3. песаласуттам̣

211. екам̣ самайам̣ а̄йасма̄ ван̇гӣсо а̄л̣авийам̣ вихарати агга̄л̣аве четийе а̄йасмата̄ нигродхакаппена упаджджха̄йена саддхим̣. тена кхо пана самайена а̄йасма̄ ван̇гӣсо аттано пат̣ибха̄нена ан̃н̃е песале бхиккхӯ атиман̃н̃ати. атха кхо а̄йасмато ван̇гӣсасса етадахоси – ‘‘ала̄бха̄ вата ме, на вата ме ла̄бха̄; дулладдхам̣ вата ме, на вата ме суладдхам̣; йва̄хам̣ аттано пат̣ибха̄нена ан̃н̃е песале бхиккхӯ атиман̃н̃а̄мӣ’’ти. атха кхо а̄йасма̄ ван̇гӣсо аттана̄ва аттано виппат̣иса̄рам̣ уппа̄детва̄ та̄йам̣ вела̄йам̣ има̄ га̄тха̄йо абха̄си –

‘‘ма̄нам̣ паджахассу готама, ма̄напатхан̃ча паджахассу;

асесам̣ ма̄напатхасмим̣, самуччхито виппат̣иса̄рӣхува̄ чирараттам̣.

‘‘маккхена маккхита̄ паджа̄, ма̄нахата̄ нирайам̣ папатанти;

сочанти джана̄ чирараттам̣, ма̄нахата̄ нирайам̣ упапанна̄.

‘‘на хи сочати бхиккху када̄чи, маггаджино самма̄пат̣ипанно;

киттин̃ча сукхан̃ча анубхоти, дхаммадасоти тама̄ху пахитаттам̣.

‘‘тасма̄ акхилодха падха̄нава̄, нӣваран̣а̄ни паха̄йа висуддхо;

ма̄нан̃ча паха̄йа асесам̣, виджджа̄йантакаро самита̄вӣ’’ти.