10. чӯл̣апун̣н̣амасуттам̣

91. евам̣ ме сутам̣ – екам̣ самайам̣ бхагава̄ са̄ваттхийам̣ вихарати пубба̄ра̄ме мига̄рама̄тупа̄са̄де. тена кхо пана самайена бхагава̄ тадахупосатхе паннарасе пун̣н̣а̄йа пун̣н̣ама̄йа раттийа̄ бхиккхусан̇гхапаривуто аббхока̄се нисинно хоти. атха кхо бхагава̄ тун̣хӣбхӯтам̣ тун̣хӣбхӯтам̣ бхиккхусан̇гхам̣ анувилокетва̄ бхиккхӯ а̄мантеси – ‘‘джа̄неййа ну кхо, бхиккхаве, асаппурисо асаппурисам̣ – ‘асаппурисо айам̣ бхава’’’нти? ‘‘но хетам̣, бханте’’. ‘‘са̄дху, бхиккхаве; ат̣т̣ха̄наметам̣, бхиккхаве, анавака̄со йам̣ асаппурисо асаппурисам̣ джа̄неййа – ‘асаппурисо айам̣ бхава’нти. джа̄неййа пана, бхиккхаве, асаппурисо саппурисам̣ – ‘саппурисо айам̣ бхава’’’нти? ‘‘но хетам̣, бханте’’. ‘‘са̄дху, бхиккхаве; етампи кхо, бхиккхаве, ат̣т̣ха̄нам̣ анавака̄со йам̣ асаппурисо саппурисам̣ джа̄неййа – ‘саппурисо айам̣ бхава’нти. асаппурисо, бхиккхаве, ассаддхаммасаманна̄гато хоти, асаппурисабхатти [асаппурисабхаттӣ (саббаттха)] хоти, асаппурисачинтӣ хоти, асаппурисамантӣ хоти, асаппурисава̄чо хоти, асаппурисакамманто хоти, асаппурисадит̣т̣хи [асаппурисадит̣т̣хӣ (саббаттха)] хоти; асаппурисада̄нам̣ дети’’.

‘‘катхан̃ча, бхиккхаве, асаппурисо ассаддхаммасаманна̄гато хоти? идха, бхиккхаве, асаппурисо ассаддхо хоти, ахирико хоти, аноттаппӣ хоти, аппассуто хоти, кусӣто хоти, мут̣т̣хассати хоти, дуппан̃н̃о хоти. евам̣ кхо, бхиккхаве, асаппурисо ассаддхаммасаманна̄гато хоти.

‘‘катхан̃ча, бхиккхаве, асаппурисо асаппурисабхатти хоти? идха, бхиккхаве, асаппурисасса йе те саман̣абра̄хман̣а̄ ассаддха̄ ахирика̄ аноттаппино аппассута̄ кусӣта̄ мут̣т̣хассатино дуппан̃н̃а̄ тйа̄сса митта̄ хонти те саха̄йа̄. евам̣ кхо, бхиккхаве, асаппурисо асаппурисабхатти хоти.

‘‘катхан̃ча, бхиккхаве, асаппурисо асаппурисачинтӣ хоти? идха, бхиккхаве, асаппурисо аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети. евам̣ кхо, бхиккхаве, асаппурисо асаппурисачинтӣ хоти.

‘‘катхан̃ча, бхиккхаве, асаппурисо асаппурисамантӣ хоти? идха, бхиккхаве, асаппурисо аттабйа̄ба̄дха̄йапи мантети, парабйа̄ба̄дха̄йапи мантети, убхайабйа̄ба̄дха̄йапи мантети. евам̣ кхо, бхиккхаве, асаппурисо асаппурисамантӣ хоти.

‘‘катхан̃ча, бхиккхаве, асаппурисо асаппурисава̄чо хоти? идха, бхиккхаве, асаппурисо муса̄ва̄дӣ хоти, писун̣ава̄чо хоти, пхарусава̄чо хоти, сампхаппала̄пӣ хоти. евам̣ кхо, бхиккхаве, асаппурисо асаппурисава̄чо хоти.

‘‘катхан̃ча, бхиккхаве, асаппурисо асаппурисакамманто хоти? идха, бхиккхаве, асаппурисо па̄н̣а̄типа̄тӣ хоти, адинна̄да̄йӣ хоти, ка̄месумиччха̄ча̄рӣ хоти. евам̣ кхо, бхиккхаве, асаппурисо асаппурисакамманто хоти.

