4. чатуттхавагго

1. бхиндисуттам̣

180. са̄ваттхийам̣ вихарати…пе… ‘‘да̄рун̣о, бхиккхаве, ла̄бхасакка̄расилоко. ла̄бхасакка̄расилокена абхибхӯто парийа̄дин̣н̣ачитто, бхиккхаве, девадатто сан̇гхам̣ бхинди. евам̣ да̄рун̣о кхо, бхиккхаве, ла̄бхасакка̄расилоко…пе… сиккхитабба’’нти. пат̣хамам̣.

2. кусаламӯласуттам̣

181. са̄ваттхийам̣ вихарати…пе… ‘‘да̄рун̣о, бхиккхаве, ла̄бхасакка̄расилоко. ла̄бхасакка̄расилокена абхибхӯтасса парийа̄дин̣н̣ачиттасса, бхиккхаве, девадаттасса кусаламӯлам̣ самуччхедамагама̄. евам̣ да̄рун̣о кхо, бхиккхаве, ла̄бхасакка̄расилоко…пе… сиккхитабба’’нти. дутийам̣.

3. кусаладхаммасуттам̣

182. са̄ваттхийам̣ вихарати…пе… ‘‘да̄рун̣о, бхиккхаве, ла̄бхасакка̄расилоко. ла̄бхасакка̄расилокена абхибхӯтасса парийа̄дин̣н̣ачиттасса, бхиккхаве, девадаттасса кусало дхаммо самуччхедамагама̄. евам̣ да̄рун̣о кхо, бхиккхаве, ла̄бхасакка̄расилоко…пе… сиккхитабба’’нти. татийам̣.

4. суккадхаммасуттам̣

183. са̄ваттхийам̣ вихарати…пе… ‘‘да̄рун̣о, бхиккхаве, ла̄бхасакка̄расилоко. ла̄бхасакка̄расилокена абхибхӯтасса парийа̄дин̣н̣ачиттасса, бхиккхаве, девадаттасса сукко дхаммо самуччхедамагама̄. евам̣ да̄рун̣о кхо, бхиккхаве, ла̄бхасакка̄расилоко…пе… сиккхитабба’’нти. чатуттхам̣.

5. ачирапаккантасуттам̣

184. екам̣ самайам̣ бхагава̄ ра̄джагахе вихарати гиджджхакӯт̣е паббате ачирапакканте девадатте. татра кхо бхагава̄ девадаттам̣ а̄раббха бхиккхӯ а̄мантеси – ‘‘аттавадха̄йа, бхиккхаве, девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди’’.

‘‘сеййатха̄пи, бхиккхаве, кадалӣ аттавадха̄йа пхалам̣ дети, пара̄бхава̄йа пхалам̣ дети; евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди.

‘‘сеййатха̄пи, бхиккхаве, вел̣у аттавадха̄йа пхалам̣ дети, пара̄бхава̄йа пхалам̣ дети; евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди.

‘‘сеййатха̄пи, бхиккхаве, нал̣о аттавадха̄йа пхалам̣ дети, пара̄бхава̄йа пхалам̣ дети; евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди.

‘‘сеййатха̄пи, бхиккхаве, ассатарӣ аттавадха̄йа габбхам̣ ган̣ха̄ти, пара̄бхава̄йа габбхам̣ ган̣ха̄ти; евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди. евам̣ да̄рун̣о кхо, бхиккхаве, ла̄бхасакка̄расилоко. еван̃хи во, бхиккхаве, сиккхитабба’’нти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘пхалам̣ ве кадалим̣ ханти, пхалам̣ вел̣ум̣ пхалам̣ нал̣ам̣;

сакка̄ро ка̄пурисам̣ ханти, габбхо ассатарим̣ йатха̄ти’’. пан̃чамам̣;

