пана, га̄ман̣и, екаччо ка̄мабхогӣ дхаммена бхоге парийесати аса̄хасена. дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти. те ча бхоге гадхито [гатхито (сӣ.)] муччхито аджджхопанно ана̄дӣнавадасса̄вӣ аниссаран̣апан̃н̃о парибхун̃джати. идха пана, га̄ман̣и, екаччо ка̄мабхогӣ дхаммена бхоге парийесати аса̄хасена. дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти. те ча бхоге агадхито амуччхито анаджджхопанно а̄дӣнавадасса̄вӣ ниссаран̣апан̃н̃о парибхун̃джати.

‘‘татра, га̄ман̣и, йва̄йам̣ ка̄мабхогӣ адхаммена бхоге парийесати са̄хасена, адхаммена бхоге парийеситва̄ са̄хасена на атта̄нам̣ сукхети, на пӣн̣ети, на сам̣вибхаджати, на пун̃н̃а̄ни кароти. айам̣, га̄ман̣и, ка̄мабхогӣ тӣхи т̣ха̄нехи га̄райхо. катамехи тӣхи т̣ха̄нехи га̄райхо? адхаммена бхоге парийесати са̄хасена̄ти, имина̄ пат̣хамена т̣ха̄нена га̄райхо. на атта̄нам̣ сукхети на пӣн̣етӣти, имина̄ дутийена т̣ха̄нена га̄райхо. на сам̣вибхаджати, на пун̃н̃а̄ни каротӣти, имина̄ татийена т̣ха̄нена га̄райхо. айам̣, га̄ман̣и, ка̄мабхогӣ имехи тӣхи т̣ха̄нехи га̄райхо.

‘‘татра, га̄ман̣и, йва̄йам̣ ка̄мабхогӣ адхаммена бхоге парийесати са̄хасена, адхаммена бхоге парийеситва̄ са̄хасена атта̄нам̣ сукхети пӣн̣ети, на сам̣вибхаджати, на пун̃н̃а̄ни кароти. айам̣, га̄ман̣и, ка̄мабхогӣ двӣхи т̣ха̄нехи га̄райхо, екена т̣ха̄нена па̄сам̣со. катамехи двӣхи т̣ха̄нехи га̄райхо? адхаммена бхоге парийесати са̄хасена̄ти, имина̄ пат̣хамена т̣ха̄нена га̄райхо. на сам̣вибхаджати, на пун̃н̃а̄ни каротӣти, имина̄ дутийена т̣ха̄нена га̄райхо. катамена екена т̣ха̄нена па̄сам̣со? атта̄нам̣ сукхети пӣн̣етӣти, имина̄ екена т̣ха̄нена па̄сам̣со. айам̣, га̄ман̣и, ка̄мабхогӣ имехи двӣхи т̣ха̄нехи га̄райхо, имина̄ екена т̣ха̄нена па̄сам̣со.

‘‘татра, га̄ман̣и, йва̄йам̣ ка̄мабхогӣ адхаммена бхоге парийесати са̄хасена, адхаммена бхоге парийеситва̄ са̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти. айам̣, га̄ман̣и, ка̄мабхогӣ екена т̣ха̄нена га̄райхо, двӣхи т̣ха̄нехи па̄сам̣со. катамена екена т̣ха̄нена га̄райхо? адхаммена бхоге парийесати са̄хасена̄ти, имина̄ екена т̣ха̄нена га̄райхо. катамехи двӣхи т̣ха̄нехи па̄сам̣со? атта̄нам̣ сукхети пӣн̣етӣти, имина̄ пат̣хамена т̣ха̄нена па̄сам̣со. сам̣вибхаджати пун̃н̃а̄ни каротӣти, имина̄ дутийена т̣ха̄нена па̄сам̣со. айам̣, га̄ман̣и, ка̄мабхогӣ, имина̄ екена т̣ха̄нена га̄райхо, имехи двӣхи т̣ха̄нехи па̄сам̣со.

