7. моггалла̄насуттам̣

416. атха кхо ваччхаготто парибба̄джако йена̄йасма̄ маха̄моггалла̄но тенупасан̇ками; упасан̇камитва̄ а̄йасмата̄ маха̄моггалла̄нена саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо ваччхаготто парибба̄джако а̄йасмантам̣ маха̄моггалла̄нам̣ етадавоча –

‘‘ким̣ ну кхо, бхо моггалла̄на, сассато локо’’ти? ‘‘абйа̄катам̣ кхо етам̣, ваччха, бхагавата̄ – ‘сассато локо’’’ти. ‘‘ким̣ пана, бхо моггалла̄на, асассато локо’’ти? ‘‘етампи кхо, ваччха, абйа̄катам̣ бхагавата̄ – ‘асассато локо’’’ти. ‘‘ким̣ ну кхо, бхо моггалла̄на, антава̄ локо’’ти? ‘‘абйа̄катам̣ кхо етам̣, ваччха, бхагавата̄ – ‘антава̄ локо’’’ти. ‘‘ким̣ пана, бхо моггалла̄на, анантава̄ локо’’ти? ‘‘етампи кхо, ваччха, абйа̄катам̣ бхагавата̄ – ‘анантава̄ локо’’’ти. ‘‘ким̣ ну кхо, бхо моггалла̄на, там̣ джӣвам̣ там̣ сарӣра’’нти? ‘‘абйа̄катам̣ кхо етам̣, ваччха, бхагавата̄ – ‘там̣ джӣвам̣ там̣ сарӣра’’’нти. ‘‘ким̣ пана, бхо моггалла̄на, ан̃н̃ам̣ джӣвам̣ ан̃н̃ам̣ сарӣра’’нти? ‘‘етампи кхо, ваччха, абйа̄катам̣ бхагавата̄ – ‘ан̃н̃ам̣ джӣвам̣ ан̃н̃ам̣ сарӣра’’’нти. ‘‘ким̣ ну кхо, бхо моггалла̄на, хоти татха̄гато парам̣ маран̣а̄’’ти? ‘‘абйа̄катам̣ кхо етам̣, ваччха, бхагавата̄ – ‘хоти татха̄гато парам̣ маран̣а̄’’’ти. ‘‘ким̣ пана, бхо моггалла̄на, на хоти татха̄гато парам̣ маран̣а̄’’ти? ‘‘етампи кхо, ваччха, абйа̄катам̣ бхагавата̄ – ‘на хоти татха̄гато парам̣ маран̣а̄’’’ти. ‘‘ким̣ ну кхо, бхо моггалла̄на, хоти ча на ча хоти татха̄гато парам̣ маран̣а̄’’ти? ‘‘абйа̄катам̣ кхо етам̣, ваччха, бхагавата̄ – ‘хоти ча на ча хоти татха̄гато парам̣ маран̣а̄’’’ти. ‘‘ким̣ пана, бхо моггалла̄на, нева хоти на на хоти татха̄гато парам̣ маран̣а̄’’ти? ‘‘етампи кхо, ваччха, абйа̄катам̣ бхагавата̄ – ‘нева хоти на на хоти татха̄гато парам̣ маран̣а̄’’’ти.

‘‘ко ну кхо, бхо моггалла̄на, хету ко паччайо, йена ан̃н̃атиттхийа̄нам̣ парибба̄джака̄нам̣ евам̣ пут̣т̣ха̄нам̣ евам̣ веййа̄каран̣ам̣ хоти – сассато локоти ва̄, асассато локоти ва̄, антава̄ локоти ва̄, анантава̄ локоти ва̄, там̣ джӣвам̣ там̣ сарӣранти ва̄, ан̃н̃ам̣ джӣвам̣ ан̃н̃ам̣ сарӣранти ва̄, хоти татха̄гато парам̣ маран̣а̄ти ва̄, на хоти татха̄гато парам̣ маран̣а̄ти ва̄, хоти ча на ча хоти татха̄гато парам̣ маран̣а̄ти ва̄, нева хоти на на хоти татха̄гато парам̣ маран̣а̄ти ва̄? ко пана, бхо моггалла̄на, хету ко паччайо, йена саман̣асса готамасса евам̣ пут̣т̣хасса на евам̣ веййа̄каран̣ам̣ хоти – сассато локотипи, асассато локотипи, антава̄ локотипи, анантава̄ локотипи, там̣ джӣвам̣ там̣ сарӣрантипи, ан̃н̃ам̣ джӣвам̣ ан̃н̃ам̣ сарӣрантипи, хоти татха̄гато парам̣ маран̣а̄типи, на хоти татха̄гато парам̣ маран̣а̄типи, хоти ча на ча хоти татха̄гато парам̣ маран̣а̄типи, нева хоти на на хоти татха̄гато парам̣ маран̣а̄типӣ’’ти?

