8. ким̣сукопамасуттам̣

245. атха кхо ан̃н̃атаро бхиккху йенан̃н̃атаро бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘китта̄вата̄ ну кхо, а̄вусо, бхиккхуно дассанам̣ сувисуддхам̣ хотӣ’’ти? ‘‘йато кхо, а̄вусо, бхиккху чханнам̣ пхасса̄йатана̄нам̣ самудайан̃ча аттхан̇гаман̃ча йатха̄бхӯтам̣ паджа̄на̄ти, етта̄вата̄ кхо, а̄вусо, бхиккхуно дассанам̣ сувисуддхам̣ хотӣ’’ти.

атха кхо со бхиккху асантут̣т̣хо тасса бхиккхусса пан̃хавеййа̄каран̣ена [пан̃ха̄веййа̄каран̣ена (сйа̄. кам̣. ка.)], йенан̃н̃атаро бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘китта̄вата̄ ну кхо, а̄вусо, бхиккхуно дассанам̣ сувисуддхам̣ хотӣ’’ти? ‘‘йато кхо, а̄вусо, бхиккху пан̃чаннам̣ упа̄да̄наккхандха̄нам̣ самудайан̃ча аттхан̇гаман̃ча йатха̄бхӯтам̣ паджа̄на̄ти, етта̄вата̄ кхо, а̄вусо, бхиккхуно дассанам̣ сувисуддхам̣ хотӣ’’ти.

атха кхо со бхиккху асантут̣т̣хо тасса бхиккхусса пан̃хавеййа̄каран̣ена, йенан̃н̃атаро бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘китта̄вата̄ ну кхо, а̄вусо, бхиккхуно дассанам̣ сувисуддхам̣ хотӣ’’ти? ‘‘йато кхо, а̄вусо, бхиккху чатуннам̣ маха̄бхӯта̄нам̣ самудайан̃ча аттхан̇гаман̃ча йатха̄бхӯтам̣ паджа̄на̄ти, етта̄вата̄ кхо, а̄вусо, бхиккхуно дассанам̣ сувисуддхам̣ хотӣ’’ти.

атха кхо со бхиккху асантут̣т̣хо тасса бхиккхусса пан̃хавеййа̄каран̣ена, йенан̃н̃атаро бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘китта̄вата̄ ну кхо, а̄вусо, бхиккхуно дассанам̣ сувисуддхам̣ хотӣ’’ти? ‘‘йато кхо, а̄вусо, бхиккху йам̣ кин̃чи самудайадхаммам̣, саббам̣ там̣ ниродхадхамманти йатха̄бхӯтам̣ паджа̄на̄ти, етта̄вата̄, кхо, а̄вусо, бхиккхуно дассанам̣ сувисуддхам̣ хотӣ’’ти.

атха кхо со бхиккху асантут̣т̣хо тасса бхиккхусса пан̃хавеййа̄каран̣ена, йена бхагава̄ тенупасан̇ками; упасан̇камитва̄ бхагавантам̣ етадавоча – ‘‘идха̄хам̣, бханте, йенан̃н̃атаро бхиккху тенупасан̇камим̣; упасан̇камитва̄ там̣ бхиккхум̣ етадавочам̣ – китта̄вата̄ ну кхо, а̄вусо, бхиккхуно дассанам̣ сувисуддхам̣ хотӣ’ти? евам̣ вутте, бханте, со бхиккху мам̣ етадавоча – ‘йато кхо, а̄вусо, бхиккху чханнам̣ пхасса̄йатана̄нам̣ самудайан̃ча аттхан̇гаман̃ча йатха̄бхӯтам̣ паджа̄на̄ти, етта̄вата̄ кхо, а̄вусо, бхиккхуно дассанам̣ сувисуддхам̣ хотӣ’ти. атха кхва̄хам̣, бханте, асантут̣т̣хо тасса бхиккхусса пан̃хавеййа̄каран̣ена, йенан̃н̃атаро бхиккху тенупасан̇камим̣; упасан̇камитва̄ там̣ бхиккхум̣ етадавочам̣ – ‘китта̄вата̄ ну кхо, а̄вусо, бхиккхуно дассанам̣ сувисуддхам̣ хотӣ’ти? евам̣ вутте, бханте, со бхиккху мам̣ етадавоча – ‘йато кхо, а̄вусо, бхиккху пан̃чаннам̣ упа̄да̄наккхандха̄нам̣…пе… чатуннам̣ маха̄бхӯта̄нам̣ самудайан̃ча аттхан̇гаман̃ча йатха̄бхӯтам̣ паджа̄на̄ти…пе… йам̣ кин̃чи самудайадхаммам̣, саббам̣ там̣ ниродхадхамманти йатха̄бхӯтам̣ паджа̄на̄ти, етта̄вата̄ кхо, а̄вусо, бхиккхуно дассанам̣ сувисуддхам̣ хотӣ’ти. атха кхва̄хам̣, бханте, асантут̣т̣хо тасса бхиккхусса пан̃хавеййа̄каран̣ена йена бхагава̄ тенупасан̇камим̣ ( ) [(упасан̇камитва̄ бхагавантам̣ етадавочам̣) (ка.)]. китта̄вата̄ ну кхо, бханте, бхиккхуно дассанам̣ сувисуддхам̣ хотӣ’’ти?

