8. пин̣д̣асуттам̣

154. екам̣ самайам̣ бхагава̄ магадхесу вихарати пан̃часа̄ла̄йам̣ бра̄хман̣ага̄ме. тена кхо пана самайена пан̃часа̄ла̄йам̣ бра̄хман̣ага̄ме кума̄рика̄нам̣ па̄хунака̄ни бхаванти. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа пан̃часа̄лам̣ бра̄хман̣ага̄мам̣ пин̣д̣а̄йа па̄виси. тена кхо пана самайена пан̃часа̄леййака̄ бра̄хман̣агахапатика̄ ма̄рена па̄пимата̄ анва̄вит̣т̣ха̄ бхаванти – ма̄ саман̣о готамо пин̣д̣амалаттха̄ти.

атха кхо бхагава̄ йатха̄дхотена паттена пан̃часа̄лам̣ бра̄хман̣ага̄мам̣ пин̣д̣а̄йа па̄виси татха̄дхотена [йатха̄дхотена (?)] паттена пат̣икками. атха кхо ма̄ро па̄пима̄ йена бхагава̄ тенупасан̇ками; упасан̇камитва̄ бхагавантам̣ етадавоча – ‘‘апи твам̣, саман̣а, пин̣д̣амалаттха̄’’ти? ‘‘татха̄ ну твам̣, па̄пима, ака̄си йатха̄хам̣ пин̣д̣ам̣ на лабхеййа’’нти. ‘‘тена хи, бханте, бхагава̄ дутийампи пан̃часа̄лам̣ бра̄хман̣ага̄мам̣ пин̣д̣а̄йа пависату. татха̄хам̣ карисса̄ми йатха̄ бхагава̄ пин̣д̣ам̣ лаччхатӣ’’ти.

‘‘апун̃н̃ам̣ пасави ма̄ро, а̄саджджа нам̣ татха̄гатам̣;

ким̣ ну ман̃н̃аси па̄пима, на ме па̄пам̣ випаччати.

‘‘сусукхам̣ вата джӣва̄ма, йесам̣ но наттхи кин̃чанам̣;

пӣтибхаккха̄ бхависса̄ма, дева̄ а̄бхассара̄ йатха̄’’ти.

атха кхо ма̄ро па̄пима̄ ‘‘джа̄на̄ти мам̣ бхагава̄, джа̄на̄ти мам̣ сугато’’ти дуккхӣ думмано таттхевантарадха̄йӣти.