12. а̄л̣авакасуттам̣

246. евам̣ ме сутам̣ – екам̣ самайам̣ бхагава̄ а̄л̣авийам̣ вихарати а̄л̣авакасса йаккхасса бхаване. атха кхо а̄л̣авако йаккхо йена бхагава̄ тенупасан̇ками; упасан̇камитва̄ бхагавантам̣ етадавоча – ‘‘никкхама, саман̣а̄’’ти. ‘‘са̄дха̄вусо’’ти бхагава̄ никкхами. ‘‘пависа, саман̣а̄’’ти. ‘‘са̄дха̄вусо’’ти бхагава̄ па̄виси. дутийампи кхо а̄л̣авако йаккхо бхагавантам̣ етадавоча – ‘‘никкхама, саман̣а̄’’ти. ‘‘са̄дха̄вусо’’ти бхагава̄ никкхами. ‘‘пависа, саман̣а̄’’ти. ‘‘са̄дха̄вусо’’ти бхагава̄ па̄виси. татийампи кхо а̄л̣авако йаккхо бхагавантам̣ етадавоча – ‘‘никкхама, саман̣а̄’’ти. ‘‘са̄дха̄вусо’’ти бхагава̄ никкхами. ‘‘пависа, саман̣а̄’’ти. ‘‘са̄дха̄вусо’’ти бхагава̄ па̄виси. чатуттхампи кхо а̄л̣авако йаккхо бхагавантам̣ етадавоча – ‘‘никкхама, саман̣а̄’’ти. ‘‘на кхва̄хам̣ там̣, а̄вусо, никкхамисса̄ми. йам̣ те каран̣ӣйам̣ там̣ карохӣ’’ти. ‘‘пан̃хам̣ там̣, саман̣а, пуччхисса̄ми. саче ме на бйа̄кариссаси, читтам̣ ва̄ те кхиписса̄ми, хадайам̣ ва̄ те пха̄лесса̄ми, па̄десу ва̄ гахетва̄ па̄раган̇га̄йа кхиписса̄мӣ’’ти. ‘‘на кхва̄хам̣ там̣, а̄вусо, пасса̄ми садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа, йе ме читтам̣ ва̄ кхипеййа хадайам̣ ва̄ пха̄леййа, па̄десу ва̄ гахетва̄ па̄раган̇га̄йа кхипеййа. апи ча твам̣, а̄вусо, пуччха йада̄ кан̇кхасӣ’’ти [(атха кхо а̄л̣авако йаккхо бхагавантам̣ га̄тха̄йа аджджхабха̄си.) (сӣ.)].

‘‘ким̣сӯдха виттам̣ пурисасса сет̣т̣хам̣, ким̣су сучин̣н̣ам̣ сукхама̄ваха̄ти;

ким̣су хаве са̄дутарам̣ раса̄нам̣, катхам̣джӣвим̣ джӣвитама̄ху сет̣т̣ха’’нти.

‘‘саддхӣдха виттам̣ пурисса сет̣т̣хам̣, дхаммо сучин̣н̣о сукхама̄ваха̄ти;

саччам̣ хаве са̄дутарам̣ раса̄нам̣, пан̃н̃а̄джӣвим̣ джӣвитама̄ху сет̣т̣ха’’нти.

‘‘катхам̣су тарати огхам̣, катхам̣су тарати ан̣н̣авам̣;

катхам̣су дуккхамаччети, катхам̣су парисуджджхатӣ’’ти.

‘‘саддха̄йа тарати огхам̣, аппама̄дена ан̣н̣авам̣;

вӣрийена дуккхамаччети, пан̃н̃а̄йа парисуджджхатӣ’’ти.

‘‘катхам̣су лабхате пан̃н̃ам̣, катхам̣су виндате дханам̣;

катхам̣су киттим̣ паппоти, катхам̣ митта̄ни гантхати;

асма̄ лока̄ парам̣ локам̣, катхам̣ печча на сочатӣ’’ти.

‘‘саддаха̄но арахатам̣, дхаммам̣ нибба̄напаттийа̄;

суссӯсам̣ [суссӯса̄ (сӣ. пӣ.)] лабхате пан̃н̃ам̣, аппаматто вичаккхан̣о.

‘‘патирӯпака̄рӣ дхурава̄, ут̣т̣ха̄та̄ виндате дханам̣;

саччена киттим̣ паппоти, дадам̣ митта̄ни гантхати;

асма̄ лока̄ парам̣ локам̣, евам̣ печча на сочати.

‘‘йассете чатуро дхамма̄, саддхасса гхарамесино;

саччам̣ даммо дхити ча̄го, са ве печча на сочати.

‘‘ин̇гха ан̃н̃епи пуччхассу, путхӯ саман̣абра̄хман̣е;

йади сачча̄ дамма̄ ча̄га̄, кхантйа̄ бхиййодха виджджатӣ’’ти.

‘‘катхам̣ ну да̄ни пуччхеййам̣, путхӯ саман̣абра̄хман̣е;

йохам̣ [сохам̣ (сӣ.), сва̄хам̣ (ка.)] аджджа паджа̄на̄ми, йо аттхо сампара̄йико.

‘‘аттха̄йа вата ме буддхо, ва̄са̄йа̄л̣авима̄гама̄ [ма̄гато (пӣ. ка.)];

йохам̣ [сохам̣ (сӣ.)] аджджа паджа̄на̄ми, йаттха диннам̣ махаппхалам̣.

‘‘со ахам̣ вичарисса̄ми, га̄ма̄ га̄мам̣ пура̄ пурам̣;

намассама̄но самбуддхам̣, дхаммасса ча судхаммата’’нти.

йаккхасам̣йуттам̣ саматтам̣.