2. а̄нандабхаддекараттасуттам̣

276. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ а̄нандо упат̣т̣ха̄наса̄ла̄йам̣ бхиккхӯнам̣ дхаммийа̄ катха̄йа сандассети сама̄дапети самуттеджети сампахам̣сети, бхаддекараттасса уддесан̃ча вибхан̇ган̃ча бха̄сати.

атха кхо бхагава̄ са̄йанхасамайам̣ пат̣исалла̄на̄ вут̣т̣хито йенупат̣т̣ха̄наса̄ла̄ тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ бхиккхӯ а̄мантеси – ‘‘ко ну кхо, бхиккхаве, упат̣т̣ха̄наса̄ла̄йам̣ бхиккхӯнам̣ дхаммийа̄ катха̄йа сандассеси сама̄дапеси самуттеджеси сампахам̣сеси, бхаддекараттасса уддесан̃ча вибхан̇ган̃ча абха̄сӣ’’ти? ‘‘а̄йасма̄, бханте, а̄нандо упат̣т̣ха̄наса̄ла̄йам̣ бхиккхӯнам̣ дхаммийа̄ катха̄йа сандассеси сама̄дапеси самуттеджеси сампахам̣сеси, бхаддекараттасса уддесан̃ча вибхан̇ган̃ча абха̄сӣ’’ти.

атха кхо бхагава̄ а̄йасмантам̣ а̄нандам̣ а̄мантеси – ‘‘йатха̄ катхам̣ пана твам̣, а̄нанда, бхиккхӯнам̣ дхаммийа̄ катха̄йа сандассеси сама̄дапеси самуттеджеси сампахам̣сеси, бхаддекараттасса уддесан̃ча вибхан̇ган̃ча абха̄сӣ’’ти? ‘‘евам̣ кхо ахам̣, бханте, бхиккхӯнам̣ дхаммийа̄ катха̄йа сандассесим̣ сама̄дапесим̣ самуттеджесим̣ сампахам̣сесим̣, бхаддекараттасса уддесан̃ча вибхан̇ган̃ча абха̄сим̣ –

‘‘атӣтам̣ на̄нва̄гамеййа, наппат̣икан̇кхе ана̄гатам̣;

йадатӣтам̣ пахӣнам̣ там̣, аппаттан̃ча ана̄гатам̣.

‘‘паччуппаннан̃ча йо дхаммам̣, таттха таттха випассати;

асам̣хӣрам̣ асам̣куппам̣, там̣ видва̄ манубрӯхайе.

‘‘аджджева киччама̄таппам̣, ко джан̃н̃а̄ маран̣ам̣ суве;

на хи но сан̇гарам̣ тена, маха̄сенена маччуна̄.

‘‘евам̣ виха̄рим̣ а̄та̄пим̣, ахораттаматандитам̣;

там̣ ве бхаддекараттоти, санто а̄чиккхате муни’’.

277. ‘‘катхан̃ча, а̄вусо, атӣтам̣ анва̄гамети? евам̣рӯпо ахосим̣ атӣтамаддха̄нанти таттха нандим̣ саманва̄нети, евам̣ведано ахосим̣ атӣтамаддха̄нанти таттха нандим̣ саманва̄нети, евам̣сан̃н̃о ахосим̣ атӣтамаддха̄нанти таттха нандим̣ саманва̄нети, евам̣сан̇кха̄ро ахосим̣ атӣтамаддха̄нанти таттха нандим̣ саманва̄нети, евам̣вин̃н̃а̄н̣о ахосим̣ атӣтамаддха̄нанти таттха нандим̣ саманва̄нети – евам̣ кхо, а̄вусо, атӣтам̣ анва̄гамети.

‘‘катхан̃ча, а̄вусо, атӣтам̣ на̄нва̄гамети? евам̣рӯпо ахосим̣ атӣтамаддха̄нанти таттха нандим̣ на саманва̄нети, евам̣ведано ахосим̣ атӣтамаддха̄нанти таттха нандим̣ на саманва̄нети, евам̣сан̃н̃о ахосим̣ атӣтамаддха̄нанти таттха нандим̣ на саманва̄нети, евам̣сан̇кха̄ро ахосим̣ атӣтамаддха̄нанти таттха нандим̣ на саманва̄нети, евам̣вин̃н̃а̄н̣о ахосим̣ атӣтамаддха̄нанти таттха нандим̣ на саманва̄нети – евам̣ кхо, а̄вусо, атӣтам̣ на̄нва̄гамети.

‘‘катхан̃ча, а̄вусо, ана̄гатам̣ пат̣икан̇кхати? евам̣рӯпо сийам̣ ана̄гатамаддха̄нанти таттха нандим̣ саманва̄нети, евам̣ведано сийам̣…пе… евам̣сан̃н̃о сийам̣… евам̣сан̇кха̄ро сийам̣… евам̣вин̃н̃а̄н̣о сийам̣ ана̄гатамаддха̄нанти таттха нандим̣ саманва̄нети – евам̣ кхо, а̄вусо, ана̄гатам̣ пат̣икан̇кхати.

‘‘катхан̃ча, а̄вусо, ана̄гатам̣ наппат̣икан̇кхати? евам̣рӯпо сийам̣ ана̄гатамаддха̄нанти таттха нандим̣ на саманва̄нети, евам̣ведано сийам̣…пе… евам̣сан̃н̃о сийам̣… евам̣сан̇кха̄ро сийам̣… евам̣вин̃н̃а̄н̣о сийам̣ ана̄гатамаддха̄нанти таттха нандим̣ на саманва̄нети – евам̣ кхо, а̄вусо, ана̄гатам̣ наппат̣икан̇кхати.

