6. сага̄тха̄суттам̣

100. са̄ваттхийам̣ вихарати…пе… ‘‘дха̄тусова, бхиккхаве, сатта̄ сам̣санданти саменти. хӣна̄дхимуттика̄ хӣна̄дхимуттикехи саддхим̣ сам̣санданти саменти. атӣтампи кхо, бхиккхаве, аддха̄нам̣ дха̄тусова сатта̄ сам̣сандим̣су самим̣су. хӣна̄дхимуттика̄ хӣна̄дхимуттикехи саддхим̣ сам̣сандим̣су самим̣су’’.

‘‘ана̄гатампи кхо, бхиккхаве, аддха̄нам̣ дха̄тусова сатта̄ сам̣сандиссанти самессанти. хӣна̄дхимуттика̄ хӣна̄дхимуттикехи саддхим̣ сам̣сандиссанти самессанти.

‘‘етарахипи кхо, бхиккхаве, паччуппаннам̣ аддха̄нам̣ дха̄тусова сатта̄ сам̣санданти саменти. хӣна̄дхимуттика̄ хӣна̄дхимуттикехи саддхим̣ сам̣санданти саменти.

‘‘сеййатха̄пи, бхиккхаве, гӯтхо гӯтхена сам̣сандати самети; муттам̣ муттена сам̣сандати самети; кхел̣о кхел̣ена сам̣сандати самети; пуббо пуббена сам̣сандати самети; лохитам̣ лохитена сам̣сандати самети; евамева кхо, бхиккхаве, дха̄тусова [саббаттхапи евамева диссати] сатта̄ сам̣санданти саменти. хӣна̄дхимуттика̄ хӣна̄дхимуттикехи саддхим̣ сам̣санданти саменти. атӣтампи кхо аддха̄нам̣…пе… ана̄гатампи кхо аддха̄нам̣…пе… етарахипи кхо паччуппаннам̣ аддха̄нам̣ дха̄тусова сатта̄ сам̣санданти саменти. хӣна̄дхимуттика̄ хӣна̄дхимуттикехи саддхим̣ сам̣санданти саменти.

‘‘дха̄тусова бхиккхаве, сатта̄ сам̣санданти саменти. калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣санданти саменти. атӣтампи кхо, бхиккхаве, аддха̄нам̣ дха̄тусова сатта̄ сам̣сандим̣су самим̣су. калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣сандим̣су самим̣су.

‘‘ана̄гатампи кхо, бхиккхаве, аддха̄нам̣…пе… етарахипи кхо, бхиккхаве, паччуппаннам̣ аддха̄нам̣ дха̄тусова сатта̄ сам̣санданти саменти. калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣санданти саменти.

‘‘сеййатха̄пи, бхиккхаве, кхӣрам̣ кхӣрена сам̣сандати самети; телам̣ телена сам̣сандати самети; саппи саппина̄ сам̣сандати самети; мадху мадхуна̄ сам̣сандати самети; пха̄н̣итам̣ пха̄н̣итена сам̣сандати самети; евамева кхо, бхиккхаве, дха̄тусова сатта̄ сам̣санданти саменти. калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣санданти саменти. атӣтампи кхо аддха̄нам̣… ана̄гатампи кхо аддха̄нам̣… етарахипи кхо паччуппаннам̣ аддха̄нам̣ дха̄тусова сатта̄ сам̣санданти саменти. калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣санданти саментӣ’’ти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘сам̣сагга̄ ванатхо джа̄то, асам̣саггена чхиджджати;

париттам̣ да̄рума̄руйха, йатха̄ сӣде махан̣н̣аве.

‘‘евам̣ кусӣтама̄гамма, са̄дхуджӣвипи сӣдати;

тасма̄ там̣ париваджджеййа, кусӣтам̣ хӣнавӣрийам̣.

‘‘павивиттехи арийехи, пахитаттехи джха̄йӣхи [джха̄йихи (сӣ.), джха̄йибхи (сйа̄. кам̣.)];

ниччам̣ а̄раддхавӣрийехи, пан̣д̣итехи саха̄васе’’ти.