4. аниччасуттам̣

66. са̄ваттхинида̄нам̣. атха кхо ан̃н̃атаро бхиккху…пе… екамантам̣ нисинно кхо со бхиккху бхагавантам̣ етадавоча – ‘‘са̄дху ме, бханте, бхагава̄ сам̣кхиттена дхаммам̣ десету…пе… а̄та̄пӣ пахитатто вихареййа’’нти. ‘‘йам̣ кхо, бхиккху, аниччам̣; татра те чхандо паха̄таббо’’ти. ‘‘ан̃н̃а̄там̣ бхагава̄; ан̃н̃а̄там̣ сугата̄’’ти.

‘‘йатха̄ катхам̣ пана твам̣, бхиккху, майа̄ сам̣кхиттена бха̄ситасса виттха̄рена аттхам̣ а̄джа̄на̄сӣ’’ти? ‘‘рӯпам̣ кхо, бханте, аниччам̣; татра ме чхандо паха̄таббо. ведана̄… сан̃н̃а̄… сан̇кха̄ра̄… вин̃н̃а̄н̣ам̣ аниччам̣; татра ме чхандо паха̄таббо. имасса кхва̄хам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄мӣ’’ти.

‘‘са̄дху са̄дху, бхиккху! са̄дху кхо твам̣, бхиккху, майа̄ сам̣кхиттена бха̄ситасса виттха̄рена аттхам̣ а̄джа̄на̄си. рӯпам̣ кхо, бхиккху, аниччам̣; татра те чхандо паха̄таббо. ведана̄ аничча̄… сан̃н̃а̄… сан̇кха̄ра̄… вин̃н̃а̄н̣ам̣ аниччам̣; татра кхо те чхандо паха̄таббо. имасса кхо, бхиккху, майа̄ сам̣кхиттена бха̄ситасса евам̣ виттха̄рена аттхо дат̣т̣хаббо’’ти…пе… ан̃н̃атаро ча пана со бхиккху арахатам̣ ахосӣти. чатуттхам̣.