6. рохитассасуттам̣

107. са̄ваттхинида̄нам̣. екамантам̣ т̣хито кхо рохитассо девапутто бхагавантам̣ етадавоча – ‘‘йаттха ну кхо, бханте, на джа̄йати на джӣйати на мӣйати [на джиййати на миййати (сйа̄. кам̣. ка.)] на чавати на упападжджати, сакка̄ ну кхо со, бханте, гаманена локасса анто н̃а̄тум̣ ва̄ дат̣т̣хум̣ ва̄ па̄пун̣итум̣ ва̄’’ти? ‘‘йаттха кхо, а̄вусо, на джа̄йати на джӣйати на мӣйати на чавати на упападжджати, на̄хам̣ там̣ гаманена локасса антам̣ н̃а̄теййам̣ дат̣т̣хеййам̣ паттеййанти вада̄мӣ’’ти.

‘‘аччхарийам̣, бханте, аббхутам̣, бханте! йа̄васубха̄ситамидам̣, бханте, бхагавата̄ – ‘йаттха кхо, а̄вусо, на джа̄йати на джӣйати на мӣйати на чавати на упападжджати, на̄хам̣ там̣ гаманена локасса антам̣ н̃а̄теййам̣ дат̣т̣хеййам̣ паттеййанти вада̄мӣ’ти.

‘‘бхӯтапубба̄хам̣, бханте, рохитассо на̄ма иси ахосим̣ бходжапутто иддхима̄ веха̄сан̇гамо. тасса майхам̣, бханте, еварӯпо джаво ахоси; сеййатха̄пи на̄ма дал̣хадхамма̄ [дал̣хадхаммо (саббаттха) т̣ӣка̄ ча моггалла̄набйа̄каран̣ам̣ ча олокетаббам̣] дхануггахо сусиккхито катахаттхо катайогго катӯпа̄сано лахукена асанена аппакасиренева тирийам̣ та̄лаччха̄йам̣ атипа̄теййа. тасса майхам̣, бханте, еварӯпо падавӣтиха̄ро ахоси; сеййатха̄пи на̄ма пураттхима̄ самудда̄ паччхимо самуддо. тасса майхам̣, бханте, еварӯпам̣ иччха̄гатам̣ уппаджджи – ‘ахам̣ гаманена локасса антам̣ па̄пун̣исса̄мӣ’ти. со кхва̄хам̣, бханте, еварӯпена джавена саманна̄гато еварӯпена ча падавӣтиха̄рена ан̃н̃атрева асита-пӣта-кха̄йита-са̄йита̄ ан̃н̃атра учча̄ра-пасса̄вакамма̄ ан̃н̃атра нидда̄киламатхапат̣ивинодана̄ вассасата̄йуко вассасатаджӣвӣ вассасатам̣ гантва̄ аппатва̄ва локасса антам̣ антара̄ва ка̄лан̇като.

‘‘аччхарийам̣, бханте, аббхутам̣, бханте! йа̄васубха̄ситамидам̣, бханте, бхагавата̄ – ‘йаттха кхо, а̄вусо, на джа̄йати на джӣйати на мӣйати на чавати на упападжджати, на̄хам̣ там̣ гаманена локасса антам̣ н̃а̄теййам̣ дат̣т̣хеййам̣ паттеййанти вада̄мӣ’’’ти.

‘‘на кхо пана̄хам̣, а̄вусо, аппатва̄ локасса антам̣ дуккхасса антакирийам̣ вада̄ми. апи ча кхва̄хам̣, а̄вусо, имасмим̣йева бйа̄маматте кал̣еваре сасан̃н̃имхи саманаке локан̃ча пан̃н̃апеми локасамудайан̃ча локаниродхан̃ча локаниродхага̄минин̃ча пат̣ипаданти.

‘‘гаманена на паттаббо, локассанто куда̄чанам̣;

на ча аппатва̄ локантам̣, дуккха̄ аттхи памочанам̣.

‘‘тасма̄ хаве локавидӯ сумедхо,

локантагӯ вуситабрахмачарийо;

локасса антам̣ самита̄ви н̃атва̄,

на̄сӣсати локамимам̣ паран̃ча̄’’ти.