8. паросахассасуттам̣

216. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме махата̄ бхиккхусан̇гхена саддхим̣ ад̣д̣хателасехи бхиккхусатехи. тена кхо пана самайена бхагава̄ бхиккхӯ нибба̄напат̣исам̣йутта̄йа дхаммийа̄ катха̄йа сандассети сама̄дапети самуттеджети сампахам̣сети. те ча бхиккхӯ ат̣т̣хим̣ катва̄ манаси катва̄ саббачетаса̄ саманна̄харитва̄ охитасота̄ дхаммам̣ сун̣анти. атха кхо а̄йасмато ван̇гӣсасса етадахоси – ‘‘айам̣ кхо бхагава̄ бхиккхӯ нибба̄напат̣исам̣йутта̄йа дхаммийа̄ катха̄йа сандассети сама̄дапети самуттеджети сампахам̣сети. те ча бхиккхӯ ат̣т̣хим̣ катва̄ манаси катва̄ саббачетаса̄ саманна̄харитва̄ охитасота̄ дхаммам̣ сун̣анти. йам̣нӯна̄хам̣ бхагавантам̣ саммукха̄ са̄руппа̄хи га̄тха̄хи абхиттхавеййа’’нти.

атха кхо а̄йасма̄ ван̇гӣсо ут̣т̣ха̄йа̄сана̄ екам̣сам̣ уттара̄сан̇гам̣ каритва̄ йена бхагава̄ тенан̃джалим̣ пан̣а̄метва̄ бхагавантам̣ етадавоча – ‘‘пат̣ибха̄ти мам̣ бхагава̄, пат̣ибха̄ти мам̣ сугата̄’’ти. ‘‘пат̣ибха̄ту там̣, ван̇гӣса̄’’ти бхагава̄ авоча. атха кхо а̄йасма̄ ван̇гӣсо бхагавантам̣ саммукха̄ са̄руппа̄хи га̄тха̄хи абхиттхави –

‘‘паросахассам̣ бхиккхӯнам̣, сугатам̣ пайирупа̄сати;

десентам̣ вираджам̣ дхаммам̣, нибба̄нам̣ акутобхайам̣.

‘‘сун̣анти дхаммам̣ вималам̣, самма̄самбуддхадеситам̣;

собхати вата самбуддхо, бхиккхусан̇гхапураккхато.

‘‘на̄гана̄моси бхагава̄, исӣнам̣ исисаттамо;

маха̄мегхова хутва̄на, са̄ваке абхивассати.

‘‘дива̄виха̄ра̄ никкхамма, саттхудассанакамйата̄ [саттхудассанака̄мата̄ (сӣ. сйа̄. кам̣.)];

са̄вако те маха̄вӣра, па̄де вандати ван̇гӣсо’’ти.

‘‘ким̣ ну те, ван̇гӣса, има̄ га̄тха̄йо пуббе паривитаккита̄, уда̄ху т̣ха̄насова там̣ пат̣ибхантӣ’’ти? ‘на кхо ме, бханте, има̄ га̄тха̄йо пуббе паривитаккита̄, атха кхо т̣ха̄насова мам̣ пат̣ибхантӣ’ти. ‘тена хи там̣, ван̇гӣса, бхиййосоматта̄йа пуббе апаривитаккита̄ га̄тха̄йо пат̣ибхантӯ’ти. ‘евам̣, бханте’ти кхо а̄йасма̄ ван̇гӣсо бхагавато пат̣иссутва̄ бхиййосоматта̄йа бхагавантам̣ пуббе апаривитаккита̄хи га̄тха̄хи абхиттхави –

‘‘уммаггапатхам̣ [уммаггасатам̣ (сйа̄. кам̣. ка.)] ма̄расса абхибхуййа, чарати пабхиджджа кхила̄ни;

там̣ пассатха бандхапамун̃чакарам̣, аситам̣ бха̄гасо павибхаджам̣.

‘‘огхасса ниттхаран̣аттхам̣, анекавихитам̣ маггам̣ аккха̄си;

тасмин̃че амате аккха̄те, дхаммаддаса̄ т̣хита̄ асам̣хӣра̄.

‘‘паджджотакаро ативиджджха [ативиджджха дхаммам̣ (сӣ. сйа̄. кам̣.)], саббат̣т̣хитӣнам̣ атиккамамаддаса;

н̃атва̄ ча саччхикатва̄ ча, аггам̣ со десайи дасаддха̄нам̣.

‘‘евам̣ судесите дхамме,

ко пама̄до виджа̄натам̣ дхаммам̣ [ко пама̄до виджа̄натам̣ (сӣ. сйа̄. кам̣.)];

тасма̄ хи тасса бхагавато са̄сане;

аппаматто сада̄ намассаманусиккхе’’ти.