6. дхануггахасуттам̣

228. са̄ваттхийам̣ вихарати…пе… ‘‘сеййатха̄пи, бхиккхаве, чатта̄ро дал̣хадхамма̄ дхануггаха̄ сусиккхита̄ катахаттха̄ катӯпа̄сана̄ чатуддиса̄ т̣хита̄ ассу. атха пурисо а̄гаччхеййа – ‘ахам̣ имесам̣ чатуннам̣ дал̣хадхамма̄нам̣ дхануггаха̄нам̣ сусиккхита̄нам̣ катахаттха̄нам̣ катӯпа̄сана̄нам̣ чатуддиса̄ кан̣д̣е кхитте аппатит̣т̣хите патхавийам̣ гахетва̄ а̄харисса̄мӣ’ти. там̣ ким̣ ман̃н̃атха, бхиккхаве, ‘джавано пурисо парамена джавена саманна̄гато’ти алам̣ вачана̄йа̄’’ти?

‘‘екасса чепи, бханте, дал̣хадхаммасса дхануггахасса сусиккхитасса катахаттхасса катӯпа̄санасса кан̣д̣ам̣ кхиттам̣ аппатит̣т̣хитам̣ патхавийам̣ гахетва̄ а̄хареййа – ‘джавано пурисо парамена джавена саманна̄гато’ти алам̣ вачана̄йа, ко пана ва̄до чатуннам̣ дал̣хадхамма̄нам̣ дхануггаха̄нам̣ сусиккхита̄нам̣ катахаттха̄нам̣ катӯпа̄сана̄на’’нти?

‘‘йатха̄ ча, бхиккхаве, тасса пурисасса джаво, йатха̄ ча чандимасӯрийа̄нам̣ джаво, тато сӣгхатаро. йатха̄ ча, бхиккхаве, тасса пурисасса джаво йатха̄ ча чандимасӯрийа̄нам̣ джаво йатха̄ ча йа̄ девата̄ чандимасӯрийа̄нам̣ пурато дха̄ванти та̄сам̣ девата̄нам̣ джаво, ( ) [(тато сӣгхатаро. йатха̄ ча бхиккхаве тасса пурисасса джаво, йатха̄ ча чандимасурийа̄нам̣ джаво, йатха̄ ча йа̄ девата̄ чандимасурийа̄нам̣ пурато дха̄ванти, та̄сам̣ девата̄нам̣ джаво,) (сӣ. сйа̄. кам̣.)] тато сӣгхатарам̣ а̄йусан̇кха̄ра̄ кхийанти. тасма̄тиха, бхиккхаве, евам̣ сиккхитаббам̣ – ‘аппаматта̄ вихарисса̄ма̄’ти. еван̃хи во, бхиккхаве, сиккхитабба’’нти. чхат̣т̣хам̣.