2. бал̣исасуттам̣

158. са̄ваттхийам̣ вихарати…пе… ‘‘да̄рун̣о, бхиккхаве, ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа. сеййатха̄пи, бхиккхаве, ба̄л̣исико а̄мисагатам̣ бал̣исам̣ гамбхӣре удакарахаде паккхипеййа. таменам̣ ан̃н̃атаро а̄мисачаккху маччхо гилеййа. еван̃хи со, бхиккхаве, маччхо гилабал̣исо ба̄л̣исикасса анайам̣ а̄панно бйасанам̣ а̄панно йатха̄ка̄макаран̣ӣйо ба̄л̣исикасса’’.

‘‘ба̄л̣исикоти кхо, бхиккхаве, ма̄рассетам̣ па̄пимато адхивачанам̣. бал̣исанти кхо, бхиккхаве, ла̄бхасакка̄расилокассетам̣ адхивачанам̣. йо хи кочи, бхиккхаве, бхиккху уппаннам̣ ла̄бхасакка̄расилокам̣ асса̄дети ника̄мети, айам̣ вуччати, бхиккхаве, бхиккху гилабал̣исо ма̄расса анайам̣ а̄панно бйасанам̣ а̄панно йатха̄ка̄макаран̣ӣйо па̄пимато. евам̣ да̄рун̣о кхо, бхиккхаве, ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа. тасма̄тиха, бхиккхаве, евам̣ сиккхитаббам̣ – ‘уппаннам̣ ла̄бхасакка̄расилокам̣ паджахисса̄ма, на ча но уппанно ла̄бхасакка̄расилоко читтам̣ парийа̄да̄йа т̣хассатӣ’ти. еван̃хи во, бхиккхаве, сиккхитабба’’нти. дутийам̣.