6. ануруддхасуттам̣

226. екам̣ самайам̣ а̄йасма̄ ануруддхо косалесу вихарати ан̃н̃атарасмим̣ ванасан̣д̣е. атха кхо ан̃н̃атара̄ та̄ватим̣сака̄йика̄ девата̄ джа̄линӣ на̄ма а̄йасмато ануруддхасса пура̄н̣адутийика̄ йена̄йасма̄ ануруддхо тенупасан̇ками; упасан̇камитва̄ а̄йасмантам̣ ануруддхам̣ га̄тха̄йа аджджхабха̄си –

‘‘таттха читтам̣ пан̣идхехи, йаттха те вуситам̣ пуре;

та̄ватим̣сесу девесу, саббака̄масамиддхису;

пураккхато паривуто, девакан̃н̃а̄хи собхасӣ’’ти.

‘‘дуггата̄ девакан̃н̃а̄йо, сакка̄йасмим̣ патит̣т̣хита̄;

те ча̄пи дуггата̄ сатта̄, девакан̃н̃а̄хи паттхита̄’’ти.

‘‘на те сукхам̣ паджа̄нанти, йе на пассанти нанданам̣;

а̄ва̄сам̣ нарадева̄нам̣, тидаса̄нам̣ йасассина’’нти.

‘‘на твам̣ ба̄ле виджа̄на̄си, йатха̄ арахатам̣ вачо;

аничча̄ саббасан̇кха̄ра̄, уппа̄давайадхаммино;

уппаджджитва̄ нируджджханти, тесам̣ вӯпасамо сукхо.

‘‘наттхи да̄ни пуна̄ва̄со, девака̄йасми джа̄лини;

виккхӣн̣о джа̄тисам̣са̄ро, наттхи да̄ни пунаббхаво’’ти.