11. татийапаббатасуттам̣

84. са̄ваттхийам̣ вихарати…пе… ‘‘сеййатха̄пи, бхиккхаве, пурисо синерусса паббатара̄джасса сатта муггаматтийо па̄са̄н̣асаккхара̄ упаниккхипеййа. там̣ ким̣ ман̃н̃атха, бхиккхаве, катамам̣ ну кхо бахутарам̣, йа̄ ва̄ сатта муггаматтийо па̄са̄н̣асаккхара̄ упаниккхитта̄ йо ва̄ синеру [упаниккхитта̄, синеру ва̄ (сӣ.)] паббатара̄джа̄’’ти?

‘‘етадева, бханте, бахутарам̣ йадидам̣ синеру паббатара̄джа̄; аппаматтика̄ сатта муггаматтийо па̄са̄н̣асаккхара̄ упаниккхитта̄. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти синерум̣ паббатара̄джа̄нам̣ упанидха̄йа сатта муггаматтийо па̄са̄н̣асаккхара̄ упаниккхитта̄’’ти. ‘‘евамева кхо, бхиккхаве, арийаса̄вакасса дит̣т̣хисампаннасса пуггаласса адхигамам̣ упанидха̄йа ан̃н̃атиттхийасаман̣абра̄хман̣апарибба̄джака̄нам̣ адхигамо нева сатимам̣ калам̣ упети на сахассимам̣ калам̣ упети на сатасахассимам̣ калам̣ упети. евам̣ маха̄дхигамо, бхиккхаве, дит̣т̣хисампанно пуггало, евам̣ маха̄бхин̃н̃о’’ти. ека̄дасамам̣.

абхисамайасам̣йуттам̣ саматтам̣.