1. дахарасуттам̣

112. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо ра̄джа̄ пасенади косало йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо ра̄джа̄ пасенади косало бхагавантам̣ етадавоча – ‘‘бхавампи но готамо ануттарам̣ самма̄самбодхим̣ абхисамбуддхоти пат̣иджа̄на̄тӣ’’ти? ‘‘йан̃хи там̣, маха̄ра̄джа, самма̄ вадама̄но вадеййа ‘ануттарам̣ самма̄самбодхим̣ абхисамбуддхо’ти, мамева [мамам̣ (саббаттха)] там̣ самма̄ вадама̄но вадеййа. ахан̃хи, маха̄ра̄джа, ануттарам̣ самма̄самбодхим̣ абхисамбуддхо’’ти.

‘‘йепи те, бхо готама, саман̣абра̄хман̣а̄ сан̇гхино ган̣ино ган̣а̄чарийа̄ н̃а̄та̄ йасассино титтхакара̄ са̄дхусаммата̄ бахуджанасса, сеййатхидам̣ – пӯран̣о кассапо, маккхали госа̄ло, ниган̣т̣хо на̄т̣апутто, сан̃чайо белат̣т̣хапутто, пакудхо качча̄йано, аджито кесакамбало; тепи майа̄ ‘ануттарам̣ самма̄самбодхим̣ абхисамбуддхоти пат̣иджа̄на̄тха̄’ти пут̣т̣ха̄ сама̄на̄ ануттарам̣ самма̄самбодхим̣ абхисамбуддхоти на пат̣иджа̄нанти. ким̣ пана бхавам̣ готамо дахаро чева джа̄тийа̄ наво ча паббаджджа̄йа̄’’ти?

‘‘чатта̄ро кхо ме, маха̄ра̄джа, дахара̄ти на ун̃н̃а̄табба̄, дахара̄ти на парибхотабба̄. катаме чатта̄ро? кхаттийо кхо, маха̄ра̄джа, дахароти на ун̃н̃а̄таббо, дахароти на парибхотаббо. ураго кхо, маха̄ра̄джа, дахароти на ун̃н̃а̄таббо, дахароти на парибхотаббо. агги кхо, маха̄ра̄джа, дахароти на ун̃н̃а̄таббо, дахароти на парибхотаббо. бхиккху, кхо, маха̄ра̄джа, дахароти на ун̃н̃а̄таббо, дахароти на парибхотаббо. име кхо, маха̄ра̄джа, чатта̄ро дахара̄ти на ун̃н̃а̄табба̄, дахара̄ти на парибхотабба̄’’ти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘кхаттийам̣ джа̄тисампаннам̣, абхиджа̄там̣ йасассинам̣;

дахароти на̄ваджа̄неййа, на нам̣ парибхаве наро.

‘‘т̣ха̄нан̃хи со мануджиндо, раджджам̣ ладдха̄на кхаттийо;

со куддхо ра̄джадан̣д̣ена, тасмим̣ паккамате бхусам̣;

тасма̄ там̣ париваджджеййа, раккхам̣ джӣвитаматтано.

‘‘га̄ме ва̄ йади ва̄ ран̃н̃е, йаттха пассе бхуджан̇гамам̣;

дахароти на̄ваджа̄неййа, на нам̣ парибхаве наро.

‘‘учча̄вачехи ван̣н̣ехи, ураго чарати теджасӣ [теджаса̄ (сӣ. ка.), теджаси (пӣ. ка.)];

со а̄саджджа д̣ам̣се ба̄лам̣, нарам̣ на̄рин̃ча екада̄;

тасма̄ там̣ париваджджеййа, раккхам̣ джӣвитаматтано.

‘‘пахӯтабхаккхам̣ джа̄линам̣, па̄вакам̣ кан̣хаваттаним̣;

дахароти на̄ваджа̄неййа, на нам̣ парибхаве наро.

‘‘ладдха̄ хи со упа̄да̄нам̣, маха̄ хутва̄на па̄вако;

со а̄саджджа д̣ахе [дахе] ба̄лам̣, нарам̣ на̄рин̃ча екада̄;

тасма̄ там̣ париваджджеййа, раккхам̣ джӣвитаматтано.

‘‘ванам̣ йадагги д̣ахати [дахати (ка.)], па̄вако кан̣хаваттанӣ;

джа̄йанти таттха па̄роха̄, ахоратта̄намаччайе.

‘‘йан̃ча кхо сӣласампанно, бхиккху д̣ахати теджаса̄;

на тасса путта̄ пасаво, да̄йа̄да̄ виндаре дханам̣;

анапачча̄ ада̄йа̄да̄, та̄ла̄ваттхӯ бхаванти те.

‘‘тасма̄ хи пан̣д̣ито посо, сампассам̣ аттхаматтано;

бхуджан̇гамам̣ па̄вакан̃ча, кхаттийан̃ча йасассинам̣;

бхиккхун̃ча сӣласампаннам̣, саммадева сама̄чаре’’ти.

евам̣ вутте, ра̄джа̄ пасенади косало бхагавантам̣ етадавоча – ‘‘абхиккантам̣, бханте, абхиккантам̣, бханте! сеййатха̄пи бханте, никкуджджитам̣ [никуджджитам̣ (?)] ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – ‘чаккхуманто рӯпа̄ни даккхантӣ’ти; евамевам̣ бхагавата̄ анекапарийа̄йена дхаммо пака̄сито. еса̄хам̣, бханте, бхагавантам̣ саран̣ам̣ гаччха̄ми дхамман̃ча бхиккхусан̇гхан̃ча. упа̄сакам̣ мам̣, бханте, бхагава̄ дха̄рету аджджатагге па̄н̣упетам̣ саран̣ам̣ гата’’нти.