5. бандханасуттам̣

117. са̄ваттхинида̄нам̣. ‘‘идха бхиккхаве ассутава̄ путхуджджано арийа̄нам̣ адасса̄вӣ…пе… саппурисадхамме авинӣто рӯпам̣ аттато саманупассати, рӯпавантам̣ ва̄ атта̄нам̣; аттани ва̄ рӯпам̣, рӯпасмим̣ ва̄ атта̄нам̣. айам̣ вуччати, бхиккхаве, ассутава̄ путхуджджано рӯпабандханабаддхо сантараба̄хирабандханабаддхо атӣрадассӣ апа̄радассӣ, баддхо джӣйати [баддхо джа̄йати (сӣ. пӣ.) баддхо джа̄йати баддхо джӣйати (сӣ. ат̣т̣ха. сйа̄. ат̣т̣ха.)] баддхо мӣйати баддхо асма̄ лока̄ парам̣ локам̣ гаччхати. веданам̣ аттато саманупассати…пе… ведана̄йа ва̄ атта̄нам̣. айам̣ вуччати, бхиккхаве, ассутава̄ путхуджджано ведана̄бандханабаддхо сантараба̄хирабандханабаддхо атӣрадассӣ апа̄радассӣ, баддхо джӣйати баддхо мӣйати баддхо асма̄ лока̄ парам̣ локам̣ гаччхати. сан̃н̃ам̣… сан̇кха̄ре… вин̃н̃а̄н̣ам̣ аттато саманупассати…пе… айам̣ вуччати, бхиккхаве, ассутава̄ путхуджджано вин̃н̃а̄н̣абандханабаддхо сантараба̄хирабандханабаддхо атӣрадассӣ апа̄радассӣ, баддхо джӣйати баддхо мӣйати баддхо асма̄ лока̄ парам̣ локам̣ гаччхати’’.

‘‘сутава̄ ча кхо, бхиккхаве, арийаса̄вако арийа̄нам̣ дасса̄вӣ…пе… саппурисадхамме сувинӣто на рӯпам̣ аттато саманупассати, на рӯпавантам̣ ва̄ атта̄нам̣; на аттани ва̄ рӯпам̣, на рӯпасмим̣ ва̄ атта̄нам̣. айам̣ вуччати, бхиккхаве, сутава̄ арийаса̄вако на рӯпабандханабаддхо, на сантараба̄хирабандханабаддхо, тӣрадассӣ, па̄радассӣ; ‘паримутто со дуккхасма̄’ти вада̄ми. на веданам̣ аттато…пе… на сан̃н̃ам̣ аттато…пе… на сан̇кха̄ре аттато…пе… на вин̃н̃а̄н̣ам̣ аттато саманупассати…пе… айам̣ вуччати, бхиккхаве, сутава̄ арийаса̄вако на вин̃н̃а̄н̣абандханабаддхо, на сантараба̄хирабандханабаддхо, тӣрадассӣ, па̄радассӣ, ‘паримутто со дуккхасма̄’ти вада̄мӣ’’ти. пан̃чамам̣.