‘‘татра, га̄ман̣и, йва̄йам̣ ка̄мабхогӣ дхамма̄дхаммена бхоге парийесати са̄хасенапи аса̄хасенапи, дхамма̄дхаммена бхоге парийеситва̄ са̄хасенапи аса̄хасенапи на атта̄нам̣ сукхети, на пӣн̣ети, на сам̣вибхаджати, на пун̃н̃а̄ни кароти. айам̣, га̄ман̣и, ка̄мабхогӣ екена т̣ха̄нена па̄сам̣со, тӣхи т̣ха̄нехи га̄райхо. катамена екена т̣ха̄нена па̄сам̣со? дхаммена бхоге парийесати аса̄хасена̄ти, имина̄ екена т̣ха̄нена па̄сам̣со. катамехи тӣхи т̣ха̄нехи га̄райхо? адхаммена бхоге парийесати са̄хасена̄ти, имина̄ пат̣хамена т̣ха̄нена га̄райхо. на атта̄нам̣ сукхети, на пӣн̣етӣти, имина̄ дутийена т̣ха̄нена га̄райхо. на сам̣вибхаджати, на пун̃н̃а̄ни каротӣти, имина̄ татийена т̣ха̄нена га̄райхо. айам̣, га̄ман̣и, ка̄мабхогӣ имина̄ екена т̣ха̄нена па̄сам̣со, имехи тӣхи т̣ха̄нехи га̄райхо.

‘‘татра, га̄ман̣и, йва̄йам̣ ка̄мабхогӣ дхамма̄дхаммена бхоге парийесати са̄хасенапи аса̄хасенапи, дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети, на сам̣вибхаджати, на пун̃н̃а̄ни кароти. айам̣, га̄ман̣и, ка̄мабхогӣ двӣхи т̣ха̄нехи па̄сам̣со, двӣхи т̣ха̄нехи га̄райхо. катамехи двӣхи т̣ха̄нехи па̄сам̣со? дхаммена бхоге парийесати аса̄хасена̄ти, имина̄ пат̣хамена т̣ха̄нена па̄сам̣со. атта̄нам̣ сукхети пӣн̣етӣти, имина̄ дутийена т̣ха̄нена па̄сам̣со. катамехи двӣхи т̣ха̄нехи га̄райхо? адхаммена бхоге парийесати са̄хасена̄ти, имина̄ пат̣хамена т̣ха̄нена га̄райхо. на сам̣вибхаджати, на пун̃н̃а̄ни каротӣти, имина̄ дутийена т̣ха̄нена га̄райхо. айам̣, га̄ман̣и, ка̄мабхогӣ имехи двӣхи т̣ха̄нехи па̄сам̣со, имехи двӣхи т̣ха̄нехи га̄райхо.

‘‘татра, га̄ман̣и, йва̄йам̣ ка̄мабхогӣ дхамма̄дхаммена бхоге парийесати са̄хасенапи аса̄хасенапи, дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети сам̣вибхаджати пун̃н̃а̄ни кароти. айам̣, га̄ман̣и, ка̄мабхогӣ тӣхи т̣ха̄нехи па̄сам̣со, екена т̣ха̄нена га̄райхо. катамехи тӣхи т̣ха̄нехи па̄сам̣со? дхаммена бхоге парийесати аса̄хасена̄ти, имина̄ пат̣хамена т̣ха̄нена па̄сам̣со. атта̄нам̣ сукхети пӣн̣етӣти, имина̄ дутийена т̣ха̄нена па̄сам̣со. сам̣вибхаджати пун̃н̃а̄ни каротӣти, имина̄ татийена т̣ха̄нена па̄сам̣со. катамена екена т̣ха̄нена га̄райхо? адхаммена бхоге парийесати са̄хасена̄ти, имина̄ екена т̣ха̄нена га̄райхо. айам̣, га̄ман̣и, ка̄мабхогӣ имехи тӣхи т̣ха̄нехи па̄сам̣со, имина̄ екена т̣ха̄нена га̄райхо.

