6. пан̃часикхасуттам̣

119. екам̣ самайам̣ бхагава̄ ра̄джагахе вихарати гиджджхакӯт̣е паббате. атха кхо пан̃часикхо гандхаббадевапутто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо пан̃часикхо гандхаббадевапутто бхагавантам̣ етадавоча – ‘‘ко ну кхо, бханте, хету, ко паччайо йена мидхекачче сатта̄ дит̣т̣хева дхамме но паринибба̄йанти? ко пана, бханте, хету, ко паччайо йена мидхекачче сатта̄ дит̣т̣хева дхамме паринибба̄йантӣ’’ти? ‘‘санти кхо, пан̃часикха, чаккхувин̃н̃еййа̄ рӯпа̄…пе… санти кхо, пан̃часикха, мановин̃н̃еййа̄ дхамма̄, ит̣т̣ха̄ канта̄ мана̄па̄ пийарӯпа̄ ка̄мӯпасам̣хита̄ раджанӣйа̄. тан̃че бхиккху абхинандати абхивадати аджджхоса̄йа тит̣т̣хати. тасса там̣ абхинандато абхивадато аджджхоса̄йа тит̣т̣хато таннисситам̣ вин̃н̃а̄н̣ам̣ хоти тадупа̄да̄нам̣. саупа̄да̄но, пан̃часикха, бхиккху но паринибба̄йати. айам̣ кхо, пан̃часикха, хету, айам̣ паччайо йена мидхекачче сатта̄ дит̣т̣хева дхамме но паринибба̄йанти’’.

‘‘санти ча кхо, пан̃часикха, чаккхувин̃н̃еййа̄ рӯпа̄ ит̣т̣ха̄ канта̄ мана̄па̄…пе… санти кхо, пан̃часикха, мановин̃н̃еййа̄ дхамма̄ ит̣т̣ха̄ канта̄ мана̄па̄ пийарӯпа̄ ка̄мӯпасам̣хита̄ раджанӣйа̄. тан̃че бхиккху на̄бхинандати на̄бхивадати на̄джджхоса̄йа тит̣т̣хати, тасса там̣ анабхинандато анабхивадато анаджджхоса̄йа тит̣т̣хато на таннисситам̣ вин̃н̃а̄н̣ам̣ хоти, на тадупа̄да̄нам̣. анупа̄да̄но, пан̃часикха, бхиккху паринибба̄йати. айам̣ кхо, пан̃часикха, хету, айам̣ паччайо йена мидхекачче сатта̄ дит̣т̣хева дхамме паринибба̄йантӣ’’ти. чхат̣т̣хам̣.