4. арахантасуттам̣

76. са̄ваттхинида̄нам̣. ‘‘рӯпам̣, бхиккхаве, аниччам̣. йаданиччам̣ там̣ дуккхам̣; йам̣ дуккхам̣ таданатта̄; йаданатта̄ там̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣. ведана̄… сан̃н̃а̄… сан̇кха̄ра̄… вин̃н̃а̄н̣ам̣ аниччам̣. йаданиччам̣ там̣ дуккхам̣; йам̣ дуккхам̣ таданатта̄; йаданатта̄ там̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣’’.

‘‘евам̣ пассам̣, бхиккхаве, сутава̄ арийаса̄вако рӯпасмимпи ниббиндати, ведана̄йапи… сан̃н̃а̄йапи… сан̇кха̄ресупи… вин̃н̃а̄н̣асмимпи ниббиндати. ниббиндам̣ вираджджати; вира̄га̄ вимуччати. вимуттасмим̣ вимуттамити н̃а̄н̣ам̣ хоти. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄ти. йа̄вата̄, бхиккхаве, сатта̄ва̄са̄, йа̄вата̄ бхаваггам̣, ете агга̄, ете сет̣т̣ха̄ локасмим̣ йадидам̣ араханто’’ти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘сукхино вата араханто, тан̣ха̄ тесам̣ на виджджати;

асмима̄но самуччхинно, мохаджа̄лам̣ пада̄литам̣.

‘‘анеджам̣ те ануппатта̄, читтам̣ тесам̣ ана̄вилам̣;

локе анупалитта̄ те, брахмабхӯта̄ ана̄сава̄.

‘‘пан̃чаккхандхе парин̃н̃а̄йа, сатта саддхаммагочара̄;

пасам̣сийа̄ саппуриса̄, путта̄ буддхасса ораса̄.

‘‘саттаратанасампанна̄, тӣсу сиккха̄су сиккхита̄;

анувичаранти маха̄вӣра̄, пахӣнабхайабхерава̄.

‘‘дасахан̇гехи сампанна̄, маха̄на̄га̄ сама̄хита̄;

ете кхо сет̣т̣ха̄ локасмим̣, тан̣ха̄ тесам̣ на виджджати.

‘‘асекхан̃а̄н̣амуппаннам̣, антимойам̣ [антимасса (ка.)] самуссайо;

йо са̄ро брахмачарийасса, тасмим̣ апарапаччайа̄.

‘‘видха̄су на викампанти, виппамутта̄ пунаббхава̄;

дантабхӯмимануппатта̄, те локе виджита̄вино.

‘‘уддхам̣ тирийам̣ апа̄чӣнам̣, нандӣ тесам̣ на виджджати;

наданти те сӣхана̄дам̣, буддха̄ локе ануттара̄’’ти. чатуттхам̣;