5. наттхидиннасуттам̣

210. са̄ваттхинида̄нам̣. ‘‘кисмим̣ ну кхо, бхиккхаве, сати ким̣ упа̄да̄йа, ким̣ абхинивисса евам̣ дит̣т̣хи уппаджджати – ‘наттхи диннам̣, наттхи йит̣т̣хам̣, наттхи хутам̣, наттхи сукатадуккат̣а̄нам̣ [суккат̣адуккат̣а̄нам̣ (сӣ. пӣ.)] камма̄нам̣ пхалам̣ випа̄ко; наттхи айам̣ локо, наттхи паро локо, наттхи ма̄та̄, наттхи пита̄, наттхи сатта̄ опапа̄тика̄; наттхи локе саман̣абра̄хман̣а̄ саммаггата̄ [самаггата̄ (ка.)] самма̄пат̣ипанна̄ йе иман̃ча локам̣ паран̃ча локам̣ сайам̣ абхин̃н̃а̄ саччхикатва̄ паведенти. ча̄тумаха̄бхӯтико [ча̄туммаха̄бхӯтико (сӣ. сйа̄. кам̣. пӣ.)] айам̣ пурисо йада̄ ка̄лан̇кароти патхавӣ патхавӣка̄йам̣ анупети анупагаччхати, а̄по а̄пока̄йам̣ анупети анупагаччхати, теджо теджока̄йам̣ анупети анупагаччхати, ва̄йо ва̄йока̄йам̣ анупети анупагаччхати. а̄ка̄сам̣ индрийа̄ни сан̇каманти. а̄сандипан̃чама̄ пуриса̄ матам̣ а̄да̄йа гаччханти. йа̄ва а̄л̣а̄хана̄ пада̄ни пан̃н̃а̄йанти. ка̄потака̄ни ат̣т̣хӣни бхаванти. бхассанта̄ а̄хутийо. даттупан̃н̃аттам̣ йадидам̣ да̄нам̣ [даттупан̃н̃аттамидам̣ да̄нам̣ на̄ма (саббаттха)]. тесам̣ туччхам̣ муса̄ вила̄по йе кечи аттхикава̄дам̣ ваданти. ба̄ле ча пан̣д̣ите ча ка̄йасса бхеда̄ уччхиджджанти винассанти на хонти парам̣ маран̣а̄’’’ти? бхагавам̣мӯлака̄ но, бханте, дхамма̄…пе… ‘‘рӯпе кхо, бхиккхаве, сати, рӯпам̣ упа̄да̄йа, рӯпам̣ абхинивисса евам̣ дит̣т̣хи уппаджджати – ‘наттхи диннам̣, наттхи йит̣т̣хам̣…пе… ка̄йасса бхеда̄ уччхиджджанти винассанти на хонти парам̣ маран̣а̄’ти. ведана̄йа сати…пе… сан̃н̃а̄йа сати… сан̇кха̄ресу сати… вин̃н̃а̄н̣е сати, вин̃н̃а̄н̣ам̣ упа̄да̄йа, вин̃н̃а̄н̣ам̣ абхинивисса евам̣ дит̣т̣хи уппаджджати – ‘наттхи диннам̣, наттхи йит̣т̣хам̣…пе… ка̄йасса бхеда̄ уччхиджджанти винассанти на хонти парам̣ маран̣а̄’’’ти.

‘‘там̣ ким̣ ман̃н̃атха, бхиккхаве, рӯпам̣ ниччам̣ ва̄ аниччам̣ ва̄’’ти? ‘‘аниччам̣, бханте…пе… апи ну там̣ анупа̄да̄йа евам̣ дит̣т̣хи уппаджджеййа – ‘наттхи диннам̣, наттхи йит̣т̣хам̣…пе… ка̄йасса бхеда̄ уччхиджджанти винассанти на хонти парам̣ маран̣а̄’’’ти? ‘‘но хетам̣, бханте’’. ‘‘ведана̄… сан̃н̃а̄… сан̇кха̄ра̄… вин̃н̃а̄н̣ам̣ ниччам̣ ва̄ аниччам̣ ва̄’’ти? ‘‘аниччам̣, бханте…пе… апи ну там̣ анупа̄да̄йа евам̣ дит̣т̣хи уппаджджеййа – ‘наттхи диннам̣, наттхи йит̣т̣хам̣…пе… ка̄йасса бхеда̄ уччхиджджанти винассанти на хонти парам̣ маран̣а̄’’’ти? ‘‘но хетам̣, бханте’’. ‘‘йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ тампи ниччам̣ ва̄ аниччам̣ ва̄’’ти? ‘‘аниччам̣, бханте…пе… апи ну там̣ анупа̄да̄йа евам̣ дит̣т̣хи уппаджджеййа – ‘наттхи диннам̣, наттхи йит̣т̣хам̣…пе… йе кечи аттхикава̄дам̣ ваданти; ба̄ле ча пан̣д̣ите ча ка̄йасса бхеда̄ уччхиджджанти винассанти на хонти парам̣ маран̣а̄’’’ти? ‘‘но хетам̣, бханте’’.

‘‘йато кхо, бхиккхаве, арийаса̄вакасса имесу ча т̣ха̄несу кан̇кха̄ пахӣна̄ хоти, дуккхеписса кан̇кха̄ пахӣна̄ хоти…пе… дуккханиродхага̄минийа̄ пат̣ипада̄йаписса кан̇кха̄ пахӣна̄ хоти – айам̣ вуччати, бхиккхаве, арийаса̄вако сота̄панно авинипа̄тадхаммо нийато самбодхипара̄йано’’ти. пан̃чамам̣.