2. абхисамайасам̣йуттам̣

1. накхасикха̄суттам̣

74. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо бхагава̄ париттам̣ накхасикха̄йам̣ пам̣сум̣ а̄ропетва̄ бхиккхӯ а̄мантеси – ‘‘там̣ ким̣ ман̃н̃атха, бхиккхаве, катамам̣ ну кхо бахутарам̣, йо ва̄йам̣ [йо ча̄йам̣ (саббаттха) дутийасутта̄дӣсу пана ва̄саддойева диссати] майа̄ паритто накхасикха̄йам̣ пам̣су а̄ропито, айам̣ ва̄ маха̄патхавӣ’’ти?

‘‘етадева, бханте, бахутарам̣, йадидам̣ маха̄патхавӣ. аппаматтако бхагавата̄ паритто накхасикха̄йам̣ пам̣су а̄ропито. нева сатимам̣ калам̣ упети на сахассимам̣ калам̣ упети на сатасахассимам̣ калам̣ упети маха̄патхавим̣ упанидха̄йа бхагавата̄ паритто накхасикха̄йам̣ пам̣су а̄ропито’’ти. ‘‘евамева кхо, бхиккхаве, арийаса̄вакасса дит̣т̣хисампаннасса пуггаласса абхисамета̄вино етадева бахутарам̣ дуккхам̣ йадидам̣ париккхӣн̣ам̣ парийа̄дин̣н̣ам̣; аппаматтакам̣ авасит̣т̣хам̣. нева сатимам̣ калам̣ упети на сахассимам̣ калам̣ упети на сатасахассимам̣ калам̣ упети пуримам̣ дуккхаккхандхам̣ париккхӣн̣ам̣ парийа̄дин̣н̣ам̣ упанидха̄йа йадидам̣ саттаккхаттум̣парамата̄. евам̣ махаттхийо кхо, бхиккхаве, дхамма̄бхисамайо; евам̣ махаттхийо дхаммачаккхупат̣ила̄бхо’’ти. пат̣хамам̣.

2. поккхаран̣ӣсуттам̣

75. са̄ваттхийам̣ вихарати…пе… ‘‘сеййатха̄пи, бхиккхаве, поккхаран̣ӣ пан̃н̃а̄сайоджана̄ни а̄йа̄мена пан̃н̃а̄сайоджана̄ни виттха̄рена пан̃н̃а̄сайоджана̄ни уббедхена, пун̣н̣а̄ удакасса саматиттика̄ ка̄капеййа̄. тато пурисо кусаггена удакам̣ уддхареййа. там̣ ким̣ ман̃н̃атха, бхиккхаве, катамам̣ ну кхо бахутарам̣, йам̣ ва̄ кусаггена удакам̣ уббхатам̣ йам̣ ва̄ поккхаран̣ийа̄ удака’’нти?

‘‘етадева, бханте, бахутарам̣, йадидам̣ поккхаран̣ийа̄ удакам̣. аппаматтакам̣ кусаггена удакам̣ уббхатам̣. нева сатимам̣ калам̣ упети на сахассимам̣ калам̣ упети на сатасахассимам̣ калам̣ упети поккхаран̣ийа̄ удакам̣ упанидха̄йа кусаггена удакам̣ уббхата’’нти. ‘‘евамева кхо, бхиккхаве, арийаса̄вакасса дит̣т̣хисампаннасса пуггаласса абхисамета̄вино етадева бахутарам̣ дуккхам̣ йадидам̣ париккхӣн̣ам̣ парийа̄дин̣н̣ам̣; аппаматтакам̣ авасит̣т̣хам̣. нева сатимам̣ калам̣ упети на сахассимам̣ калам̣ упети на сатасахассимам̣ калам̣ упети пуримам̣ дуккхаккхандхам̣ париккхӣн̣ам̣ парийа̄дин̣н̣ам̣ упанидха̄йа, йадидам̣ саттаккхаттум̣парамата̄. евам̣ махаттхийо кхо, бхиккхаве, дхамма̄бхисамайо; евам̣ махаттхийо дхаммачаккхупат̣ила̄бхо’’ти. дутийам̣.

