3. серӣсуттам̣

104. екамантам̣ т̣хито кхо серӣ девапутто бхагавантам̣ га̄тха̄йа аджджхабха̄си –

‘‘аннамева̄бхинанданти, убхайе девама̄нуса̄;

атха ко на̄ма со йаккхо, йам̣ аннам̣ на̄бхинандатӣ’’ти.

‘‘йе нам̣ даданти саддха̄йа, виппасаннена четаса̄;

тамева аннам̣ бхаджати, асмим̣ локе парамхи ча.

‘‘тасма̄ винеййа маччхерам̣, даджджа̄ да̄нам̣ мала̄бхибхӯ;

пун̃н̃а̄ни паралокасмим̣, патит̣т̣ха̄ хонти па̄н̣ина’’нти.

‘‘аччхарийам̣, бханте, аббхутам̣, бханте! йа̄васубха̄ситамидам̣, бханте, бхагавата̄ –

‘‘йе нам̣ даданти саддха̄йа, виппасаннена четаса̄;

тамева аннам̣ бхаджати, асмим̣ локе парамхи ча.

‘‘тасма̄ винеййа маччхерам̣, даджджа̄ да̄нам̣ мала̄бхибхӯ;

пун̃н̃а̄ни паралокасмим̣, патит̣т̣ха̄ хонти па̄н̣ина’’нти.

‘‘бхӯтапубба̄хам̣, бханте, сирӣ [серӣ (сӣ. сйа̄. кам̣. пӣ.)] на̄ма ра̄джа̄ ахосим̣ да̄йако да̄напати да̄насса ван̣н̣ава̄дӣ. тасса майхам̣, бханте, чатӯсу два̄ресу да̄нам̣ дӣйиттха саман̣а-бра̄хман̣а-капан̣аддхика-ваниббакайа̄чака̄нам̣. атха кхо мам̣, бханте, иттха̄га̄рам̣ упасан̇камитва̄ етадавоча [иттха̄га̄ра̄ упасан̇камитва̄ етадавочум̣ (ка.)] – ‘девасса кхо [девассева кхо (ка. сӣ.)] да̄нам̣ дӣйати; амха̄кам̣ да̄нам̣ на дӣйати. са̄дху майампи девам̣ нисса̄йа да̄на̄ни дадеййа̄ма, пун̃н̃а̄ни кареййа̄ма̄’ти. тасса майхам̣, бханте, етадахоси – ‘ахам̣ кхосми да̄йако да̄напати да̄насса ван̣н̣ава̄дӣ. да̄нам̣ дасса̄ма̄ти ваданте кинти вадеййа’нти? со кхва̄хам̣, бханте, пат̣хамам̣ два̄рам̣ иттха̄га̄расса ада̄сим̣. таттха иттха̄га̄расса да̄нам̣ дӣйиттха; мама да̄нам̣ пат̣икками.

‘‘атха кхо мам̣, бханте, кхаттийа̄ ануйанта̄ упасан̇камитва̄ етадавочум̣ – ‘девасса кхо да̄нам̣ дӣйати; иттха̄га̄расса да̄нам̣ дӣйати; амха̄кам̣ да̄нам̣ на дӣйати. са̄дху майампи девам̣ нисса̄йа да̄на̄ни дадеййа̄ма, пун̃н̃а̄ни кареййа̄ма̄’ти. тасса майхам̣, бханте, етадахоси – ‘ахам̣ кхосми да̄йако да̄напати да̄насса ван̣н̣ава̄дӣ. да̄нам̣ дасса̄ма̄ти ваданте кинти вадеййа’нти? со кхва̄хам̣, бханте, дутийам̣ два̄рам̣ кхаттийа̄нам̣ ануйанта̄нам̣ ада̄сим̣. таттха кхаттийа̄нам̣ ануйанта̄нам̣ да̄нам̣ дӣйиттха, мама да̄нам̣ пат̣икками.