‘‘татра, га̄ман̣и, йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена, на атта̄нам̣ сукхети, на пӣн̣ети, на сам̣вибхаджати, на пун̃н̃а̄ни кароти. айам̣, га̄ман̣и, ка̄мабхогӣ екена т̣ха̄нена па̄сам̣со, двӣхи т̣ха̄нехи га̄райхо. катамена екена т̣ха̄нена па̄сам̣со? дхаммена бхоге парийесати аса̄хасена̄ти, имина̄ екена т̣ха̄нена па̄сам̣со. катамехи двӣхи т̣ха̄нехи га̄райхо? на атта̄нам̣ сукхети, на пӣн̣етӣти, имина̄ пат̣хамена т̣ха̄нена га̄райхо. на сам̣вибхаджати, на пун̃н̃а̄ни каротӣти, имина̄ дутийена т̣ха̄нена га̄райхо. айам̣, га̄ман̣и, ка̄мабхогӣ имина̄ екена т̣ха̄нена па̄сам̣со, имехи двӣхи т̣ха̄нехи га̄райхо.

‘‘татра, га̄ман̣и, йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети, на сам̣вибхаджати, на пун̃н̃а̄ни кароти. айам̣, га̄ман̣и, ка̄мабхогӣ двӣхи т̣ха̄нехи па̄сам̣со, екена т̣ха̄нена га̄райхо. катамехи двӣхи т̣ха̄нехи па̄сам̣со? дхаммена бхоге парийесати аса̄хасена̄ти, имина̄ пат̣хамена т̣ха̄нена па̄сам̣со. атта̄нам̣ сукхети пӣн̣етӣти, имина̄ дутийена т̣ха̄нена па̄сам̣со. катамена екена т̣ха̄нена га̄райхо? на сам̣вибхаджати, на пун̃н̃а̄ни каротӣти, имина̄ екена т̣ха̄нена га̄райхо. айам̣, га̄ман̣и, ка̄мабхогӣ имехи двӣхи т̣ха̄нехи па̄сам̣со, имина̄ екена т̣ха̄нена га̄райхо.

‘‘татра, га̄ман̣и, йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти, те ча бхоге гадхито муччхито аджджхопанно ана̄дӣнавадасса̄вӣ аниссаран̣апан̃н̃о парибхун̃джати. айам̣, га̄ман̣и, ка̄мабхогӣ тӣхи т̣ха̄нехи па̄сам̣со, екена т̣ха̄нена га̄райхо. катамехи тӣхи т̣ха̄нехи па̄сам̣со? дхаммена бхоге парийесати аса̄хасена̄ти, имина̄ пат̣хамена т̣ха̄нена па̄сам̣со. атта̄нам̣ сукхети пӣн̣етӣти, имина̄ дутийена т̣ха̄нена па̄сам̣со. сам̣вибхаджати пун̃н̃а̄ни каротӣти, имина̄ татийена т̣ха̄нена па̄сам̣со. катамена екена т̣ха̄нена га̄райхо? те ча бхоге гадхито муччхито аджджхопанно ана̄дӣнавадасса̄вӣ аниссаран̣апан̃н̃о парибхун̃джатӣти, имина̄ екена т̣ха̄нена га̄райхо. айам̣, га̄ман̣и, ка̄мабхогӣ имехи тӣхи т̣ха̄нехи па̄сам̣со, имина̄ екена т̣ха̄нена га̄райхо.

‘‘татра, га̄ман̣и, йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти. те ча бхоге агадхито амуччхито анаджджхопанно а̄дӣнавадасса̄вӣ ниссаран̣апан̃н̃о парибхун̃джати. айам̣, га̄ман̣и, ка̄мабхогӣ чатӯхи т̣ха̄нехи па̄сам̣со. катамехи чатӯхи т̣ха̄нехи па̄сам̣со? дхаммена бхоге парийесати аса̄хасена̄ти, имина̄ пат̣хамена т̣ха̄нена па̄сам̣со. атта̄нам̣ сукхети пӣн̣етӣти, имина̄ дутийена т̣ха̄нена па̄сам̣со. сам̣вибхаджати пун̃н̃а̄ни каротӣти, имина̄ татийена т̣ха̄нена па̄сам̣со. те ча бхоге агадхито амуччхито анаджджхопанно а̄дӣнавадасса̄вӣ ниссаран̣апан̃н̃о парибхун̃джатӣти, имина̄ чатуттхена т̣ха̄нена па̄сам̣со. айам̣, га̄ман̣и, ка̄мабхогӣ имехи чатӯхи т̣ха̄нехи па̄сам̣со.

