6. паттасуттам̣

152. са̄ваттхинида̄нам̣. тена кхо пана самайена бхагава̄ пан̃чаннам̣ упа̄да̄наккхандха̄нам̣ упа̄да̄йа бхиккхӯнам̣ дхаммийа̄ катха̄йа сандассети сама̄дапети [сама̄да̄пети (?)] самуттеджети сампахам̣сети. те ча бхиккхӯ ат̣т̣хим̣ катва̄ [ат̣т̣хикатва̄ (сӣ. сйа̄. кам̣. пӣ.)] манаси катва̄ саббачетаса̄ [саббачетасо (сӣ. сйа̄. кам̣. пӣ.), саббам̣ четаса̄ (ка.)] саманна̄харитва̄ охитасота̄ дхаммам̣ сун̣анти.

атха кхо ма̄расса па̄пимато етадахоси – ‘‘айам̣ кхо саман̣о готамо пан̃чаннам̣ упа̄да̄наккхандха̄нам̣ упа̄да̄йа бхиккхӯнам̣ дхаммийа̄ катха̄йа сандассети сама̄дапети самуттеджети сампахам̣сети. те ча бхиккхӯ ат̣т̣хим̣ катва̄ манаси катва̄ саббачетаса̄ саманна̄харитва̄ охитасота̄ дхаммам̣ сун̣анти. йам̣нӯна̄хам̣ йена саман̣о готамо тенупасан̇камеййам̣ вичаккхукамма̄йа̄’’ти.

тена кхо пана самайена самбахула̄ патта̄ аббхока̄се никкхитта̄ хонти. атха кхо ма̄ро па̄пима̄ балӣбаддаван̣н̣ам̣ абхинимминитва̄ йена те патта̄ тенупасан̇ками. атха кхо ан̃н̃атаро бхиккху ан̃н̃атарам̣ бхиккхум̣ етадавоча – ‘‘бхиккху, бхиккху, есо балӣбаддо патте бхиндеййа̄’’ти. евам̣ вутте бхагава̄ там̣ бхиккхум̣ етадавоча – ‘‘на со, бхиккху, балӣбаддо. ма̄ро есо па̄пима̄ тумха̄кам̣ вичаккхукамма̄йа а̄гато’’ти. атха кхо бхагава̄ ‘‘ма̄ро айам̣ па̄пима̄’’ ити видитва̄ ма̄рам̣ па̄пимантам̣ га̄тха̄йа аджджхабха̄си –

‘‘рӯпам̣ ведайитам̣ сан̃н̃а̄, вин̃н̃а̄н̣ам̣ йан̃ча сан̇кхатам̣;

несохамасми нетам̣ ме, евам̣ таттха вираджджати.

‘‘евам̣ вираттам̣ кхематтам̣, саббасам̣йоджана̄тигам̣;

анвесам̣ саббат̣т̣ха̄несу, ма̄расена̄пи на̄джджхага̄’’ти.

атха кхо ма̄ро па̄пима̄…пе… таттхевантарадха̄йӣти.