‘‘катхан̃ча, а̄вусо, паччуппаннесу дхаммесу сам̣хӣрати? идха, а̄вусо, ассутава̄ путхуджджано арийа̄нам̣ адасса̄вӣ арийадхаммасса аковидо арийадхамме авинӣто саппуриса̄нам̣ адасса̄вӣ саппурисадхаммасса аковидо саппурисадхамме авинӣто рӯпам̣ аттато саманупассати, рӯпавантам̣ ва̄ атта̄нам̣, аттани ва̄ рӯпам̣, рӯпасмим̣ ва̄ атта̄нам̣; веданам̣… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати, вин̃н̃а̄н̣авантам̣ ва̄ атта̄нам̣, аттани ва̄ вин̃н̃а̄н̣ам̣, вин̃н̃а̄н̣асмим̣ ва̄ атта̄нам̣ – евам̣ кхо, а̄вусо, паччуппаннесу дхаммесу сам̣хӣрати.

‘‘катхан̃ча, а̄вусо, паччуппаннесу дхаммесу на сам̣хӣрати? идха, а̄вусо, сутава̄ арийаса̄вако арийа̄нам̣ дасса̄вӣ арийадхаммасса ковидо арийадхамме сувинӣто саппуриса̄нам̣ дасса̄вӣ саппурисадхаммасса ковидо саппурисадхамме сувинӣто на рӯпам̣ аттато саманупассати, на рӯпавантам̣ ва̄ атта̄нам̣, на аттани ва̄ рӯпам̣, на рӯпасмим̣ ва̄ атта̄нам̣; на веданам̣… на сан̃н̃ам̣… на сан̇кха̄ре… на вин̃н̃а̄н̣ам̣ аттато саманупассати, на вин̃н̃а̄н̣авантам̣ ва̄ атта̄нам̣, на аттани ва̄ вин̃н̃а̄н̣ам̣, на вин̃н̃а̄н̣асмим̣ ва̄ атта̄нам̣ – евам̣ кхо, а̄вусо, паччуппаннесу дхаммесу на сам̣хӣрати.

‘‘атӣтам̣ на̄нва̄гамеййа, наппат̣икан̇кхе ана̄гатам̣;

йадатӣтам̣ пахӣнам̣ там̣, аппаттан̃ча ана̄гатам̣.

‘‘паччуппаннан̃ча йо дхаммам̣, таттха таттха випассати;

асам̣хӣрам̣ асам̣куппам̣, там̣ видва̄ манубрӯхайе.

‘‘аджджева киччама̄таппам̣, ко джан̃н̃а̄ маран̣ам̣ суве;

на хи но сан̇гарам̣ тена, маха̄сенена маччуна̄.

‘‘евам̣ виха̄рим̣ а̄та̄пим̣, ахораттаматандитам̣;

там̣ ве бхаддекараттоти, санто а̄чиккхате мунӣ’’ти.

‘‘евам̣ кхо ахам̣, бханте, бхиккхӯнам̣ дхаммийа̄ катха̄йа сандассесим̣ сама̄дапесим̣ самуттеджесим̣ сампахам̣сесим̣, бхаддекараттасса уддесан̃ча вибхан̇ган̃ча абха̄си’’нти.

278. ‘‘са̄дху, са̄дху, а̄нанда! са̄дху кхо твам̣, а̄нанда, бхиккхӯнам̣ дхаммийа̄ катха̄йа сандассеси сама̄дапеси самуттеджеси сампахам̣сеси, бхаддекараттасса уддесан̃ча вибхан̇ган̃ча абха̄си –

‘‘атӣтам̣ на̄нва̄гамеййа…пе…

там̣ ве бхаддекараттоти, санто а̄чиккхате мунӣ’’ти.

‘‘катхан̃ча, а̄нанда, атӣтам̣ анва̄гамети…пе… евам̣ кхо, а̄нанда, атӣтам̣ анва̄гамети. катхан̃ча, а̄нанда, атӣтам̣ на̄нва̄гамети…пе… евам̣ кхо, а̄нанда, атӣтам̣ на̄нва̄гамети. катхан̃ча, а̄нанда, ана̄гатам̣ пат̣икан̇кхати…пе… евам̣ кхо, а̄нанда, ана̄гатам̣ пат̣икан̇кхати. катхан̃ча, а̄нанда, ана̄гатам̣ наппат̣икан̇кхати…пе… евам̣ кхо, а̄нанда, ана̄гатам̣ наппат̣икан̇кхати. катхан̃ча, а̄нанда, паччуппаннесу дхаммесу сам̣хӣрати…пе… евам̣ кхо, а̄нанда, паччуппаннесу дхаммесу сам̣хӣрати. катхан̃ча, а̄нанда, паччуппаннесу дхаммесу на сам̣хӣрати…пе… евам̣ кхо, а̄нанда, паччуппаннесу дхаммесу на сам̣хӣрати.

‘‘атӣтам̣ на̄нва̄гамеййа…пе…

там̣ ве бхаддекараттоти, санто а̄чиккхате мунӣ’’ти.

идамавоча бхагава̄. аттамано а̄йасма̄ а̄нандо бхагавато бха̄ситам̣ абхинандӣти.

а̄нандабхаддекараттасуттам̣ нит̣т̣хитам̣ дутийам̣.