‘‘тайоме, га̄ман̣и, тапассино лӯкхаджӣвино санто сам̣виджджама̄на̄ локасмим̣. катаме тайо? идха, га̄ман̣и, екаччо тапассӣ лӯкхаджӣвӣ саддха̄ ага̄расма̄ анага̄рийам̣ паббаджито хоти – ‘аппева на̄ма кусалам̣ дхаммам̣ адхигаччхеййам̣, аппева на̄ма уттаримануссадхамма̄ аламарийан̃а̄н̣адассанависесам̣ саччхикареййа’нти. со атта̄нам̣ а̄та̄пети парита̄пети, кусалан̃ча дхаммам̣ на̄дхигаччхати, уттари ча мануссадхамма̄ аламарийан̃а̄н̣адассанависесам̣ на саччхикароти.

‘‘идха пана, га̄ман̣и, екаччо тапассӣ лӯкхаджӣвӣ саддха̄ ага̄расма̄ анага̄рийам̣ паббаджито хоти – ‘аппева на̄ма кусалам̣ дхаммам̣ адхигаччхеййам̣, аппева на̄ма уттаримануссадхамма̄ аламарийан̃а̄н̣адассанависесам̣ саччхикареййа’нти. со атта̄нам̣ а̄та̄пети парита̄пети, кусалан̃хи кхо дхаммам̣ адхигаччхати, уттаримануссадхамма̄ аламарийан̃а̄н̣адассанависесам̣ на саччхикароти.

‘‘идха пана, га̄ман̣и, екаччо тапассӣ лӯкхаджӣвӣ саддха̄ ага̄расма̄ анага̄рийам̣ паббаджито хоти – ‘аппева на̄ма кусалам̣ дхаммам̣ адхигаччхеййам̣, аппева на̄ма уттаримануссадхамма̄ аламарийан̃а̄н̣адассанависесам̣ саччхикареййа’нти. со атта̄нам̣ а̄та̄пети парита̄пети, кусалан̃ча дхаммам̣ адхигаччхати, уттари ча мануссадхамма̄ аламарийан̃а̄н̣адассанависесам̣ саччхикароти.

‘‘татра, га̄ман̣и, йва̄йам̣ тапассӣ лӯкхаджӣвӣ атта̄нам̣ а̄та̄пети парита̄пети, кусалан̃ча дхаммам̣ на̄дхигаччхати, уттари ча мануссадхамма̄ аламарийан̃а̄н̣адассанависесам̣ на саччхикароти. айам̣, га̄ман̣и, тапассӣ лӯкхаджӣвӣ тӣхи т̣ха̄нехи га̄райхо. катамехи тӣхи т̣ха̄нехи га̄райхо? атта̄нам̣ а̄та̄пети парита̄петӣти, имина̄ пат̣хамена т̣ха̄нена га̄райхо. кусалан̃ча дхаммам̣ на̄дхигаччхатӣти, имина̄ дутийена т̣ха̄нена га̄райхо. уттари ча мануссадхамма̄ аламарийан̃а̄н̣адассанависесам̣ на саччхикаротӣти, имина̄ татийена т̣ха̄нена га̄райхо. айам̣, га̄ман̣и, тапассӣ лӯкхаджӣвӣ, имехи тӣхи т̣ха̄нехи га̄райхо.

‘‘татра, га̄ман̣и, йва̄йам̣ тапассӣ лӯкхаджӣвӣ атта̄нам̣ а̄та̄пети парита̄пети, кусалан̃хи кхо дхаммам̣ адхигаччхати, уттари ча мануссадхамма̄ аламарийан̃а̄н̣адассанависесам̣ на саччхикароти. айам̣, га̄ман̣и, тапассӣ лӯкхаджӣвӣ двӣхи т̣ха̄нехи га̄райхо, екена т̣ха̄нена па̄сам̣со. катамехи двӣхи т̣ха̄нехи га̄райхо? атта̄нам̣ а̄та̄пети парита̄петӣти, имина̄ пат̣хамена т̣ха̄нена га̄райхо. уттари ча мануссадхамма̄ аламарийан̃а̄н̣адассанависесам̣ на саччхикаротӣти, имина̄ дутийена т̣ха̄нена га̄райхо. катамена екена т̣ха̄нена па̄сам̣со? кусалан̃хи кхо дхаммам̣ адхигаччхатӣти, имина̄ екена т̣ха̄нена па̄сам̣со. айам̣, га̄ман̣и, тапассӣ лӯкхаджӣвӣ имехи двӣхи т̣ха̄нехи га̄райхо, имина̄ екена т̣ха̄нена па̄сам̣со.

