13. саддхаммаппатирӯпакасуттам̣

156. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо а̄йасма̄ маха̄кассапо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ маха̄кассапо бхагавантам̣ етадавоча – ‘‘ко ну кхо, бханте, хету ко паччайо, йена пуббе аппатара̄ни чева сиккха̄пада̄ни ахесум̣ бахутара̄ ча бхиккхӯ ан̃н̃а̄йа сан̣т̣хахим̣су? ко пана, бханте, хету ко паччайо, йенетарахи бахутара̄ни чева сиккха̄пада̄ни аппатара̄ ча бхиккхӯ ан̃н̃а̄йа сан̣т̣хахантӣ’’ти? ‘‘еван̃четам̣, кассапа, хоти саттесу ха̄йама̄несу саддхамме антарадха̄йама̄не, бахутара̄ни чева сиккха̄пада̄ни хонти аппатара̄ ча бхиккхӯ ан̃н̃а̄йа сан̣т̣хаханти. на та̄ва, кассапа, саддхаммасса антарадха̄нам̣ хоти йа̄ва на саддхаммаппатирӯпакам̣ локе уппаджджати. йато ча кхо, кассапа, саддхаммаппатирӯпакам̣ локе уппаджджати, атха саддхаммасса антарадха̄нам̣ хоти’’.

‘‘сеййатха̄пи, кассапа, на та̄ва джа̄тарӯпасса антарадха̄нам̣ хоти йа̄ва на джа̄тарӯпаппатирӯпакам̣ локе уппаджджати. йато ча кхо, кассапа, джа̄тарӯпаппатирӯпакам̣ локе уппаджджати, атха джа̄тарӯпасса антарадха̄нам̣ хоти. евамева кхо, кассапа, на та̄ва саддхаммасса антарадха̄нам̣ хоти йа̄ва на саддхаммаппатирӯпакам̣ локе уппаджджати. йато ча кхо, кассапа, саддхаммаппатирӯпакам̣ локе уппаджджати, атха саддхаммасса антарадха̄нам̣ хоти.

‘‘на кхо, кассапа, патхавӣдха̄ту саддхаммам̣ антарадха̄пети, на а̄подха̄ту саддхаммам̣ антарадха̄пети, на теджодха̄ту саддхаммам̣ антарадха̄пети, на ва̄йодха̄ту саддхаммам̣ антарадха̄пети; атха кхо идхева те уппаджджанти могхапуриса̄ йе имам̣ саддхаммам̣ антарадха̄пенти. сеййатха̄пи, кассапа, на̄ва̄ а̄дикенева опилавати; на кхо, кассапа, евам̣ саддхаммасса антарадха̄нам̣ хоти.

‘‘пан̃ча кхоме, кассапа, оккаманийа̄ дхамма̄ саддхаммасса саммоса̄йа антарадха̄на̄йа сам̣ваттанти. катаме пан̃ча? идха, кассапа, бхиккхӯ бхиккхунийо упа̄сака̄ упа̄сика̄йо саттхари ага̄рава̄ вихаранти аппатисса̄, дхамме ага̄рава̄ вихаранти аппатисса̄, сан̇гхе ага̄рава̄ вихаранти аппатисса̄, сиккха̄йа ага̄рава̄ вихаранти аппатисса̄, сама̄дхисмим̣ ага̄рава̄ вихаранти аппатисса̄ – име кхо, кассапа, пан̃ча оккаманийа̄ дхамма̄ саддхаммасса саммоса̄йа антарадха̄на̄йа сам̣ваттанти.

‘‘пан̃ча кхоме, кассапа, дхамма̄ саддхаммасса т̣хитийа̄ асаммоса̄йа анантарадха̄на̄йа сам̣ваттанти. катаме пан̃ча? идха, кассапа, бхиккхӯ бхиккхунийо упа̄сака̄ упа̄сика̄йо саттхари сага̄рава̄ вихаранти саппатисса̄, дхамме сага̄рава̄ вихаранти саппатисса̄, сан̇гхе сага̄рава̄ вихаранти саппатисса̄, сиккха̄йа сага̄рава̄ вихаранти саппатисса̄, сама̄дхисмим̣ сага̄рава̄ вихаранти саппатисса̄ – име кхо, кассапа, пан̃ча дхамма̄ саддхаммасса т̣хитийа̄ асаммоса̄йа анантарадха̄на̄йа сам̣ваттантӣ’’ти. терасамам̣.

кассапасам̣йуттам̣ саматтам̣.