4. натумха̄кам̣вагго

1. натумха̄кам̣суттам̣

33. са̄ваттхинида̄нам̣. ‘‘йам̣, бхиккхаве, на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати. кин̃ча, бхиккхаве, на тумха̄кам̣? рӯпам̣, бхиккхаве, на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати. ведана̄ на тумха̄кам̣, там̣ паджахатха. са̄ во пахӣна̄ хита̄йа сукха̄йа бхависсати. сан̃н̃а̄ на тумха̄кам̣… сан̇кха̄ра̄ на тумха̄кам̣, те паджахатха. те во пахӣна̄ хита̄йа сукха̄йа бхависсанти. вин̃н̃а̄н̣ам̣ на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати’’.

‘‘сеййатха̄пи, бхиккхаве, йам̣ имасмим̣ джетаване тин̣акат̣т̣хаса̄кха̄пала̄сам̣ там̣ джано хареййа ва̄ д̣ахеййа ва̄ йатха̄паччайам̣ ва̄ кареййа. апи ну тумха̄кам̣ евамасса – ‘амхе джано харати ва̄ д̣ахати ва̄ йатха̄паччайам̣ ва̄ каротӣ’’’ти? ‘‘но хетам̣, бханте’’. ‘‘там̣ кисса хету’’? ‘‘на хи но етам̣, бханте, атта̄ ва̄ аттанийам̣ ва̄’’ти. ‘‘евамева кхо, бхиккхаве, рӯпам̣ на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати. ведана̄ на тумха̄кам̣, там̣ паджахатха. са̄ во пахӣна̄ хита̄йа сукха̄йа бхависсати. сан̃н̃а̄ на тумха̄кам̣… сан̇кха̄ра̄ на тумха̄кам̣… вин̃н̃а̄н̣ам̣ на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсатӣ’’ти. пат̣хамам̣.

2. дутийанатумха̄кам̣суттам̣

34. са̄ваттхинида̄нам̣. ‘‘йам̣, бхиккхаве, на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати. кин̃ча, бхиккхаве, на тумха̄кам̣? рӯпам̣, бхиккхаве, на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати. ведана̄ на тумха̄кам̣… сан̃н̃а̄ на тумха̄кам̣… сан̇кха̄ра̄ на тумха̄кам̣… вин̃н̃а̄н̣ам̣ на тумха̄кам̣, там̣ паджахатха. там̣ во пахӣнам̣ хита̄йа сукха̄йа бхависсати. йам̣, бхиккхаве, на тумха̄кам̣ там̣ паджахатха. там̣ во пахӣнам̣ хита̄йа сукха̄йа бхависсатӣ’’ти. дутийам̣.

3. ан̃н̃атарабхиккхусуттам̣

35. са̄ваттхинида̄нам̣. атха кхо ан̃н̃атаро бхиккху йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со бхиккху бхагавантам̣ етадавоча – ‘‘са̄дху ме, бханте, бхагава̄ сам̣кхиттена дхаммам̣ десету; йамахам̣ бхагавато дхаммам̣ сутва̄ еко вӯпакат̣т̣хо, аппаматто а̄та̄пӣ пахитатто вихареййа’’нти. ‘‘йам̣ кхо, бхиккху, анусети, тена сан̇кхам̣ гаччхати; йам̣ на̄нусети, на тена сан̇кхам̣ гаччхатӣ’’ти. ‘‘ан̃н̃а̄там̣, бхагава̄; ан̃н̃а̄там̣, сугата̄’’ти.

‘‘йатха̄ катхам̣ пана твам̣, бхиккху, майа̄ сам̣кхиттена бха̄ситасса виттха̄рена аттхам̣ а̄джа̄на̄сӣ’’ти? ‘‘рӯпам̣ че, бханте, анусети тена сан̇кхам̣ гаччхати. веданам̣ че анусети тена сан̇кхам̣ гаччхати. сан̃н̃ам̣ че анусети тена сан̇кхам̣ гаччхати. сан̇кха̄ре че анусети тена сан̇кхам̣ гаччхати. вин̃н̃а̄н̣ам̣ че анусети тена сан̇кхам̣ гаччхати. рӯпам̣ че, бханте, на̄нусети на тена сан̇кхам̣ гаччхати. веданам̣ че… сан̃н̃ам̣ че… сан̇кха̄ре че… вин̃н̃а̄н̣ам̣ че на̄нусети на тена сан̇кхам̣ гаччхати. имасса кхва̄хам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄мӣ’’ти.