‘‘татра, га̄ман̣и, йва̄йам̣ тапассӣ лӯкхаджӣвӣ атта̄нам̣ а̄та̄пети парита̄пети, кусалан̃ча дхаммам̣ адхигаччхати, уттари ча мануссадхамма̄ аламарийан̃а̄н̣адассанависесам̣ саччхикароти. айам̣, га̄ман̣и, тапассӣ лӯкхаджӣвӣ екена т̣ха̄нена га̄райхо, двӣхи т̣ха̄нехи па̄сам̣со. катамена екена т̣ха̄нена га̄райхо? атта̄нам̣ а̄та̄пети парита̄петӣти, имина̄ екена т̣ха̄нена га̄райхо. катамехи двӣхи т̣ха̄нехи па̄сам̣со? кусалан̃ча дхаммам̣ адхигаччхатӣти, имина̄ пат̣хамена т̣ха̄нена па̄сам̣со. уттари ча мануссадхамма̄ аламарийан̃а̄н̣адассанависесам̣ саччхикаротӣти, имина̄ дутийена т̣ха̄нена па̄сам̣со. айам̣, га̄ман̣и, тапассӣ лӯкхаджӣвӣ имина̄ екена т̣ха̄нена га̄райхо, имехи двӣхи т̣ха̄нехи па̄сам̣со.

‘‘тиссо има̄, га̄ман̣и, сандит̣т̣хика̄ ниджджара̄ ака̄лика̄ ехипассика̄ опанеййика̄ паччаттам̣ ведитабба̄ вин̃н̃ӯхи. катама̄ тиссо? йам̣ ратто ра̄га̄дхикаран̣ам̣ аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети. ра̄ге пахӣне неваттабйа̄ба̄дха̄йа четети, на парабйа̄ба̄дха̄йа четети, на убхайабйа̄ба̄дха̄йа четети. сандит̣т̣хика̄ ниджджара̄ ака̄лика̄ ехипассика̄ опанеййика̄ паччаттам̣ ведитабба̄ вин̃н̃ӯхи. йам̣ дут̣т̣хо доса̄дхикаран̣ам̣ аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети. досе пахӣне неваттабйа̄ба̄дха̄йа четети, на парабйа̄ба̄дха̄йа четети, на убхайабйа̄ба̄дха̄йа четети. сандит̣т̣хика̄ ниджджара̄ ака̄лика̄ ехипассика̄ опанеййика̄ паччаттам̣ ведитабба̄ вин̃н̃ӯхи. йам̣ мӯл̣хо моха̄дхикаран̣ам̣ аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети. мохе пахӣне неваттабйа̄ба̄дха̄йа четети, на парабйа̄ба̄дха̄йа четети, на убхайабйа̄ба̄дха̄йа четети. сандит̣т̣хика̄ ниджджара̄ ака̄лика̄ ехипассика̄ опанеййика̄ паччаттам̣ ведитабба̄ вин̃н̃ӯхи. има̄ кхо, га̄ман̣и, тиссо сандит̣т̣хика̄ ниджджара̄ ака̄лика̄ ехипассика̄ опанеййика̄ паччаттам̣ ведитабба̄ вин̃н̃ӯхӣ’’ти.

евам̣ вутте, ра̄сийо га̄ман̣и бхагавантам̣ етадавоча – ‘‘абхиккантам̣, бханте…пе… упа̄сакам̣ мам̣ бхагава̄ дха̄рету аджджатагге па̄н̣упетам̣ саран̣ам̣ гата’’нти. два̄дасамам̣.