12. атта̄нудит̣т̣хипаха̄насуттам̣

167. атха кхо ан̃н̃атаро бхиккху…пе… етадавоча – ‘‘катхам̣ ну кхо, бханте, джа̄нато катхам̣ пассато атта̄нудит̣т̣хи пахӣйатӣ’’ти? ‘‘чаккхум̣ кхо, бхиккху, анаттато джа̄нато пассато атта̄нудит̣т̣хи пахӣйати. рӯпе анаттато джа̄нато пассато атта̄нудит̣т̣хи пахӣйати. чаккхувин̃н̃а̄н̣ам̣ анаттато джа̄нато пассато атта̄нудит̣т̣хи пахӣйати. чаккхусампхассам̣ анаттато джа̄нато пассато атта̄нудит̣т̣хи пахӣйати. йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи анаттато джа̄нато пассато атта̄нудит̣т̣хи пахӣйати…пе… дживхам̣ анаттато джа̄нато пассато атта̄нудит̣т̣хи пахӣйати…пе… манам̣ анаттато джа̄нато пассато атта̄нудит̣т̣хи пахӣйати. дхамме… мановин̃н̃а̄н̣ам̣… маносампхассам̣… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи анаттато джа̄нато пассато атта̄нудит̣т̣хи пахӣйатӣ’’ти. два̄дасамам̣.

нандиккхайавагго сол̣асамо.

тассудда̄нам̣ –

нандиккхайена чатта̄ро, джӣвакамбаване дуве;

кот̣т̣хикена тайо вутта̄, миччха̄ сакка̄йа аттаноти.