‘‘са̄дху са̄дху, бхиккху! са̄дху кхо твам̣, бхиккху, майа̄ сам̣кхиттена бха̄ситасса виттха̄рена аттхам̣ а̄джа̄на̄си. рӯпам̣ че, бхиккху, анусети тена сан̇кхам̣ гаччхати. веданам̣ че… сан̃н̃ам̣ че… сан̇кха̄ре че… вин̃н̃а̄н̣ам̣ че анусети тена сан̇кхам̣ гаччхати. рӯпам̣ че, бхиккху, на̄нусети на тена сан̇кхам̣ гаччхати. веданам̣ че… сан̃н̃ам̣ че… сан̇кха̄ре че… вин̃н̃а̄н̣ам̣ че на̄нусети на тена сан̇кхам̣ гаччхати. имасса кхо, бхиккху, майа̄ сам̣кхиттена, бха̄ситасса евам̣ виттха̄рена аттхо дат̣т̣хаббо’’ти.

атха кхо со бхиккху бхагавато бха̄ситам̣ абхинандитва̄ анумодитва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми.

атха кхо со бхиккху еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана со бхиккху арахатам̣ ахосӣти. татийам̣.

4. дутийаан̃н̃атарабхиккхусуттам̣

36. са̄ваттхинида̄нам̣. атха кхо ан̃н̃атаро бхиккху йена бхагава̄…пе… екамантам̣ нисинно кхо со бхиккху бхагавантам̣ етадавоча – ‘‘са̄дху ме, бханте, бхагава̄ сам̣кхиттена дхаммам̣ десету йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти. ‘‘йам̣ кхо, бхиккху, анусети там̣ анумӣйати; йам̣ анумӣйати тена сан̇кхам̣ гаччхати. йам̣ на̄нусети на там̣ анумӣйати; йам̣ на̄нумӣйати на тена сан̇кхам̣ гаччхатӣ’’ти. ‘‘ан̃н̃а̄там̣, бхагава̄; ан̃н̃а̄там̣, сугата̄’’ти.

‘‘йатха̄ катхам̣ пана твам̣, бхиккху, майа̄ сам̣кхиттена бха̄ситасса виттха̄рена аттхам̣ а̄джа̄на̄сӣ’’ти? ‘‘рӯпам̣ че, бханте, анусети там̣ анумӣйати; йам̣ анумӣйати тена сан̇кхам̣ гаччхати. веданам̣ че анусети… сан̃н̃ам̣ че анусети… сан̇кха̄ре че анусети… вин̃н̃а̄н̣ам̣ че анусети там̣ анумӣйати; йам̣ анумӣйати тена сан̇кхам̣ гаччхати. рӯпам̣ че, бханте, на̄нусети на там̣ анумӣйати; йам̣ на̄нумӣйати на тена сан̇кхам̣ гаччхати. веданам̣ че на̄нусети… сан̃н̃ам̣ че на̄нусети… сан̇кха̄ре че на̄нусети… вин̃н̃а̄н̣ам̣ че на̄нусети на там̣ анумӣйати; йам̣ на̄нумӣйати на тена сан̇кхам̣ гаччхати. имасса кхва̄хам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄мӣ’’ти.

