5. чан̇камасуттам̣

99. екам̣ самайам̣ бхагава̄ ра̄джагахе вихарати гиджджхакӯт̣е паббате. тена кхо пана самайена а̄йасма̄ са̄рипутто самбахулехи бхиккхӯхи саддхим̣ бхагавато авидӯре чан̇камати; а̄йасма̄пи кхо маха̄моггалла̄но самбахулехи бхиккхӯхи саддхим̣ бхагавато авидӯре чан̇камати; а̄йасма̄пи кхо маха̄кассапо самбахулехи бхиккхӯхи саддхим̣ бхагавато авидӯре чан̇камати; а̄йасма̄пи кхо ануруддхо самбахулехи бхиккхӯхи саддхим̣ бхагавато авидӯре чан̇камати; а̄йасма̄пи кхо пун̣н̣о манта̄нипутто самбахулехи бхиккхӯхи саддхим̣ бхагавато авидӯре чан̇камати; а̄йасма̄пи кхо упа̄ли самбахулехи бхиккхӯхи саддхим̣ бхагавато авидӯре чан̇камати; а̄йасма̄пи кхо а̄нандо самбахулехи бхиккхӯхи саддхим̣ бхагавато авидӯре чан̇камати; девадаттопи кхо самбахулехи бхиккхӯхи саддхим̣ бхагавато авидӯре чан̇камати.

атха кхо бхагава̄ бхиккхӯ а̄мантеси – ‘‘пассатха но тумхе, бхиккхаве, са̄рипуттам̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ маха̄пан̃н̃а̄. пассатха но тумхе, бхиккхаве, моггалла̄нам̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ махиддхика̄. пассатха но тумхе, бхиккхаве, кассапам̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ дхутава̄да̄. пассатха но тумхе, бхиккхаве, ануруддхам̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ диббачаккхука̄. пассатха но тумхе, бхиккхаве, пун̣н̣ам̣ манта̄нипуттам̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ дхаммакатхика̄. пассатха но тумхе, бхиккхаве, упа̄лим̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ винайадхара̄. пассатха но тумхе, бхиккхаве, а̄нандам̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ бахуссута̄. пассатха но тумхе, бхиккхаве, девадаттам̣ самбахулехи бхиккхӯхи саддхим̣ чан̇каманта’’нти? ‘‘евам̣, бханте’’. ‘‘саббе кхо ете, бхиккхаве, бхиккхӯ па̄пиччха̄’’.

‘‘дха̄тусова, бхиккхаве, сатта̄ сам̣санданти саменти. хӣна̄дхимуттика̄ хӣна̄дхимуттикехи саддхим̣ сам̣санданти саменти; калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣санданти саменти. атӣтампи кхо, бхиккхаве, аддха̄нам̣ дха̄тусова сатта̄ сам̣сандим̣су самим̣су. хӣна̄дхимуттика̄ хӣна̄дхимуттикехи саддхим̣ сам̣сандим̣су самим̣су; калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣сандим̣су самим̣су.

‘‘ана̄гатампи кхо, бхиккхаве, аддха̄нам̣ дха̄тусова сатта̄ сам̣сандиссанти самессанти. хӣна̄дхимуттика̄ хӣна̄дхимуттикехи саддхим̣ сам̣сандиссанти самессанти; калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣сандиссанти самессанти.

‘‘етарахипи кхо, бхиккхаве, паччуппаннам̣ аддха̄нам̣ дха̄тусова сатта̄ сам̣санданти саменти. хӣна̄дхимуттика̄ хӣна̄дхимуттикехи саддхим̣ сам̣санданти саменти; калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣санданти саментӣ’’ти. пан̃чамам̣.