4. далиддасуттам̣

260. екам̣ самайам̣ бхагава̄ ра̄джагахе вихарати вел̣уване каландаканива̄пе. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘бхӯтапуббам̣, бхиккхаве, ан̃н̃атаро пурисо имасмим̣йева ра̄джагахе мануссадалиддо [мануссадал̣иддо (сӣ. сйа̄. кам̣.)] ахоси мануссакапан̣о мануссавара̄ко. со татха̄гатаппаведите дхаммавинайе саддхам̣ сама̄дийи, сӣлам̣ сама̄дийи, сутам̣ сама̄дийи, ча̄гам̣ сама̄дийи, пан̃н̃ам̣ сама̄дийи. со татха̄гатаппаведите дхаммавинайе саддхам̣ сама̄дийитва̄ сӣлам̣ сама̄дийитва̄ сутам̣ сама̄дийитва̄ ча̄гам̣ сама̄дийитва̄ пан̃н̃ам̣ сама̄дийитва̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджи дева̄нам̣ та̄ватим̣са̄нам̣ сахабйатам̣. со ан̃н̃е деве атирочати ван̣н̣ена чева йасаса̄ ча. татра судам̣, бхиккхаве, дева̄ та̄ватим̣са̄ уджджха̄йанти кхиййанти випа̄ченти – ‘аччхарийам̣ вата бхо, аббхутам̣ вата бхо! айан̃хи девапутто пуббе мануссабхӯто сама̄но мануссадалиддо ахоси мануссакапан̣о мануссавара̄ко; со ка̄йасса бхеда̄ парам̣ маран̣а̄ сугатим̣ саггам̣ локам̣ упапанно дева̄нам̣ та̄ватим̣са̄нам̣ сахабйатам̣. со ан̃н̃е деве атирочати ван̣н̣ена чева йасаса̄ ча̄’’’ти.

‘‘атха кхо, бхиккхаве, сакко дева̄наминдо деве та̄ватим̣се а̄мантеси – ‘ма̄ кхо тумхе, ма̄риса̄, етасса девапуттасса уджджха̄йиттха. есо кхо, ма̄риса̄, девапутто пуббе мануссабхӯто сама̄но татха̄гатаппаведите дхаммавинайе саддхам̣ сама̄дийи, сӣлам̣ сама̄дийи, сутам̣ сама̄дийи, ча̄гам̣ сама̄дийи, пан̃н̃ам̣ сама̄дийи. со татха̄гатаппаведите дхаммавинайе саддхам̣ сама̄дийитва̄ сӣлам̣ сама̄дийитва̄ сутам̣ сама̄дийитва̄ ча̄гам̣ сама̄дийитва̄ пан̃н̃ам̣ сама̄дийитва̄ ка̄йасса бхеда̄ парам̣ маран̣а̄ сугатим̣ саггам̣ локам̣ упапанно дева̄нам̣ та̄ватим̣са̄нам̣ сахабйатам̣. со ан̃н̃е деве атирочати ван̣н̣ена чева йасаса̄ ча̄’’’ти. атха кхо, бхиккхаве, сакко дева̄наминдо деве та̄ватим̣се анунайама̄но та̄йам̣ вела̄йам̣ има̄ га̄тха̄йо абха̄си –

‘‘йасса саддха̄ татха̄гате, ачала̄ суппатит̣т̣хита̄;

сӣлан̃ча йасса калйа̄н̣ам̣, арийакантам̣ пасам̣ситам̣.

‘‘сан̇гхе паса̄до йассаттхи, уджубхӯтан̃ча дассанам̣;

адалиддоти там̣ а̄ху, амогхам̣ тасса джӣвитам̣.

‘‘тасма̄ саддхан̃ча сӣлан̃ча, паса̄дам̣ дхаммадассанам̣;

ануйун̃джетха медха̄вӣ, сарам̣ буддха̄на са̄сана’’нти.