1. пат̣хамасамуддасуттам̣

228. ‘‘‘самуддо, самуддо’ти, бхиккхаве, ассутава̄ путхуджджано бха̄сати. несо, бхиккхаве, арийасса винайе самуддо. маха̄ есо, бхиккхаве, удакара̄си маха̄удакан̣н̣аво. чаккху, бхиккхаве, пурисасса самуддо; тасса рӯпамайо вего. йо там̣ рӯпамайам̣ вегам̣ сахати, айам̣ вуччати, бхиккхаве, атари чаккхусамуддам̣ саӯмим̣ са̄ват̣т̣ам̣ сага̄хам̣ сараккхасам̣; тин̣н̣о па̄ран̇гато тхале тит̣т̣хати бра̄хман̣о…пе… дживха̄, бхиккхаве, пурисасса самуддо; тасса расамайо вего. йо там̣ расамайам̣ вегам̣ сахати, айам̣ вуччати, бхиккхаве, атари дживха̄самуддам̣ саӯмим̣ са̄ват̣т̣ам̣ сага̄хам̣ сараккхасам̣; тин̣н̣о па̄ран̇гато тхале тит̣т̣хати бра̄хман̣о…пе… мано, бхиккхаве, пурисасса самуддо; тасса дхаммамайо вего. йо там̣ дхаммамайам̣ вегам̣ сахати, айам̣ вуччати, бхиккхаве, атари маносамуддам̣ саӯмим̣ са̄ват̣т̣ам̣ сага̄хам̣ сараккхасам̣; тин̣н̣о па̄ран̇гато тхале тит̣т̣хати бра̄хман̣о’’ти. идамавоча…пе… саттха̄ –

‘‘йо имам̣ самуддам̣ сага̄хам̣ сараккхасам̣,

саӯмим̣ са̄ват̣т̣ам̣ сабхайам̣ дуттарам̣ аччатари;

са ведагӯ вуситабрахмачарийо,

локантагӯ па̄рагатоти вуччатӣ’’ти. пат̣хамам̣;