1. чан̣д̣асуттам̣

353. са̄ваттхинида̄нам̣. атха кхо чан̣д̣о га̄ман̣и йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо чан̣д̣о га̄ман̣и бхагавантам̣ етадавоча – ‘‘ко ну кхо, бханте, хету, ко паччайо йена мидхекаччо чан̣д̣о чан̣д̣отвева [йена мидхекаччо чан̣д̣отева (сӣ. пӣ.)] сан̇кхам̣ гаччхати. ко пана, бханте, хету, ко паччайо йена мидхекаччо сорато соратотвева [йена мидхекаччо суратотева (сӣ. пӣ.)] сан̇кхам̣ гаччхатӣ’’ти? ‘‘идха, га̄ман̣и, екаччасса ра̄го аппахӣно хоти. ра̄гасса аппахӣнатта̄ паре копенти, парехи копийама̄но копам̣ па̄тукароти. со чан̣д̣отвева сан̇кхам̣ гаччхати. досо аппахӣно хоти. досасса аппахӣнатта̄ паре копенти, парехи копийама̄но копам̣ па̄тукароти. со чан̣д̣отвева сан̇кхам̣ гаччхати. мохо аппахӣно хоти. мохасса аппахӣнатта̄ паре копенти, парехи копийама̄но копам̣ па̄тукароти. со чан̣д̣отвева сан̇кхам̣ гаччхати. айам̣ кхо, га̄ман̣и, хету, айам̣ паччайо йена мидхекаччо чан̣д̣о чан̣д̣отвева сан̇кхам̣ гаччхати’’.

‘‘идха пана, га̄ман̣и, екаччасса ра̄го пахӣно хоти. ра̄гасса пахӣнатта̄ паре на копенти, парехи копийама̄но копам̣ на па̄тукароти. со соратотвева сан̇кхам̣ гаччхати. досо пахӣно хоти. досасса пахӣнатта̄ паре на копенти, парехи копийама̄но копам̣ на па̄тукароти. со соратотвева сан̇кхам̣ гаччхати. мохо пахӣно хоти. мохасса пахӣнатта̄ паре на копенти, парехи копийама̄но копам̣ на па̄тукароти. со соратотвева сан̇кхам̣ гаччхати. айам̣ кхо, га̄ман̣и, хету айам̣ паччайо йена мидхекаччо сорато соратотвева сан̇кхам̣ гаччхатӣ’’ти.

евам̣ вутте, чан̣д̣о га̄ман̣и бхагавантам̣ етадавоча – ‘‘абхиккантам̣, бханте, абхиккантам̣, бханте! сеййатха̄пи, бханте, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – чаккхуманто рӯпа̄ни даккхантӣти; евамевам̣ бхагавата̄ анекапарийа̄йена дхаммо пака̄сито. еса̄хам̣, бханте, бхагавантам̣ саран̣ам̣ гаччха̄ми дхамман̃ча бхиккхусан̇гхан̃ча. упа̄сакам̣ мам̣ бхагава̄ дха̄рету аджджатагге па̄н̣упетам̣ саран̣ам̣ гата’’нти. пат̣хамам̣.