‘‘са̄дху са̄дху, бхиккху! са̄дху кхо твам̣, бхиккху, майа̄ сам̣кхиттена бха̄ситасса виттха̄рена аттхам̣ а̄джа̄на̄си. рӯпам̣ че, бхиккху, анусети там̣ анумӣйати; йам̣ анумӣйати тена сан̇кхам̣ гаччхати. веданам̣ че, бхиккху… сан̃н̃ам̣ че, бхиккху… сан̇кха̄ре че, бхиккху… вин̃н̃а̄н̣ам̣ че, бхиккху, анусети там̣ анумӣйати; йам̣ анумӣйати тена сан̇кхам̣ гаччхати. рӯпам̣ че, бхиккху, на̄нусети на там̣ анумӣйати; йам̣ на̄нумӣйати на тена сан̇кхам̣ гаччхати. веданам̣ че на̄нусети… сан̃н̃ам̣ че на̄нусети… сан̇кха̄ре че на̄нусети… вин̃н̃а̄н̣ам̣ че на̄нусети на там̣ анумӣйати; йам̣ на̄нумӣйати на тена сан̇кхам̣ гаччхати. имасса кхо, бхиккху, майа̄ сам̣кхиттена бха̄ситасса евам̣ виттха̄рена аттхо дат̣т̣хаббо’’ти…пе… ан̃н̃атаро ча пана со бхиккху арахатам̣ ахосӣти. чатуттхам̣.

5. а̄нандасуттам̣

37. са̄ваттхинида̄нам̣. атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисиннам̣ кхо а̄йасмантам̣ а̄нандам̣ бхагава̄ етадавоча –

‘‘саче там̣, а̄нанда, евам̣ пуччхеййум̣ – ‘катамесам̣, а̄вусо а̄нанда, дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса [т̣хита̄нам̣ (сйа̄. кам̣. пӣ. ка.)] ан̃н̃атхаттам̣ пан̃н̃а̄йатӣ’ти? евам̣ пут̣т̣хо твам̣, а̄нанда, кинти бйа̄кареййа̄сӣ’’ти? ‘‘саче мам̣, бханте, евам̣ пуччхеййум̣ – ‘катамесам̣, а̄вусо а̄нанда, дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йатӣ’ти? евам̣ пут̣т̣хохам̣, бханте, евам̣ бйа̄кареййам̣ – ‘рӯпасса кхо, а̄вусо, уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. ведана̄йа… сан̃н̃а̄йа… сан̇кха̄ра̄нам̣… вин̃н̃а̄н̣асса уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. имесам̣ кхо, а̄вусо, дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йатӣ’ти. евам̣ пут̣т̣хохам̣, бханте, евам̣ бйа̄кареййа’’нти.

‘‘са̄дху са̄дху, а̄нанда! рӯпасса кхо, а̄нанда, уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. ведана̄йа… сан̃н̃а̄йа… сан̇кха̄ра̄нам̣… вин̃н̃а̄н̣асса уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. имесам̣ кхо, а̄нанда, дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йатӣти. евам̣ пут̣т̣хо твам̣, а̄нанда, евам̣ бйа̄кареййа̄сӣ’’ти. пан̃чамам̣.

6. дутийаа̄нандасуттам̣

38. са̄ваттхинида̄нам̣. екамантам̣ нисиннам̣ кхо а̄йасмантам̣ а̄нандам̣ бхагава̄ етадавоча –

‘‘саче там̣, а̄нанда, евам̣ пуччхеййум̣ – ‘катамесам̣, а̄вусо а̄нанда, дхамма̄нам̣ уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха? катамесам̣ дхамма̄нам̣ уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати? катамесам̣ дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йатӣ’ти? евам̣ пут̣т̣хо твам̣, а̄нанда, кинти бйа̄кареййа̄сӣ’’ти? ‘‘саче мам̣, бханте, евам̣ пуччхеййум̣ – ‘катамесам̣, а̄вусо а̄нанда, дхамма̄нам̣ уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха? катамесам̣ дхамма̄нам̣ уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати? катамесам̣ дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йатӣ’ти? евам̣ пут̣т̣хохам̣, бханте, евам̣ бйа̄кареййам̣ – ‘йам̣ кхо, а̄вусо, рӯпам̣ атӣтам̣ нируддхам̣ випарин̣атам̣; тасса уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха. йа̄ ведана̄ атӣта̄ нируддха̄ випарин̣ата̄; тасса̄ уппа̄до пан̃н̃а̄йиттха, вайо пан̃н̃а̄йиттха, т̣хита̄йа ан̃н̃атхаттам̣ пан̃н̃а̄йиттха. йа̄ сан̃н̃а̄… йе сан̇кха̄ра̄ атӣта̄ нируддха̄ випарин̣ата̄; тесам̣ уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха. йам̣ вин̃н̃а̄н̣ам̣ атӣтам̣ нируддхам̣ випарин̣атам̣; тасса уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха. имесам̣ кхо, а̄вусо, дхамма̄нам̣ уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха’’’.