‘‘сеййатха̄пи, бхиккху, пурисасса ким̣суко адит̣т̣хапуббо асса. со йенан̃н̃атаро пурисо ким̣сукасса дасса̄вӣ тенупасан̇камеййа. упасан̇камитва̄ там̣ пурисам̣ евам̣ вадеййа – ‘кӣдисо, бхо пуриса, ким̣суко’ти? со евам̣ вадеййа – ‘ка̄л̣ако кхо, амбхо пуриса, ким̣суко – сеййатха̄пи джха̄макха̄н̣ӯ’ти. тена кхо пана, бхиккху, самайена та̄дисовасса ким̣суко йатха̄пи [йатха̄ (сӣ. сйа̄. кам̣.) дутийава̄ра̄дӣсу пана ‘‘йатха̄пи’’твева диссати] тасса пурисасса дассанам̣. атха кхо, со бхиккху, пурисо асантут̣т̣хо тасса пурисасса пан̃хавеййа̄каран̣ена, йенан̃н̃атаро пурисо ким̣сукасса дасса̄вӣ тенупасан̇камеййа; упасан̇камитва̄ там̣ пурисам̣ евам̣ вадеййа – ‘кӣдисо, бхо пуриса, ким̣суко’ти? со евам̣ вадеййа – ‘лохитако кхо, амбхо пуриса, ким̣суко – сеййатха̄пи мам̣сапесӣ’ти. тена кхо пана, бхиккху, самайена та̄дисовасса ким̣суко йатха̄пи тасса пурисасса дассанам̣. атха кхо со бхиккху пурисо асантут̣т̣хо тасса пурисасса пан̃хавеййа̄каран̣ена, йенан̃н̃атаро пурисо ким̣сукасса дасса̄вӣ тенупасан̇камеййа; упасан̇камитва̄ там̣ пурисам̣ евам̣ вадеййа – ‘кӣдисо, бхо пуриса, ким̣суко’ти? со евам̣ вадеййа – ‘очӣракаджа̄то [оджӣракаджа̄то (сӣ.), одӣракаджа̄то (пӣ.)] кхо, амбхо пуриса, ким̣суко а̄диннасипа̄т̣ико – сеййатха̄пи сирӣсо’ти. тена кхо пана, бхиккху, самайена та̄дисовасса ким̣суко, йатха̄пи тасса пурисасса дассанам̣. атха кхо со бхиккху пурисо асантут̣т̣хо тасса пурисасса пан̃хавеййа̄каран̣ена, йенан̃н̃атаро пурисо ким̣сукасса дасса̄вӣ тенупасан̇камеййа; упасан̇камитва̄ там̣ пурисам̣ евам̣ вадеййа – ‘кӣдисо, бхо пуриса, ким̣суко’ти? со евам̣ вадеййа – ‘бахалапаттапала̄со сандаччха̄йо [сан̣д̣аччха̄йо (сйа̄. кам̣.)] кхо, амбхо пуриса, ким̣суко – сеййатха̄пи нигродхо’ти. тена кхо пана, бхиккху, самайена та̄дисовасса ким̣суко, йатха̄пи тасса пурисасса дассанам̣. евамева кхо, бхиккху, йатха̄ йатха̄ адхимутта̄нам̣ тесам̣ саппуриса̄нам̣ дассанам̣ сувисуддхам̣ хоти, татха̄ татха̄ кхо техи саппурисехи бйа̄катам̣.

