7. а̄н̣исуттам̣

229. са̄ваттхийам̣ вихарати…пе… ‘‘бхӯтапуббам̣, бхиккхаве, даса̄раха̄нам̣ а̄нако [а̄н̣ако (сӣ.)] на̄ма мудин̇го ахоси. тасса даса̄раха̄ а̄наке гхат̣ите ан̃н̃ам̣ а̄н̣им̣ одахим̣су. аху кхо со, бхиккхаве, самайо йам̣ а̄накасса мудин̇гасса пора̄н̣ам̣ поккхарапхалакам̣ антарадха̄йи. а̄н̣исан̇гха̄т̣ова авасисси. евамева кхо, бхиккхаве, бхависсанти бхиккхӯ ана̄гатамаддха̄нам̣, йе те суттанта̄ татха̄гатабха̄сита̄ гамбхӣра̄ гамбхӣраттха̄ локуттара̄ сун̃н̃атаппат̣исам̣йутта̄, тесу бхан̃н̃ама̄несу на суссӯсиссанти на сотам̣ одахиссанти на ан̃н̃а̄ читтам̣ упат̣т̣ха̄пессанти на ча те дхамме уггахетаббам̣ парийа̄пун̣итаббам̣ ман̃н̃иссанти’’.

‘‘йе пана те суттанта̄ кавиката̄ ка̄веййа̄ читтаккхара̄ читтабйан̃джана̄ ба̄хирака̄ са̄вакабха̄сита̄, тесу бхан̃н̃ама̄несу суссӯсиссанти, сотам̣ одахиссанти, ан̃н̃а̄ читтам̣ упат̣т̣ха̄пессанти, те ча дхамме уггахетаббам̣ парийа̄пун̣итаббам̣ ман̃н̃иссанти. еваметесам̣, бхиккхаве, суттанта̄нам̣ татха̄гатабха̄сита̄нам̣ гамбхӣра̄нам̣ гамбхӣраттха̄нам̣ локуттара̄нам̣ сун̃н̃атаппат̣исам̣йутта̄нам̣ антарадха̄нам̣ бхависсати. тасма̄тиха, бхиккхаве, евам̣ сиккхитаббам̣ – ‘йе те суттанта̄ татха̄гатабха̄сита̄ гамбхӣра̄ гамбхӣраттха̄ локуттара̄ сун̃н̃атаппат̣исам̣йутта̄, тесу бхан̃н̃ама̄несу суссӯсисса̄ма, сотам̣ одахисса̄ма, ан̃н̃а̄ читтам̣ упат̣т̣ха̄песса̄ма, те ча дхамме уггахетаббам̣ парийа̄пун̣итаббам̣ ман̃н̃исса̄ма̄’ти. еван̃хи во, бхиккхаве, сиккхитабба’’нти. саттамам̣.