‘‘йам̣ кхо, а̄вусо, рӯпам̣ аджа̄там̣ апа̄тубхӯтам̣; тасса уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати. йа̄ ведана̄ аджа̄та̄ апа̄тубхӯта̄; тасса̄ уппа̄до пан̃н̃а̄йиссати, вайо пан̃н̃а̄йиссати, т̣хита̄йа ан̃н̃атхаттам̣ пан̃н̃а̄йиссати. йа̄ сан̃н̃а̄…пе… йе сан̇кха̄ра̄ аджа̄та̄ апа̄тубхӯта̄; тесам̣ уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати. йам̣ вин̃н̃а̄н̣ам̣ аджа̄там̣ апа̄тубхӯтам̣; тасса уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати. имесам̣ кхо, а̄вусо, дхамма̄нам̣ уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати.

‘‘йам̣ кхо, а̄вусо, рӯпам̣ джа̄там̣ па̄тубхӯтам̣; тасса уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. йа̄ ведана̄ джа̄та̄ па̄тубхӯта̄…пе… йа̄ сан̃н̃а̄… йе сан̇кха̄ра̄ джа̄та̄ па̄тубхӯта̄; тесам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. йам̣ вин̃н̃а̄н̣ам̣ джа̄там̣ па̄тубхӯтам̣ тасса уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. имесам̣ кхо, а̄вусо, дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йатӣ’ти. евам̣ пут̣т̣хохам̣, бханте, евам̣ бйа̄кареййа’’нти.

‘‘са̄дху, са̄дху, а̄нанда! йам̣ кхо, а̄нанда, рӯпам̣ атӣтам̣ нируддхам̣ випарин̣атам̣; тасса уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха. йа̄ ведана̄ … йа̄ сан̃н̃а̄… йе сан̇кха̄ра̄… йам̣ вин̃н̃а̄н̣ам̣ атӣтам̣ нируддхам̣ випарин̣атам̣; тасса уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха. имесам̣ кхо, а̄нанда, дхамма̄нам̣ уппа̄до пан̃н̃а̄йиттха, вайо пан̃н̃а̄йиттха, т̣хитасса ан̃н̃атхаттам̣ пан̃н̃а̄йиттха.

‘‘йам̣ кхо, а̄нанда, рӯпам̣ аджа̄там̣ апа̄тубхӯтам̣; тасса уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати. йа̄ ведана̄… йа̄ сан̃н̃а̄… йе сан̇кха̄ра̄… йам̣ вин̃н̃а̄н̣ам̣ аджа̄там̣ апа̄тубхӯтам̣; тасса уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати. имесам̣ кхо, а̄нанда, дхамма̄нам̣ уппа̄до пан̃н̃а̄йиссати, вайо пан̃н̃а̄йиссати, т̣хитасса ан̃н̃атхаттам̣ пан̃н̃а̄йиссати.

‘‘йам̣ кхо, а̄нанда, рӯпам̣ джа̄там̣ па̄тубхӯтам̣; тасса уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. йа̄ ведана̄ джа̄та̄ па̄тубхӯта̄… йа̄ сан̃н̃а̄… йе сан̇кха̄ра̄… йам̣ вин̃н̃а̄н̣ам̣ джа̄там̣ па̄тубхӯтам̣; тасса уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йати. имесам̣ кхо, а̄нанда, дхамма̄нам̣ уппа̄до пан̃н̃а̄йати, вайо пан̃н̃а̄йати, т̣хитасса ан̃н̃атхаттам̣ пан̃н̃а̄йатӣти. евам̣ пут̣т̣хо твам̣, а̄нанда, евам̣ бйа̄кареййа̄сӣ’’ти. чхат̣т̣хам̣.

