18. невахотинанахотитатха̄гатосуттам̣

223. са̄ваттхинида̄нам̣. ‘‘кисмим̣ ну кхо, бхиккхаве, сати, ким̣ упа̄да̄йа, ким̣ абхинивисса евам̣ дит̣т̣хи уппаджджати – ‘нева хоти, на на хоти татха̄гато парам̣ маран̣а̄’’’ти? бхагавам̣мӯлака̄ но, бханте, дхамма̄…пе… ‘‘рӯпе кхо, бхиккхаве, сати, рӯпам̣ упа̄да̄йа, рӯпам̣ абхинивисса евам̣ дит̣т̣хи уппаджджати – ‘нева хоти, на на хоти татха̄гато парам̣ маран̣а̄’ти…пе….

‘‘там̣ ким̣ ман̃н̃атха, бхиккхаве, рӯпам̣ ниччам̣ ва̄ аниччам̣ ва̄’’ти? ‘‘аниччам̣, бханте’’…пе… випарин̣а̄мадхаммам̣, апи ну там̣ анупа̄да̄йа евам̣ дит̣т̣хи уппаджджеййа – ‘нева хоти, на на хоти татха̄гато парам̣ маран̣а̄’’ти? ‘‘но хетам̣, бханте’’. ‘‘йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ тампи ниччам̣ ва̄ аниччам̣ ва̄’’ти? ‘‘аниччам̣, бханте’’. ‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти? ‘‘дуккхам̣, бханте’’. ‘‘йам̣ пана̄ниччам̣ дуккхам̣ випарин̣а̄мадхаммам̣, апи ну там̣ анупа̄да̄йа евам̣ дит̣т̣хи уппаджджеййа – ‘нева хоти, на на хоти татха̄гато парам̣ маран̣а̄’’’ти? ‘‘но хетам̣, бханте’’.

‘‘йато кхо, бхиккхаве, арийаса̄вакасса имесу ча т̣ха̄несу кан̇кха̄ пахӣна̄ хоти, дуккхеписса кан̇кха̄ пахӣна̄ хоти, дуккхасамудайеписса кан̇кха̄ пахӣна̄ хоти, дуккханиродхеписса кан̇кха̄ пахӣна̄ хоти, дуккханиродхага̄минийа̄ пат̣ипада̄йаписса кан̇кха̄ пахӣна̄ хоти – айам̣ вуччати, бхиккхаве, арийаса̄вако сота̄панно авинипа̄тадхаммо нийато самбодхипара̄йано’’ти. ат̣т̣ха̄расамам̣.

сота̄паттивагго.

ат̣т̣ха̄расавеййа̄каран̣ам̣ нит̣т̣хитам̣.

тассудда̄нам̣ –

ва̄там̣ етам̣ мама, со атта̄ но ча ме сийа̄;

наттхи карото хету ча, маха̄дит̣т̣хена ат̣т̣хамам̣.

сассато локо ча, асассато ча антава̄ ча;

анантава̄ ча там̣ джӣвам̣ там̣ сарӣранти;

ан̃н̃ам̣ джӣвам̣ ан̃н̃ам̣ сарӣранти ча.

хоти татха̄гато парам̣ маран̣а̄ти;

на хоти татха̄гато парам̣ маран̣а̄ти;

нева хоти на на хоти татха̄гато парам̣ маран̣а̄ти.