‘‘атха кхо мам̣, бханте, балака̄йо упасан̇камитва̄ етадавоча – ‘девасса кхо да̄нам̣ дӣйати; иттха̄га̄расса да̄нам̣ дӣйати; кхаттийа̄нам̣ ануйанта̄нам̣ да̄нам̣ дӣйати; амха̄кам̣ да̄нам̣ на дӣйати. са̄дху майампи девам̣ нисса̄йа да̄на̄ни дадеййа̄ма, пун̃н̃а̄ни кареййа̄ма̄’ти. тасса майхам̣, бханте, етадахоси – ‘ахам̣ кхосми да̄йако да̄напати да̄насса ван̣н̣ава̄дӣ. да̄нам̣ дасса̄ма̄ти ваданте кинти вадеййа’нти? со кхва̄хам̣ бханте, татийам̣ два̄рам̣ балака̄йасса ада̄сим̣. таттха балака̄йасса да̄нам̣ дӣйиттха, мама да̄нам̣ пат̣икками.

‘‘атха кхо мам̣, бханте, бра̄хман̣агахапатика̄ упасан̇камитва̄ етадавочум̣ – ‘девасса кхо да̄нам̣ дӣйати; иттха̄га̄расса да̄нам̣ дӣйати; кхаттийа̄нам̣ ануйанта̄нам̣ да̄нам̣ дӣйати; балака̄йасса да̄нам̣ дӣйати; амха̄кам̣ да̄нам̣ на дӣйати. са̄дху майампи девам̣ нисса̄йа да̄на̄ни дадеййа̄ма, пун̃н̃а̄ни кареййа̄ма̄’ти. тасса майхам̣, бханте, етадахоси – ‘ахам̣ кхосми да̄йако да̄напати да̄насса ван̣н̣ава̄дӣ. да̄нам̣ дасса̄ма̄ти ваданте кинти вадеййа’нти? со кхва̄хам̣, бханте, чатуттхам̣ два̄рам̣ бра̄хман̣агахапатика̄нам̣ ада̄сим̣. таттха бра̄хман̣агахапатика̄нам̣ да̄нам̣ дӣйиттха, мама да̄нам̣ пат̣икками.

‘‘атха кхо мам̣, бханте, пуриса̄ упасан̇камитва̄ етадавочум̣ – ‘на кхо да̄ни девасса кочи да̄нам̣ дӣйатӣ’ти. евам̣ вутта̄хам̣, бханте, те пурисе етадавочам̣ – ‘тена хи, бхан̣е, йо ба̄хиресу джанападесу а̄йо сан̃джа̄йати тато упад̣д̣хам̣ антепуре павесетха, упад̣д̣хам̣ таттхева да̄нам̣ детха саман̣а-бра̄хман̣а-капан̣аддхика-ваниббака-йа̄чака̄на’нти. со кхва̄хам̣, бханте, евам̣ дӣгхараттам̣ ката̄нам̣ пун̃н̃а̄нам̣ евам̣ дӣгхараттам̣ ката̄нам̣ кусала̄нам̣ дхамма̄нам̣ парийантам̣ на̄дхигаччха̄ми – еттакам̣ пун̃н̃анти ва̄ еттако пун̃н̃авипа̄коти ва̄ еттакам̣ сагге т̣ха̄таббанти ва̄ти. аччхарийам̣, бханте, аббхутам̣, бханте! йа̄васубха̄ситамидам̣, бханте, бхагавата̄ –

‘‘йе нам̣ даданти саддха̄йа, виппасаннена четаса̄;

тамева аннам̣ бхаджати, асмим̣ локе парамхи ча.

‘‘тасма̄ винеййа маччхерам̣, даджджа̄ да̄нам̣ мала̄бхибхӯ;

пун̃н̃а̄ни паралокасмим̣, патит̣т̣ха̄ хонти па̄н̣ина’’нти.