3. самбхеджджаудакасуттам̣

76. са̄ваттхийам̣ вихарати…пе… ‘‘сеййатха̄пи, бхиккхаве, йаттхима̄ маха̄надийо сам̣санданти саменти, сеййатхидам̣ – ган̇га̄ йамуна̄ ачираватӣ сарабхӯ махӣ, тато пурисо две ва̄ тӣн̣и ва̄ удакапхусита̄ни уддхареййа. там̣ ким̣ ман̃н̃атха, бхиккхаве, катамам̣ ну кхо бахутарам̣, йа̄ни ва̄ две ва̄ тӣн̣и ва̄ удакапхусита̄ни уббхата̄ни йам̣ ва̄ самбхеджджаудака’’нти?

‘‘етадева, бханте, бахутарам̣ йадидам̣ самбхеджджаудакам̣; аппаматтака̄ни две ва̄ тӣн̣и ва̄ удакапхусита̄ни уббхата̄ни. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти самбхеджджаудакам̣ упанидха̄йа две ва̄ тӣн̣и ва̄ удакапхусита̄ни уббхата̄нӣ’’ти. ‘‘евамева кхо, бхиккхаве…пе… дхаммачаккхупат̣ила̄бхо’’ти. татийам̣.

4. дутийасамбхеджджаудакасуттам̣

77. са̄ваттхийам̣ вихарати…пе… ‘‘сеййатха̄пи, бхиккхаве, йаттхима̄ маха̄надийо сам̣санданти саменти, сеййатхидам̣ – ган̇га̄ йамуна̄ ачираватӣ сарабхӯ махӣ, там̣ удакам̣ париккхайам̣ парийа̄да̄нам̣ гаччхеййа т̣хапетва̄ две ва̄ тӣн̣и ва̄ удакапхусита̄ни. там̣ ким̣ ман̃н̃атха, бхиккхаве, катамам̣ ну кхо бахутарам̣, йам̣ ва̄ самбхеджджаудакам̣ париккхӣн̣ам̣ парийа̄дин̣н̣ам̣ йа̄ни ва̄ две ва̄ тӣн̣и ва̄ удакапхусита̄ни авасит̣т̣ха̄нӣ’’ти?

‘‘етадева, бханте, бахутарам̣ самбхеджджаудакам̣ йадидам̣ париккхӣн̣ам̣ парийа̄дин̣н̣ам̣; аппаматтака̄ни две ва̄ тӣн̣и ва̄ удакапхусита̄ни авасит̣т̣ха̄ни. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти самбхеджджаудакам̣ париккхӣн̣ам̣ парийа̄дин̣н̣ам̣ упанидха̄йа две ва̄ тӣн̣и ва̄ удакапхусита̄ни авасит̣т̣ха̄нӣ’’ти. ‘‘евамева кхо, бхиккхаве…пе… дхаммачаккхупат̣ила̄бхо’’ти. чатуттхам̣.

5. патхавӣсуттам̣

78. са̄ваттхийам̣ вихарати…пе… ‘‘сеййатха̄пи, бхиккхаве, пурисо маха̄патхавийа̄ сатта колат̣т̣химаттийо гул̣ика̄ упаниккхипеййа. там̣ ким̣ ман̃н̃атха, бхиккхаве, катамам̣ ну кхо бахутарам̣, йа̄ ва̄ сатта колат̣т̣химаттийо гул̣ика̄ упаниккхитта̄ айам̣ [йа̄ (сйа̄. ка.)] ва̄ маха̄патхавӣ’’ти?

‘‘етадева, бханте, бахутарам̣, йадидам̣ маха̄патхавӣ; аппаматтика̄ сатта колат̣т̣химаттийо гул̣ика̄ упаниккхитта̄. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти маха̄патхавим̣ упанидха̄йа сатта колат̣т̣химаттийо гул̣ика̄ упаниккхитта̄’’ти. ‘‘евамева кхо, бхиккхаве…пе… дхаммачаккхупат̣ила̄бхо’’ти. пан̃чамам̣.

6. дутийапатхавӣсуттам̣

79. са̄ваттхийам̣ вихарати…пе… ‘‘сеййатха̄пи, бхиккхаве, маха̄патхавӣ париккхайам̣ парийа̄да̄нам̣ гаччхеййа, т̣хапетва̄ сатта колат̣т̣химаттийо гул̣ика̄. там̣ ким̣ ман̃н̃атха, бхиккхаве, катамам̣ ну кхо бахутарам̣, йам̣ ва̄ маха̄патхавийа̄ париккхӣн̣ам̣ парийа̄дин̣н̣ам̣ йа̄ ва̄ сатта колат̣т̣химаттийо гул̣ика̄ авасит̣т̣ха̄’’ти?

