3. кассапаготтасуттам̣

223. екам̣ самайам̣ а̄йасма̄ кассапаготто косалесу вихарати ан̃н̃атарасмим̣ ванасан̣д̣е. тена кхо пана самайена а̄йасма̄ кассапаготто дива̄виха̄рагато ан̃н̃атарам̣ чхетам̣ овадати. атха кхо йа̄ тасмим̣ ванасан̣д̣е адхиваттха̄ девата̄ а̄йасмантам̣ кассапаготтам̣ сам̣веджетука̄ма̄ йена̄йасма̄ кассапаготто тенупасан̇ками; упасан̇камитва̄ а̄йасмантам̣ кассапаготтам̣ га̄тха̄хи аджджхабха̄си –

‘‘гиридуггачарам̣ чхетам̣, аппапан̃н̃ам̣ ачетасам̣;

ака̄ле овадам̣ бхиккху, мандова пат̣ибха̄ти мам̣.

‘‘сун̣а̄ти на виджа̄на̄ти, а̄локети на пассати;

дхаммасмим̣ бхан̃н̃ама̄насмим̣, аттхам̣ ба̄ло на буджджхати.

‘‘сачепи даса паджджоте, дха̄райиссаси кассапа;

нева даккхати рӯпа̄ни, чаккху хисса на виджджатӣ’’ти.

атха кхо а̄йасма̄ кассапаготто та̄йа девата̄йа сам̣веджито сам̣вегама̄па̄дӣти.