1. вивекасуттам̣

221. евам̣ ме сутам̣ – екам̣ самайам̣ ан̃н̃атаро бхиккху косалесу вихарати ан̃н̃атарасмим̣ ванасан̣д̣е. тена кхо пана самайена со бхиккху дива̄виха̄рагато па̄паке акусале витакке витаккети геханиссите. атха кхо йа̄ тасмим̣ ванасан̣д̣е адхиваттха̄ девата̄ тасса бхиккхуно анукампика̄ аттхака̄ма̄ там̣ бхиккхум̣ сам̣веджетука̄ма̄ йена со бхиккху тенупасан̇ками; упасан̇камитва̄ там̣ бхиккхум̣ га̄тха̄хи аджджхабха̄си –

‘‘вивекака̄моси ванам̣ павит̣т̣хо,

атха те мано ниччхаратӣ бахиддха̄;

джано джанасмим̣ винайассу чхандам̣,

тато сукхӣ хохиси вӣтара̄го.

‘‘аратим̣ паджаха̄си сато, бхава̄си сатам̣ там̣ са̄райа̄масе;

па̄та̄лараджо хи дуттаро, ма̄ там̣ ка̄мараджо ава̄хари.

‘‘сакун̣о йатха̄ пам̣сукунтхито [пам̣сукун̣т̣хито (ка.), пам̣сукун̣д̣ито (сӣ. сйа̄. кам̣. пӣ.)], видхунам̣ па̄тайати ситам̣ раджам̣;

евам̣ бхиккху падха̄нава̄ сатима̄, видхунам̣ па̄тайати ситам̣ раджа’’нти.

атха кхо со бхиккху та̄йа девата̄йа сам̣веджито сам̣вегама̄па̄дӣти.