7. анудхаммасуттам̣

39. са̄ваттхинида̄нам̣. ‘‘дхамма̄нудхаммаппат̣ипаннасса, бхиккхаве, бхиккхуно айаманудхаммо хоти йам̣ рӯпе ниббида̄бахуло [ниббида̄бахулам̣ (пӣ. ка.)] вихареййа, ведана̄йа ниббида̄бахуло вихареййа, сан̃н̃а̄ ниббида̄бахуло вихареййа, сан̇кха̄ресу ниббида̄бахуло вихареййа, вин̃н̃а̄н̣е ниббида̄бахуло вихареййа. йо рӯпе ниббида̄бахуло вихаранто, ведана̄йа… сан̃н̃а̄йа… сан̇кха̄ресу ниббида̄бахуло вихаранто, вин̃н̃а̄н̣е ниббида̄бахуло вихаранто рӯпам̣ париджа̄на̄ти, веданам̣… сан̃н̃ам̣… сан̇кха̄ре… вин̃н̃а̄н̣ам̣ париджа̄на̄ти, со рӯпам̣ париджа̄нам̣, веданам̣… сан̃н̃ам̣… сан̇кха̄ре… вин̃н̃а̄н̣ам̣ париджа̄нам̣ паримуччати рӯпамха̄, паримуччати ведана̄, паримуччати сан̃н̃а̄йа, паримуччати сан̇кха̄рехи, паримуччати вин̃н̃а̄н̣амха̄, паримуччати джа̄тийа̄ джара̄маран̣ена сокехи паридевехи дуккхехи доманассехи упа̄йа̄сехи, паримуччати дуккхасма̄ти вада̄мӣ’’ти. саттамам̣.

8. дутийаанудхаммасуттам̣

40. са̄ваттхинида̄нам̣. ‘‘дхамма̄нудхаммаппат̣ипаннасса, бхиккхаве, бхиккхуно айаманудхаммо хоти йам̣ рӯпе аничча̄нупассӣ вихареййа…пе… паримуччати дуккхасма̄ти вада̄мӣ’’ти. ат̣т̣хамам̣.

9. татийаанудхаммасуттам̣

41. са̄ваттхинида̄нам̣. ‘‘дхамма̄нудхаммаппат̣ипаннасса, бхиккхаве, бхиккхуно айаманудхаммо хоти йам̣ рӯпе дуккха̄нупассӣ вихареййа…пе… паримуччати дуккхасма̄ти вада̄мӣ’’ти. навамам̣.

10. чатуттхаанудхаммасуттам̣

42. са̄ваттхинида̄нам̣. ‘‘дхамма̄нудхаммаппат̣ипаннасса, бхиккхаве, бхиккхуно айаманудхаммо хоти йам̣ рӯпе анатта̄нупассӣ вихареййа, ведана̄йа… сан̃н̃а̄йа… сан̇кха̄ресу… вин̃н̃а̄н̣е анатта̄нупассӣ вихареййа. йо рӯпе анатта̄нупассӣ вихаранто…пе… рӯпам̣ париджа̄на̄ти, веданам̣… сан̃н̃ам̣… сан̇кха̄ре… вин̃н̃а̄н̣ам̣ париджа̄на̄ти, со рӯпам̣ париджа̄нам̣, веданам̣… сан̃н̃ам̣… сан̇кха̄ре… вин̃н̃а̄н̣ам̣ париджа̄нам̣ паримуччати рӯпамха̄, паримуччати ведана̄йа, паримуччати сан̃н̃а̄йа, паримуччати сан̇кха̄рехи, паримуччати вин̃н̃а̄н̣амха̄, паримуччати джа̄тийа̄ джара̄маран̣ена сокехи паридевехи дуккхехи доманассехи упа̄йа̄сехи, паримуччати дуккхасма̄ти вада̄мӣ’’ти. дасамам̣.

натумха̄кам̣вагго чатуттхо.

тассудда̄нам̣ –

натумха̄кена две вутта̄, бхиккхӯхи апаре дуве;

а̄нандена ча две вутта̄, анудхаммехи две дука̄ти.