10. ман̣ичӯл̣акасуттам̣

362. екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена ра̄джантепуре ра̄джапариса̄йа саннисинна̄нам̣ саннипатита̄нам̣ айамантара̄катха̄ удапа̄ди – ‘‘каппати саман̣а̄нам̣ сакйапуттийа̄нам̣ джа̄тарӯпараджатам̣, са̄дийанти саман̣а̄ сакйапуттийа̄ джа̄тарӯпараджатам̣, пат̣игган̣ханти саман̣а̄ сакйапуттийа̄ джа̄тарӯпараджата’’нти!

тена кхо пана самайена ман̣ичӯл̣ако га̄ман̣и тассам̣ париса̄йам̣ нисинно хоти. атха кхо ман̣ичӯл̣ако га̄ман̣и там̣ парисам̣ етадавоча – ‘‘ма̄ аййо [аййа̄ (сӣ. пӣ.)] евам̣ авачуттха. на каппати саман̣а̄нам̣ сакйапуттийа̄нам̣ джа̄тарӯпараджатам̣, на са̄дийанти саман̣а̄ сакйапуттийа̄ джа̄тарӯпараджатам̣, наппат̣игган̣ханти саман̣а̄ сакйапуттийа̄ джа̄тарӯпараджатам̣, никкхиттаман̣исуван̣н̣а̄ саман̣а̄ сакйапуттийа̄ апетаджа̄тарӯпараджата̄’’ти. асаккхи кхо ман̣ичӯл̣ако га̄ман̣и там̣ парисам̣ сан̃н̃а̄петум̣. атха кхо ман̣ичӯл̣ако га̄ман̣и йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо ман̣ичӯл̣ако га̄ман̣и бхагавантам̣ етадавоча – ‘‘идха, бханте, ра̄джантепуре ра̄джапариса̄йа саннисинна̄нам̣ саннипатита̄нам̣ айамантара̄катха̄ удапа̄ди – ‘каппати саман̣а̄нам̣ сакйапуттийа̄нам̣ джа̄тарӯпараджатам̣, са̄дийанти саман̣а̄ сакйапуттийа̄ джа̄тарӯпараджатам̣, пат̣игган̣ханти саман̣а̄ сакйапуттийа̄ джа̄тарӯпараджата’нти. евам̣ вутте, ахам̣, бханте, там̣ парисам̣ етадавочам̣ – ‘ма̄ аййо евам̣ авачуттха. на каппати саман̣а̄нам̣ сакйапуттийа̄нам̣ джа̄тарӯпараджатам̣, на са̄дийанти саман̣а̄ сакйапуттийа̄ джа̄тарӯпараджатам̣, наппат̣игган̣ханти саман̣а̄ сакйапуттийа̄ джа̄тарӯпараджатам̣, никкхиттаман̣исуван̣н̣а̄ саман̣а̄ сакйапуттийа̄ апетаджа̄тарӯпараджата̄’ти. асаккхим̣ кхва̄хам̣, бханте, там̣ парисам̣ сан̃н̃а̄петум̣. качча̄хам̣, бханте, евам̣ бйа̄карама̄но вуттава̄дӣ чева бхагавато хоми, на ча бхагавантам̣ абхӯтена аббха̄чиккха̄ми, дхаммасса ча̄нудхаммам̣ бйа̄кароми, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхатӣ’’ти?

‘‘таггха твам̣, га̄ман̣и, евам̣ бйа̄карама̄но вуттава̄дӣ чева ме хоси, на ча мам̣ абхӯтена аббха̄чиккхаси, дхаммасса ча̄нудхаммам̣ бйа̄кароси, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхати. на хи, га̄ман̣и, каппати саман̣а̄нам̣ сакйапуттийа̄нам̣ джа̄тарӯпараджатам̣, на са̄дийанти саман̣а̄ сакйапуттийа̄ джа̄тарӯпараджатам̣, наппат̣игган̣ханти саман̣а̄ сакйапуттийа̄ джа̄тарӯпараджатам̣, никкхиттаман̣исуван̣н̣а̄ саман̣а̄ сакйапуттийа̄ апетаджа̄тарӯпараджата̄. йасса кхо, га̄ман̣и, джа̄тарӯпараджатам̣ каппати, пан̃чапи тасса ка̄магун̣а̄ каппанти. йасса пан̃ча ка̄магун̣а̄ каппанти ( ) [(тассапи джа̄тарӯпараджатам̣ каппати,) (сйа̄. кам̣.)], екам̣сенетам̣, га̄ман̣и, дха̄реййа̄си ассаман̣адхаммо асакйапуттийадхаммоти. апи ча̄хам̣, га̄ман̣и, евам̣ вада̄ми – тин̣ам̣ тин̣аттхикена парийеситаббам̣, да̄ру да̄руттхикена парийеситаббам̣, сакат̣ам̣ сакат̣аттхикена парийеситаббам̣, пурисо пурисаттхикена парийеситаббо [парийеситаббо’’ти (?)]. натвева̄хам̣, га̄ман̣и, кеначи парийа̄йена ‘джа̄тарӯпараджатам̣ са̄дитаббам̣ парийеситабба’нти вада̄мӣ’’ти. дасамам̣.