6. салласуттам̣

254. ‘‘ассутава̄, бхиккхаве, путхуджджано сукхампи веданам̣ ведайати [ведийати (сӣ. пӣ.)], дуккхампи веданам̣ ведайати, адуккхамасукхампи веданам̣ ведайати. сутава̄, бхиккхаве, арийаса̄вако сукхампи веданам̣ ведайати, дуккхампи веданам̣ ведайати, адуккхамасукхампи веданам̣ ведайати. татра, бхиккхаве, ко висесо ко адхиппайа̄со [адхиппа̄йо (сӣ. ка.), адхиппа̄йасо (сйа̄. кам̣.), адхиппа̄йосо (пӣ.)] ким̣ на̄на̄каран̣ам̣ сутавато арийаса̄вакасса ассутавата̄ путхуджджанена̄’’ти? бхагавам̣мӯлака̄ но, бханте, дхамма̄…пе… ассутава̄. бхиккхаве, путхуджджано дуккха̄йа ведана̄йа пхут̣т̣хо сама̄но сочати киламати паридевати уратта̄л̣им̣ кандати саммохам̣ а̄паджджати. со две ведана̄ ведайати – ка̄йикан̃ча, четасикан̃ча. сеййатха̄пи, бхиккхаве, пурисам̣ саллена виджджхеййа [саллена анувиджджхеййум̣ (сӣ. сйа̄. кам̣. пӣ.)]. таменам̣ дутийена саллена ануведхам̣ виджджхеййа [саллена анувиджджхеййум̣ (сӣ.), саллена ануведхам̣ виджджхеййум̣ (сйа̄. кам̣.), саллена виджджхеййум̣ (пӣ.)]. еван̃хи со, бхиккхаве, пурисо двисаллена веданам̣ ведайати. евамева кхо, бхиккхаве, ассутава̄ путхуджджано дуккха̄йа ведана̄йа пхут̣т̣хо сама̄но сочати киламати паридевати уратта̄л̣им̣ кандати саммохам̣ а̄паджджати. со две ведана̄ ведайати – ка̄йикан̃ча, четасикан̃ча. тасса̄йева кхо пана дуккха̄йа ведана̄йа пхут̣т̣хо сама̄но пат̣игхава̄ хоти. таменам̣ дуккха̄йа ведана̄йа пат̣игхавантам̣, йо дуккха̄йа ведана̄йа пат̣игха̄нусайо, со анусети. со дуккха̄йа ведана̄йа пхут̣т̣хо сама̄но ка̄масукхам̣ абхинандати. там̣ кисса хету? на хи со, бхиккхаве, паджа̄на̄ти ассутава̄ путхуджджано ан̃н̃атра ка̄масукха̄ дуккха̄йа ведана̄йа ниссаран̣ам̣, тасса ка̄масукхан̃ча абхинандато, йо сукха̄йа ведана̄йа ра̄га̄нусайо, со анусети. со та̄сам̣ ведана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ наппаджа̄на̄ти. тасса та̄сам̣ ведана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ аппаджа̄нато, йо адуккхамасукха̄йа ведана̄йа авиджджа̄нусайо, со анусети. со сукхан̃че веданам̣ ведайати, сан̃н̃утто нам̣ ведайати. дуккхан̃че веданам̣ ведайати, сан̃н̃утто нам̣ ведайати. адуккхамасукхан̃че веданам̣ ведайати, сан̃н̃утто нам̣ ведайати. айам̣ вуччати, бхиккхаве, ‘ассутава̄ путхуджджано сан̃н̃утто джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, сан̃н̃утто дуккхасма̄’ти вада̄ми.

‘‘сутава̄ ча кхо, бхиккхаве, арийаса̄вако дуккха̄йа ведана̄йа пхут̣т̣хо сама̄но на сочати, на киламати, на паридевати, на уратта̄л̣им̣ кандати, на саммохам̣ а̄паджджати. со екам̣ веданам̣ ведайати – ка̄йикам̣, на четасикам̣.

‘‘сеййатха̄пи, бхиккхаве, пурисам̣ саллена виджджхеййа. таменам̣ дутийена саллена ануведхам̣ на виджджхеййа. еван̃хи со, бхиккхаве, пурисо екасаллена веданам̣ ведайати. евамева кхо, бхиккхаве, сутава̄ арийаса̄вако дуккха̄йа ведана̄йа пхут̣т̣хо сама̄но на сочати, на киламати, на паридевати, на уратта̄л̣им̣ кандати, на саммохам̣ а̄паджджати. со екам̣ веданам̣ ведайати – ка̄йикам̣, на четасикам̣. тасса̄йева кхо пана дуккха̄йа ведана̄йа пхут̣т̣хо сама̄но пат̣игхава̄ на хоти. таменам̣ дуккха̄йа ведана̄йа аппат̣игхавантам̣, йо дуккха̄йа ведана̄йа пат̣игха̄нусайо, со на̄нусети. со дуккха̄йа ведана̄йа пхут̣т̣хо сама̄но ка̄масукхам̣ на̄бхинандати. там̣ кисса хету? паджа̄на̄ти хи со, бхиккхаве, сутава̄ арийаса̄вако ан̃н̃атра ка̄масукха̄ дуккха̄йа ведана̄йа ниссаран̣ам̣. тасса ка̄масукхам̣ на̄бхинандато йо сукха̄йа ведана̄йа ра̄га̄нусайо, со на̄нусети. со та̄сам̣ ведана̄нам̣ самудайан̃ча аттхан̇гаман̃ча асса̄дан̃ча а̄дӣнавам̣ ча ниссаран̣ан̃ча йатха̄бхӯтам̣ паджа̄на̄ти. тасса та̄сам̣ ведана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ паджа̄нато, йо адуккхамасукха̄йа ведана̄йа авиджджа̄нусайо, со на̄нусети. со сукхан̃че веданам̣ ведайати, висан̃н̃утто нам̣ ведайати. дуккхан̃че веданам̣ ведайати, висан̃н̃утто нам̣ ведайати. адуккхамасукхан̃че веданам̣ ведайати, висан̃н̃утто нам̣ ведайати. айам̣ вуччати, бхиккхаве, ‘сутава̄ арийаса̄вако висан̃н̃утто джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, висан̃н̃утто дуккхасма̄’ти вада̄ми. айам̣ кхо, бхиккхаве, висесо, айам̣ адхиппайа̄со, идам̣ на̄на̄каран̣ам̣ сутавато арийаса̄вакасса ассутавата̄ путхуджджанена̄’’ти.

‘‘на веданам̣ ведайати сапан̃н̃о,

сукхампи дуккхампи бахуссутопи;

айан̃ча дхӣрасса путхуджджанена,

маха̄ [айам̣ (сйа̄. кам̣. ка.)] висесо кусаласса хоти.

‘‘сан̇кха̄тадхаммасса бахуссутасса,

випассато [сампассато (сӣ. пӣ.)] локамимам̣ паран̃ча;

ит̣т̣хасса дхамма̄ на матхенти читтам̣,

анит̣т̣хато но пат̣игха̄тамети.

‘‘тасса̄нуродха̄ атхава̄ виродха̄,

видхӯпита̄ аттхагата̄ на санти;

падан̃ча н̃атва̄ вираджам̣ асокам̣,

самма̄ паджа̄на̄ти бхавасса па̄рагӯ’’ти. чхат̣т̣хам̣;