9. пат̣хамаа̄йусуттам̣

145. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘аппамидам̣, бхиккхаве, манусса̄нам̣ а̄йу. гаманӣйо сампара̄йо, каттаббам̣ кусалам̣, чаритаббам̣ брахмачарийам̣. наттхи джа̄тасса амаран̣ам̣. йо, бхиккхаве, чирам̣ джӣвати, со вассасатам̣ аппам̣ ва̄ бхиййо’’ти.

атха кхо ма̄ро па̄пима̄ йена бхагава̄ тенупасан̇ками; упасан̇камитва̄ бхагавантам̣ га̄тха̄йа аджджхабха̄си –

‘‘дӣгхама̄йу манусса̄нам̣, на нам̣ хӣл̣е супорисо;

чареййа кхӣраматтова, наттхи маччусса а̄гамо’’ти.

‘‘аппама̄йу манусса̄нам̣, хӣл̣еййа нам̣ супорисо;

чареййа̄диттасӣсова, наттхи маччусса на̄гамо’’ти.

атха кхо ма̄ро…пе… таттхевантарадха̄йӣти.