‘‘ан̃н̃атиттхийа̄ кхо, ваччха, парибба̄джака̄ чаккхум̣ ‘етам̣ мама, есохамасми, есо ме атта̄’ти саманупассанти…пе… дживхам̣ ‘етам̣ мама, есохамасми, есо ме атта̄’ти саманупассанти…пе… манам̣ ‘етам̣ мама, есохамасми, есо ме атта̄’ти саманупассанти. тасма̄ ан̃н̃атиттхийа̄нам̣ парибба̄джака̄нам̣ евам̣ пут̣т̣ха̄нам̣ евам̣ веййа̄каран̣ам̣ хоти – сассато локоти ва̄…пе… нева хоти на на хоти татха̄гато парам̣ маран̣а̄ти ва̄. татха̄гато ча кхо, ваччха, арахам̣ самма̄самбуддхо чаккхум̣ ‘нетам̣ мама, несохамасми, на месо атта̄’ти саманупассати…пе… дживхам̣ ‘нетам̣ мама, несохамасми, на месо атта̄’ти саманупассати…пе… манам̣ ‘нетам̣ мама, несохамасми, на месо атта̄’ти саманупассати. тасма̄ татха̄гатасса евам̣ пут̣т̣хасса на евам̣ веййа̄каран̣ам̣ хоти – сассато локотипи…пе… нева хоти на на хоти татха̄гато парам̣ маран̣а̄типӣ’’ти.

атха кхо ваччхаготто парибба̄джако ут̣т̣ха̄йа̄сана̄ йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо ваччхаготто парибба̄джако бхагавантам̣ етадавоча – ‘‘ким̣ ну кхо, бхо готама, сассато локо’’ти? абйа̄катам̣ кхо етам̣, ваччха, майа̄ – ‘сассато локо’ти…пе…. ‘‘ким̣ пана, бхо готама, нева хоти на на хоти татха̄гато парам̣ маран̣а̄’’ти? ‘‘етампи кхо, ваччха, абйа̄катам̣ майа̄ – ‘нева хоти на на хоти татха̄гато парам̣ маран̣а̄’’’ти.

‘‘ко ну кхо, бхо готама, хету ко паччайо, йена ан̃н̃атиттхийа̄нам̣ парибба̄джака̄нам̣ евам̣ пут̣т̣ха̄нам̣ евам̣ веййа̄каран̣ам̣ хоти – ‘сассато локо’ти ва̄…пе… ‘нева хоти на на хоти татха̄гато парам̣ маран̣а̄’ти ва̄? ко пана, бхо готама, хету ко паччайо, йена бхото готамасса евам̣ пут̣т̣хасса на евам̣ веййа̄каран̣ам̣ хоти – ‘сассато локо’типи…пе… ‘нева хоти на на хоти татха̄гато парам̣ маран̣а̄’типӣ’’ти?

‘‘ан̃н̃атиттхийа̄ кхо, ваччха, парибба̄джака̄ чаккхум̣ ‘етам̣ мама, есохамасми, есо ме атта̄’ти саманупассанти…пе… дживхам̣ ‘етам̣ мама, есохамасми, есо ме атта̄’ти саманупассанти…пе… манам̣ ‘етам̣ мама, есохамасми, есо ме атта̄’ти саманупассанти. тасма̄ ан̃н̃атиттхийа̄нам̣ парибба̄джака̄нам̣ евам̣ пут̣т̣ха̄нам̣ евам̣ веййа̄каран̣ам̣ хоти – ‘сассато локо’ти ва̄…пе… ‘нева хоти на на хоти татха̄гато парам̣ маран̣а̄’ти ва̄. татха̄гато ча кхо, ваччха, арахам̣ самма̄самбуддхо чаккхум̣ ‘нетам̣ мама, несохамасми, на месо атта̄’ти саманупассати…пе… дживхам̣ ‘нетам̣ мама, несохамасми, на месо атта̄’ти саманупассати…пе… манам̣ ‘нетам̣ мама, несохамасми, на месо атта̄’ти саманупассати. тасма̄ татха̄гатасса евам̣ пут̣т̣хасса на евам̣ веййа̄каран̣ам̣ хоти – ‘сассато локо’типи, ‘асассато локо’типи, ‘антава̄ локо’типи, ‘анантава̄ локо’типи, ‘там̣ джӣвам̣ там̣ сарӣра’нтипи, ‘ан̃н̃ам̣ джӣвам̣ ан̃н̃ам̣ сарӣра’нтипи, ‘хоти татха̄гато парам̣ маран̣а̄’типи, ‘на хоти татха̄гато парам̣ маран̣а̄’типи, ‘хоти ча на ча хоти татха̄гато парам̣ маран̣а̄’типи, ‘нева хоти на на хоти татха̄гато парам̣ маран̣а̄’типӣ’’ти.

‘‘аччхарийам̣, бхо готама, аббхутам̣, бхо готама! йатра хи на̄ма саттху ча [саттхусса ча (сӣ. пӣ.), саттху чева (кхема̄сутте)] са̄вакасса ча аттхена аттхо бйан̃джанена бйан̃джанам̣ сам̣сандиссати самессати на виродхайиссати, йадидам̣ аггападасмим̣. ида̄на̄хам̣, бхо готама, саман̣ам̣ маха̄моггалла̄нам̣ упасан̇камитва̄ етаматтхам̣ апуччхим̣. саман̣опи ме моггалла̄но етехи падехи етехи бйан̃джанехи таматтхам̣ бйа̄ка̄си, сеййатха̄пи бхавам̣ готамо. аччхарийам̣, бхо готама, аббхутам̣, бхо готама! йатра хи на̄ма саттху ча са̄вакасса ча аттхена аттхо бйан̃джанена бйан̃джанам̣ сам̣сандиссати самессати на виродхайиссати, йадидам̣ аггападасми’’нти. саттамам̣.