‘‘сеййатха̄пи, бхиккху, ран̃н̃о паччантимам̣ нагарам̣ дал̣худдха̄пам̣ [дал̣худда̄пам̣ (сӣ. пӣ.)] дал̣хапа̄ка̄раторан̣ам̣ чхадва̄рам̣. татрасса дова̄рико пан̣д̣ито бйатто медха̄вӣ, ан̃н̃а̄та̄нам̣ нива̄рета̄, н̃а̄та̄нам̣ павесета̄. пураттхима̄йа диса̄йа а̄гантва̄ сӣгхам̣ дӯтайугам̣ там̣ дова̄рикам̣ евам̣ вадеййа – ‘кахам̣, бхо пуриса, имасса нагарасса нагарасса̄мӣ’ти? со евам̣ вадеййа – ‘есо, бханте, маджджхе син̇гха̄т̣аке нисинно’ти. атха кхо там̣ сӣгхам̣ дӯтайугам̣ нагарасса̄микасса йатха̄бхӯтам̣ вачанам̣ ниййа̄тетва̄ йатха̄гатамаггам̣ пат̣ипаджджеййа. паччхима̄йа диса̄йа а̄гантва̄ сӣгхам̣ дӯтайугам̣…пе… уттара̄йа диса̄йа… даккхин̣а̄йа диса̄йа а̄гантва̄ сӣгхам̣ дӯтайугам̣ там̣ дова̄рикам̣ евам̣ вадеййа – ‘кахам̣, бхо пуриса, имасса нагарасса̄мӣ’ти? со евам̣ вадеййа – ‘есо, бханте, маджджхе син̇гха̄т̣аке нисинно’ти. атха кхо там̣ сӣгхам̣ дӯтайугам̣ нагарасса̄микасса йатха̄бхӯтам̣ вачанам̣ ниййа̄тетва̄ йатха̄гатамаггам̣ пат̣ипаджджеййа.

‘‘упама̄ кхо мйа̄йам̣, бхиккху, ката̄ аттхасса вин̃н̃а̄пана̄йа. айан̃четтха аттхо – ‘нагара’нти кхо, бхиккху, имассетам̣ ча̄тумаха̄бхӯтикасса ка̄йасса адхивачанам̣ ма̄та̄петтикасамбхавасса оданакумма̄сӯпачайасса аниччуччха̄данапаримадданабхеданавиддхам̣санадхаммасса. ‘чха два̄ра̄’ти кхо, бхиккху, чханнетам̣ аджджхаттика̄нам̣ а̄йатана̄нам̣ адхивачанам̣. ‘дова̄рико’ти кхо, бхиккху, сатийа̄ етам̣ адхивачанам̣. ‘сӣгхам̣ дӯтайуга’нти кхо, бхиккху, саматхавипассана̄нетам̣ адхивачанам̣. ‘нагарасса̄мӣ’ти кхо, бхиккху, вин̃н̃а̄н̣ассетам̣ адхивачанам̣. ‘маджджхе син̇гха̄т̣ако’ти кхо, бхиккху, чатуннетам̣ маха̄бхӯта̄нам̣ адхивачанам̣ – патхавӣдха̄туйа̄, а̄подха̄туйа̄, теджодха̄туйа̄, ва̄йодха̄туйа̄. ‘йатха̄бхӯтам̣ вачана’нти кхо, бхиккху, нибба̄нассетам̣ адхивачанам̣. ‘йатха̄гатамагго’ти кхо, бхиккху, арийассетам̣ ат̣т̣хан̇гикасса маггасса адхивачанам̣, сеййатхидам̣ – самма̄дит̣т̣хийа̄…пе… самма̄сама̄дхисса̄’’ти. ат̣т̣хамам̣.