‘‘етадева бханте, бахутарам̣, маха̄патхавийа̄, йадидам̣ париккхӣн̣ам̣ парийа̄дин̣н̣ам̣; аппаматтика̄ сатта колат̣т̣химаттийо гул̣ика̄ авасит̣т̣ха̄. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти маха̄патхавийа̄ париккхӣн̣ам̣ парийа̄дин̣н̣ам̣ упанидха̄йа сатта колат̣т̣химаттийо гул̣ика̄ авасит̣т̣ха̄’’ти. ‘‘евамева кхо, бхиккхаве…пе… дхаммачаккхупат̣ила̄бхо’’ти. чхат̣т̣хам̣.

7. самуддасуттам̣

80. са̄ваттхийам̣ вихарати…пе… ‘‘сеййатха̄пи, бхиккхаве, пурисо маха̄самуддато две ва̄ тӣн̣и ва̄ удакапхусита̄ни уддхареййа. там̣ ким̣ ман̃н̃атха, бхиккхаве, катамам̣ ну кхо бахутарам̣, йа̄ни ва̄ две ва̄ тӣн̣и ва̄ удакапхусита̄ни уббхата̄ни йам̣ ва̄ маха̄самудде удака’’нти?

‘‘етадева, бханте, бахутарам̣, йадидам̣ маха̄самудде удакам̣; аппаматтака̄ни две ва̄ тӣн̣и ва̄ удакапхусита̄ни уббхата̄ни. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти маха̄самудде удакам̣ упанидха̄йа две ва̄ тӣн̣и ва̄ удакапхусита̄ни уббхата̄нӣ’’ти. ‘‘евамева кхо, бхиккхаве…пе… дхаммачаккхупат̣ила̄бхо’’ти. саттамам̣.

8. дутийасамуддасуттам̣

81. са̄ваттхийам̣ вихарати…пе… ‘‘сеййатха̄пи, бхиккхаве, маха̄самуддо париккхайам̣ парийа̄да̄нам̣ гаччхеййа, т̣хапетва̄ две ва̄ тӣн̣и ва̄ удакапхусита̄ни. там̣ ким̣ ман̃н̃атха, бхиккхаве, катамам̣ ну кхо бахутарам̣, йам̣ ва̄ маха̄самудде удакам̣ париккхӣн̣ам̣ парийа̄диннам̣ йа̄ни ва̄ две ва̄ тӣн̣и ва̄ удакапхусита̄ни авасит̣т̣ха̄нӣ’’ти?

‘‘етадева, бханте, бахутарам̣ маха̄самудде удакам̣, йадидам̣ париккхӣн̣ам̣ парийа̄дин̣н̣ам̣; аппаматтака̄ни две ва̄ тӣн̣и ва̄ удакапхусита̄ни авасит̣т̣ха̄ни. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти маха̄самудде удакам̣ париккхӣн̣ам̣ парийа̄дин̣н̣ам̣ упанидха̄йа две ва̄ тӣн̣и ва̄ удакапхусита̄ни авасит̣т̣ха̄нӣ’’ти. ‘‘евамева кхо бхиккхаве…пе… дхаммачаккхупат̣ила̄бхо’’ти. ат̣т̣хамам̣.

9. паббатасуттам̣

82. са̄ваттхийам̣ вихарати…пе… ‘‘сеййатха̄пи, бхиккхаве, пурисо химавато паббатара̄джасса сатта са̄сапаматтийо па̄са̄н̣асаккхара̄ упаниккхипеййа. там̣ ким̣ ман̃н̃атха, бхиккхаве, катамам̣ ну кхо бахутарам̣, йа̄ ва̄ сатта са̄сапаматтийо па̄са̄н̣асаккхара̄ упаниккхитта̄ йо ва̄ химава̄ [упаниккхитта̄, химава̄ ва̄ (сӣ.)] паббатара̄джа̄’’ти?