6. пан̃чаратхасатасуттам̣

185. ра̄джагахе вихарати вел̣уване каландаканива̄пе. тена кхо пана самайена девадаттасса аджа̄тасаттукума̄ро пан̃чахи ратхасатехи са̄йам̣ па̄там̣ упат̣т̣ха̄нам̣ гаччхати, пан̃ча ча тха̄липа̄касата̄ни бхатта̄бхиха̄ро абхихарӣйати. атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘девадаттасса, бханте, аджа̄тасаттукума̄ро пан̃чахи ратхасатехи са̄йам̣ па̄там̣ упат̣т̣ха̄нам̣ гаччхати, пан̃ча ча тха̄липа̄касата̄ни бхатта̄бхиха̄ро абхихарӣйатӣ’’ти. ‘‘ма̄, бхиккхаве, девадаттасса ла̄бхасакка̄расилокам̣ пихайиттха. йа̄вакӣван̃ча, бхиккхаве, девадаттасса аджа̄тасаттукума̄ро пан̃чахи ратхасатехи са̄йам̣ па̄там̣ упат̣т̣ха̄нам̣ гамиссати, пан̃ча ча тха̄липа̄касата̄ни бхатта̄бхиха̄ро а̄харӣйиссати, ха̄нийева, бхиккхаве, девадаттасса па̄т̣икан̇кха̄ кусалесу дхаммесу, но вуддхи’’.

‘‘сеййатха̄пи, бхиккхаве, чан̣д̣асса куккурасса на̄са̄йа питтам̣ бхиндеййум̣, еван̃хи со, бхиккхаве, куккуро бхиййосоматта̄йа чан̣д̣атаро асса; евамева, бхиккхаве, йа̄вакӣван̃ча девадаттасса аджа̄тасаттукума̄ро пан̃чахи ратхасатехи са̄йам̣ па̄там̣ упат̣т̣ха̄нам̣ гамиссати, пан̃ча ча тха̄липа̄касата̄ни бхатта̄бхиха̄ро а̄харӣйиссати, ха̄нийева, бхиккхаве, девадаттасса па̄т̣икан̇кха̄ кусалесу дхаммесу, но вуддхи. евам̣ да̄рун̣о кхо, бхиккхаве, ла̄бхасакка̄расилоко…пе… еван̃хи во, бхиккхаве, сиккхитабба’’нти. чхат̣т̣хам̣.

7. ма̄тусуттам̣

186. са̄ваттхийам̣ вихарати…пе… ‘‘да̄рун̣о, бхиккхаве, ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа. идха̄хам̣, бхиккхаве, екаччам̣ пуггалам̣ евам̣ четаса̄ чето паричча паджа̄на̄ми – ‘на ча̄йама̄йасма̄ ма̄тупи хету сампаджа̄намуса̄ бха̄сеййа̄’ти. таменам̣ пасса̄ми апарена самайена ла̄бхасакка̄расилокена абхибхӯтам̣ парийа̄дин̣н̣ачиттам̣ сампаджа̄намуса̄ бха̄сантам̣. евам̣ да̄рун̣о кхо, бхиккхаве, ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа. тасма̄тиха, бхиккхаве, евам̣ сиккхитаббам̣ – ‘уппаннам̣ ла̄бхасакка̄расилокам̣ паджахисса̄ма. на ча но уппанно ла̄бхасакка̄расилоко читтам̣ парийа̄да̄йа т̣хассатӣ’ти. еван̃хи во, бхиккхаве, сиккхитабба’’нти. саттамам̣.

8-13. питусутта̄дичхаккам̣

187. са̄ваттхийам̣ вихарати…пе… ‘‘да̄рун̣о, бхиккхаве, ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа. идха̄хам̣, бхиккхаве, екаччам̣ пуггалам̣ евам̣ четаса̄ чето паричча паджа̄на̄ми – ‘на ча̄йама̄йасма̄ питупи хету…пе… бха̄тупи хету… бхагинийа̄пи хету… путтассапи хету… дхӣтуйа̄пи хету… паджа̄патийа̄пи хету сампаджа̄намуса̄ бха̄сеййа̄’ти. таменам̣ пасса̄ми апарена самайена ла̄бхасакка̄расилокена абхибхӯтам̣ парийа̄дин̣н̣ачиттам̣ сампаджа̄намуса̄ бха̄сантам̣. евам̣ да̄рун̣о кхо, бхиккхаве, ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа. тасма̄тиха, бхиккхаве, евам̣ сиккхитаббам̣ – ‘уппаннам̣ ла̄бхасакка̄расилокам̣ паджахисса̄ма, на ча но уппанно ла̄бхасакка̄расилоко читтам̣ парийа̄да̄йа т̣хассатӣ’ти. еван̃хи во, бхиккхаве, сиккхитабба’’нти. терасамам̣.

чатуттхо вагго.

тассудда̄нам̣ –

бхинди мӯлам̣ дуве дхамма̄, паккантам̣ ратха ма̄тари;

пита̄ бха̄та̄ ча бхагинӣ, путто дхӣта̄ паджа̄патӣти.

ла̄бхасакка̄расам̣йуттам̣ саматтам̣.