7. дутийаавиджджа̄паха̄насуттам̣

80. атха кхо ан̃н̃атаро бхиккху…пе… етадавоча – ‘‘аттхи ну кхо, бханте, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти?

‘‘аттхи кхо, бхиккху, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти.

‘‘катамо пана, бханте, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти?

‘‘авиджджа̄ кхо, бхиккху, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти.

‘‘катхам̣ пана, бханте, джа̄нато, катхам̣ пассато авиджджа̄ пахӣйати, виджджа̄ уппаджджатӣ’’ти?

‘‘идха, бхиккху, бхиккхуно сутам̣ хоти – ‘саббе дхамма̄ на̄лам̣ абхинивеса̄йа̄’ти. еван̃четам̣, бхиккху, бхиккхуно сутам̣ хоти – ‘саббе дхамма̄ на̄лам̣ абхинивеса̄йа̄’ти. со саббам̣ дхаммам̣ абхиджа̄на̄ти, саббам̣ дхаммам̣ абхин̃н̃а̄йа саббам̣ дхаммам̣ париджа̄на̄ти, саббам̣ дхаммам̣ парин̃н̃а̄йа саббанимитта̄ни ан̃н̃ато пассати, чаккхум̣ ан̃н̃ато пассати, рӯпе… чаккхувин̃н̃а̄н̣ам̣… чаккхусампхассам̣… йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи ан̃н̃ато пассати…пе… манам̣ ан̃н̃ато пассати, дхамме… мановин̃н̃а̄н̣ам̣… маносампхассам̣… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи ан̃н̃ато пассати. евам̣ кхо, бхиккху, джа̄нато евам̣ пассато бхиккхуно авиджджа̄ пахӣйати, виджджа̄ уппаджджатӣ’’ти. саттамам̣.