6. каротосуттам̣

211. са̄ваттхинида̄нам̣. ‘‘кисмим̣ ну кхо, бхиккхаве, сати, ким̣ упа̄да̄йа, ким̣ абхинивисса евам̣ дит̣т̣хи уппаджджати – ‘карото ка̄райато чхиндато чхеда̄пайато пачато па̄ча̄пайато сочато соча̄пайато киламато килама̄пайато пхандато пханда̄пайато па̄н̣аматипа̄тайато адиннам̣ а̄дийато сандхим̣ чхиндато ниллопам̣ харато ека̄га̄рикам̣ карото парипантхе тит̣т̣хато парада̄рам̣ гаччхато муса̄ бхан̣ато карото на карӣйати па̄пам̣. кхурапарийантена чепи чаккена йо имисса̄ патхавийа̄ па̄н̣е екамам̣сакхалам̣ екамам̣сапун̃джам̣ кареййа, наттхи татонида̄нам̣ па̄пам̣, наттхи па̄пасса а̄гамо. даккхин̣ам̣ чепи ган̇га̄йа тӣрам̣ гаччхеййа; хананто гха̄тенто чхинданто чхеда̄пенто пачанто па̄ченто, наттхи татонида̄нам̣ па̄пам̣, наттхи па̄пасса а̄гамо. уттарам̣ чепи ган̇га̄йа тӣрам̣ гаччхеййа; даданто да̄пенто йаджанто йаджа̄пенто, наттхи татонида̄нам̣ пун̃н̃ам̣, наттхи пун̃н̃асса а̄гамо. да̄нена дамена сам̣йамена саччаваджджена наттхи пун̃н̃ам̣ наттхи пун̃н̃асса а̄гамо’’’ти. бхагавам̣мӯлака̄ но, бханте, дхамма̄…пе… ‘‘рӯпе кхо, бхиккхаве, сати, рӯпам̣ упа̄да̄йа, рӯпам̣ абхинивисса евам̣ дит̣т̣хи уппаджджати – ‘карото ка̄райато…пе… наттхи пун̃н̃ам̣ наттхи пун̃н̃асса а̄гамо’ти. ведана̄йа сати…пе… сан̃н̃а̄йа сати… сан̇кха̄ресу сати… вин̃н̃а̄н̣е сати, вин̃н̃а̄н̣ам̣ упа̄да̄йа, вин̃н̃а̄н̣ам̣ абхинивисса евам̣ дит̣т̣хи уппаджджати – ‘карото ка̄райато…пе… наттхи пун̃н̃ам̣ наттхи пун̃н̃асса а̄гамо’’’ти.

‘‘там̣ ким̣ ман̃н̃атха, бхиккхаве, рӯпам̣ ниччам̣ ва̄ аниччам̣ ва̄’’ти? ‘‘аниччам̣, бханте’’…пе… апи ну там̣ анупа̄да̄йа евам̣ дит̣т̣хи уппаджджеййа – ‘карото…пе… наттхи пун̃н̃ам̣ наттхи пун̃н̃асса а̄гамо’’ти? ‘‘но хетам̣, бханте’’. ‘‘ведана̄… сан̃н̃а̄… сан̇кха̄ра̄… вин̃н̃а̄н̣ам̣ ниччам̣ ва̄ аниччам̣ ва̄’’ти? ‘‘аниччам̣, бханте…пе… апи ну там̣ анупа̄да̄йа евам̣ дит̣т̣хи уппаджджеййа – ‘карото ка̄райато …пе… наттхи пун̃н̃ам̣ наттхи пун̃н̃асса а̄гамо’’’ти? ‘‘но хетам̣, бханте’’. ‘‘йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ тампи ниччам̣ ва̄ аниччам̣ ва̄’’ти? ‘‘аниччам̣, бханте…пе… апи ну там̣ анупа̄да̄йа евам̣ дит̣т̣хи уппаджджеййа – ‘карото ка̄райато…пе… наттхи пун̃н̃ам̣ наттхи пун̃н̃асса а̄гамо’’’ти? ‘‘но хетам̣, бханте’’.

‘‘йато кхо, бхиккхаве, арийаса̄вакасса имесу ча т̣ха̄несу кан̇кха̄ пахӣна̄ хоти, дуккхеписса кан̇кха̄ пахӣна̄ хоти…пе… дуккханиродхага̄минийа̄ пат̣ипада̄йаписса кан̇кха̄ пахӣна̄ хоти – айам̣ вуччати, бхиккхаве, арийаса̄вако сота̄панно авинипа̄тадхаммо нийато самбодхипара̄йано’’ти. чхат̣т̣хам̣.