9. саттха̄равандана̄суттам̣

265. са̄ваттхийам̣ джетаване. ‘‘бхӯтапуббам̣, бхиккхаве, сакко дева̄наминдо ма̄талим̣ сан̇га̄хакам̣ а̄мантеси – ‘йоджехи, самма ма̄тали, сахассайуттам̣ а̄джан̃н̃аратхам̣, уййа̄набхӯмим̣ гаччха̄ма субхӯмим̣ дассана̄йа̄’ти. ‘евам̣ бхаддантава̄’ти кхо, бхиккхаве, ма̄тали сан̇га̄хако саккасса дева̄наминдасса пат̣иссутва̄ сахассайуттам̣ а̄джан̃н̃аратхам̣ йоджетва̄ саккасса дева̄наминдасса пат̣иведеси – ‘йутто кхо те, ма̄риса, сахассайутто а̄джан̃н̃аратхо. йасса да̄ни ка̄лам̣ ман̃н̃асӣ’’’ти. атха кхо, бхиккхаве, сакко дева̄наминдо веджайантапа̄са̄да̄ ороханто ан̃джалим̣ катва̄ судам̣ бхагавантам̣ намассати. атха кхо, бхиккхаве, ма̄тали сан̇га̄хако саккам̣ дева̄наминдам̣ га̄тха̄йа аджджхабха̄си –

‘‘йан̃хи дева̄ манусса̄ ча, там̣ намассанти ва̄сава;

атха ко на̄ма со йаккхо, йам̣ твам̣ сакка намассасӣ’’ти.

‘‘йо идха самма̄самбуддхо, асмим̣ локе садеваке;

аномана̄мам̣ саттха̄рам̣, там̣ намасса̄ми ма̄тали.

‘‘йесам̣ ра̄го ча досо ча, авиджджа̄ ча вира̄джита̄;

кхӣн̣а̄сава̄ араханто, те намасса̄ми ма̄тали.

‘‘йе ра̄гадосавинайа̄, авиджджа̄саматиккама̄;

секкха̄ апачайа̄ра̄ма̄, аппаматта̄нусиккхаре;

те намасса̄ми ма̄талӣ’’ти.

‘‘сет̣т̣ха̄ хи кира локасмим̣, йе твам̣ сакка намассаси;

ахампи те намасса̄ми, йе намассаси ва̄сава̄’’ти.

‘‘идам̣ ватва̄на магхава̄, девара̄джа̄ суджампати;

бхагавантам̣ намасситва̄, памукхо ратхама̄рухӣ’’ти.