8. пат̣хаманатумха̄кам̣суттам̣

101. ‘‘йам̣ [йампи (пӣ. ка.)], бхиккхаве, на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати. кин̃ча, бхиккхаве, на тумха̄кам̣? чаккху, бхиккхаве, на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. рӯпа̄ на тумха̄кам̣. те паджахатха. те во пахӣна̄ хита̄йа сукха̄йа бхависсанти. чаккхувин̃н̃а̄н̣ам̣ на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. чаккхусампхассо на тумха̄кам̣. там̣ паджахатха. со во пахӣно хита̄йа сукха̄йа бхависсати. йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. сотам̣ на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. садда̄ на тумха̄кам̣. те паджахатха. те во пахӣна̄ хита̄йа сукха̄йа бхависсанти. сотавин̃н̃а̄н̣ам̣ на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. сотасампхассо на тумха̄кам̣. там̣ паджахатха. со во пахӣна̄ хита̄йа сукха̄йа бхависсати. йампидам̣ сотасампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. гха̄нам̣ на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. гандха̄ на тумха̄кам̣. те паджахатха. те во пахӣна̄ хита̄йа сукха̄йа бхависсанти. гха̄навин̃н̃а̄н̣ам̣ на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. гха̄насампхассо на тумха̄кам̣. там̣ паджахатха. со во пахӣна̄ хита̄йа сукха̄йа бхависсати. йампидам̣ гха̄насампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати.

дживха̄ на тумха̄кам̣. там̣ паджахатха. са̄ во пахӣна̄ хита̄йа сукха̄йа бхависсати. раса̄ на тумха̄кам̣. те паджахатха. те во пахӣна̄ хита̄йа сукха̄йа бхависсанти. дживха̄вин̃н̃а̄н̣ам̣ на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. дживха̄сампхассо на тумха̄кам̣. там̣ паджахатха. со во пахӣна̄ хита̄йа сукха̄йа бхависсати. йампидам̣ дживха̄сампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати …пе….

мано на тумха̄кам̣. там̣ паджахатха. со во пахӣно хита̄йа сукха̄йа бхависсати. дхамма̄ на тумха̄кам̣. те паджахатха. те во пахӣна̄ хита̄йа сукха̄йа бхависсанти. мановин̃н̃а̄н̣ам̣ на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. маносампхассо на тумха̄кам̣. там̣ паджахатха. со во пахӣно хита̄йа сукха̄йа бхависсати. йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати.

‘‘сеййатха̄пи, бхиккхаве, йам̣ имасмим̣ джетаване тин̣акат̣т̣хаса̄кха̄пала̄сам̣ там̣ джано хареййа ва̄ д̣ахеййа ва̄ йатха̄паччайам̣ ва̄ кареййа, апи ну тумха̄кам̣ евамасса – ‘амхе джано харати ва̄ д̣ахати ва̄ йатха̄паччайам̣ ва̄ каротӣ’’’ти?

‘‘но хетам̣, бханте’’.

‘‘там̣ кисса хету’’?

‘‘на хи но етам̣, бханте, атта̄ ва̄ аттанийам̣ ва̄’’ти.

‘‘евамева кхо, бхиккхаве, чаккху на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсати. рӯпа̄ на тумха̄кам̣… чаккхувин̃н̃а̄н̣ам̣… чаккхусампхассо…пе… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на тумха̄кам̣. там̣ паджахатха. там̣ во пахӣнам̣ хита̄йа сукха̄йа бхависсатӣ’’ти. ат̣т̣хамам̣.