‘‘етадева, бханте, бахутарам̣ йадидам̣ химава̄ паббатара̄джа̄; аппаматтика̄ сатта са̄сапаматтийо па̄са̄н̣асаккхара̄ упаниккхитта̄. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти химавантам̣ паббатара̄джа̄нам̣ упанидха̄йа сатта са̄сапаматтийо па̄са̄н̣асаккхара̄ упаниккхитта̄’’ти. ‘‘евамева кхо…пе… дхаммачаккхупат̣ила̄бхо’’ти. навамам̣.

10. дутийапаббатасуттам̣

83. са̄ваттхийам̣ вихарати…пе… ‘‘сеййатха̄пи, бхиккхаве, химава̄ паббатара̄джа̄ париккхайам̣ парийа̄да̄нам̣ гаччхеййа, т̣хапетва̄ сатта са̄сапаматтийо па̄са̄н̣асаккхара̄. там̣ ким̣ ман̃н̃атха, бхиккхаве, катамам̣ ну кхо бахутарам̣, йам̣ ва̄ химавато паббатара̄джасса париккхӣн̣ам̣ парийа̄дин̣н̣ам̣ йа̄ ва̄ сатта са̄сапаматтийо па̄са̄н̣асаккхара̄ авасит̣т̣ха̄’’ти?

‘‘етадева, бханте, бахутарам̣ химавато паббатара̄джасса йадидам̣ париккхӣн̣ам̣ парийа̄дин̣н̣ам̣; аппаматтика̄ сатта са̄сапаматтийо па̄са̄н̣асаккхара̄ авасит̣т̣ха̄. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти химавато паббатара̄джасса париккхӣн̣ам̣ парийа̄дин̣н̣ам̣ упанидха̄йа сатта са̄сапаматтийо па̄са̄н̣асаккхара̄ авасит̣т̣ха̄’’ти.

‘‘евамева кхо, бхиккхаве, арийаса̄вакасса дит̣т̣хисампаннасса пуггаласса абхисамета̄вино етадева бахутарам̣ дуккхам̣ йадидам̣ париккхӣн̣ам̣ парийа̄дин̣н̣ам̣; аппаматтакам̣ авасит̣т̣хам̣. нева сатимам̣ калам̣ упети на сахассимам̣ калам̣ упети на сатасахассимам̣ калам̣ упети пуримам̣ дуккхаккхандхам̣ париккхӣн̣ам̣ парийа̄дин̣н̣ам̣ упанидха̄йа йадидам̣ саттаккхаттум̣парамата̄. евам̣ махаттхийо кхо, бхиккхаве, дхамма̄бхисамайо, евам̣ махаттхийо дхаммачаккхупат̣ила̄бхо’’ти. дасамам̣.

11. татийапаббатасуттам̣

84. са̄ваттхийам̣ вихарати…пе… ‘‘сеййатха̄пи, бхиккхаве, пурисо синерусса паббатара̄джасса сатта муггаматтийо па̄са̄н̣асаккхара̄ упаниккхипеййа. там̣ ким̣ ман̃н̃атха, бхиккхаве, катамам̣ ну кхо бахутарам̣, йа̄ ва̄ сатта муггаматтийо па̄са̄н̣асаккхара̄ упаниккхитта̄ йо ва̄ синеру [упаниккхитта̄, синеру ва̄ (сӣ.)] паббатара̄джа̄’’ти?

‘‘етадева, бханте, бахутарам̣ йадидам̣ синеру паббатара̄джа̄; аппаматтика̄ сатта муггаматтийо па̄са̄н̣асаккхара̄ упаниккхитта̄. нева сатимам̣ калам̣ упенти на сахассимам̣ калам̣ упенти на сатасахассимам̣ калам̣ упенти синерум̣ паббатара̄джа̄нам̣ упанидха̄йа сатта муггаматтийо па̄са̄н̣асаккхара̄ упаниккхитта̄’’ти. ‘‘евамева кхо, бхиккхаве, арийаса̄вакасса дит̣т̣хисампаннасса пуггаласса адхигамам̣ упанидха̄йа ан̃н̃атиттхийасаман̣абра̄хман̣апарибба̄джака̄нам̣ адхигамо нева сатимам̣ калам̣ упети на сахассимам̣ калам̣ упети на сатасахассимам̣ калам̣ упети. евам̣ маха̄дхигамо, бхиккхаве, дит̣т̣хисампанно пуггало, евам̣ маха̄бхин̃н̃о’’ти. ека̄дасамам̣.

абхисамайасам̣йуттам̣ саматтам̣.