9. села̄суттам̣

170. са̄ваттхинида̄нам̣. атха кхо села̄ бхиккхунӣ пуббан̣хасамайам̣ нива̄сетва̄…пе… ан̃н̃атарасмим̣ руккхамӯле дива̄виха̄рам̣ нисӣди. атха кхо ма̄ро па̄пима̄ села̄йа бхиккхунийа̄ бхайам̣ чхамбхитаттам̣ ломахам̣сам̣ уппа̄детука̄мо…пе… селам̣ бхиккхуним̣ га̄тха̄йа аджджхабха̄си –

‘‘кенидам̣ пакатам̣ бимбам̣, квану [кванну (сӣ. пӣ.), квачи (сйа̄. кам̣. ка.)] бимбасса ка̄рако;

квану бимбам̣ самуппаннам̣, квану бимбам̣ нируджджхатӣ’’ти.

атха кхо села̄йа бхиккхунийа̄ етадахоси – ‘‘ко ну кхва̄йам̣ мануссо ва̄ амануссо ва̄ га̄тхам̣ бха̄сатӣ’’ти? атха кхо села̄йа бхиккхунийа̄ етадахоси – ‘‘ма̄ро кхо айам̣ па̄пима̄ мама бхайам̣ чхамбхитаттам̣ ломахам̣сам̣ уппа̄детука̄мо сама̄дхимха̄ ча̄ветука̄мо га̄тхам̣ бха̄сатӣ’’ти. атха кхо села̄ бхиккхунӣ ‘‘ма̄ро айам̣ па̄пима̄’’ ити видитва̄ ма̄рам̣ па̄пимантам̣ га̄тха̄хи паччабха̄си –

‘‘найидам̣ аттакатам̣ [найидам̣ пакатам̣ (сйа̄. кам̣.)] бимбам̣, найидам̣ паракатам̣ [найидам̣ пакатам̣ (сйа̄. кам̣.)] агхам̣;

хетум̣ пат̣ичча самбхӯтам̣, хетубхан̇га̄ нируджджхати.

‘‘йатха̄ ан̃н̃атарам̣ бӣджам̣, кхетте вуттам̣ вирӯхати;

патхавӣрасан̃ча̄гамма, синехан̃ча тадӯбхайам̣.

‘‘евам̣ кхандха̄ ча дха̄туйо, чха ча а̄йатана̄ име;

хетум̣ пат̣ичча самбхӯта̄, хетубхан̇га̄ нируджджхаре’’ти.

атха кхо ма̄ро па̄пима̄ ‘‘джа̄на̄ти мам̣ села̄ бхиккхунӣ’’ти дуккхӣ думмано таттхевантарадха̄йӣти.