‘‘катхан̃ча, бхиккхаве, асаппурисо асаппурисадит̣т̣хи хоти? идха, бхиккхаве, асаппурисо евам̣дит̣т̣хи [евам̣дит̣т̣хӣ (сӣ. пӣ.), евам̣дит̣т̣хико (сйа̄. кам̣.)] хоти – ‘наттхи диннам̣, наттхи йит̣т̣хам̣, наттхи хутам̣, наттхи сукатадуккат̣а̄нам̣ [суккат̣адуккат̣а̄нам̣ (сӣ. пӣ.)] камма̄нам̣ пхалам̣ випа̄ко, наттхи айам̣ локо, наттхи паро локо, наттхи ма̄та̄, наттхи пита̄, наттхи сатта̄ опапа̄тика̄, наттхи локе саман̣абра̄хман̣а̄ саммаггата̄ [самаггата̄ (ка.)] самма̄пат̣ипанна̄, йе иман̃ча локам̣ паран̃ча локам̣ сайам̣ абхин̃н̃а̄ саччхикатва̄ паведентӣ’ти. евам̣ кхо, бхиккхаве, асаппурисо асаппурисадит̣т̣хи хоти.

‘‘катхан̃ча, бхиккхаве, асаппурисо асаппурисада̄нам̣ дети? идха, бхиккхаве, асаппурисо асаккаччам̣ да̄нам̣ дети, асахаттха̄ да̄нам̣ дети, ачиттӣкатва̄ да̄нам̣ дети, апавит̣т̣хам̣ да̄нам̣ дети ана̄гаманадит̣т̣хико да̄нам̣ дети. евам̣ кхо, бхиккхаве, асаппурисо асаппурисада̄нам̣ дети.

‘‘со, бхиккхаве, асаппурисо евам̣ ассаддхаммасаманна̄гато, евам̣ асаппурисабхатти, евам̣ асаппурисачинтӣ, евам̣ асаппурисамантӣ, евам̣ асаппурисава̄чо, евам̣ асаппурисакамманто, евам̣ асаппурисадит̣т̣хи; евам̣ асаппурисада̄нам̣ датва̄ ка̄йасса бхеда̄ парам̣ маран̣а̄ йа̄ асаппуриса̄нам̣ гати таттха упападжджати. ка̄ ча, бхиккхаве, асаппуриса̄нам̣ гати? нирайо ва̄ тираччха̄найони ва̄.

92. ‘‘джа̄неййа ну кхо, бхиккхаве, саппурисо саппурисам̣ – ‘саппурисо айам̣ бхава’’’нти? ‘‘евам̣, бханте’’. ‘‘са̄дху, бхиккхаве; т̣ха̄наметам̣, бхиккхаве, виджджати йам̣ саппурисо саппурисам̣ джа̄неййа – ‘саппурисо айам̣ бхава’нти. джа̄неййа пана, бхиккхаве, саппурисо асаппурисам̣ – ‘асаппурисо айам̣ бхава’’’нти? ‘‘евам̣, бханте’’. ‘‘са̄дху, бхиккхаве; етампи кхо, бхиккхаве, т̣ха̄нам̣ виджджати йам̣ саппурисо асаппурисам̣ джа̄неййа – ‘асаппурисо айам̣ бхава’нти. саппурисо, бхиккхаве, саддхаммасаманна̄гато хоти, саппурисабхатти хоти, саппурисачинтӣ хоти, саппурисамантӣ хоти, саппурисава̄чо хоти, саппурисакамманто хоти, саппурисадит̣т̣хи хоти; саппурисада̄нам̣ дети’’.

‘‘катхан̃ча, бхиккхаве, саппурисо саддхаммасаманна̄гато хоти? идха, бхиккхаве, саппурисо саддхо хоти, хирима̄ хоти, оттаппӣ хоти, бахуссуто хоти, а̄раддхавӣрийо хоти, упат̣т̣хитассати хоти, пан̃н̃ава̄ хоти. евам̣ кхо, бхиккхаве, саппурисо саддхаммасаманна̄гато хоти.

‘‘катхан̃ча, бхиккхаве, саппурисо саппурисабхатти хоти? идха, бхиккхаве, саппурисасса йе те саман̣абра̄хман̣а̄ саддха̄ хириманто оттаппино бахуссута̄ а̄раддхавӣрийа̄ упат̣т̣хитассатино пан̃н̃аванто тйа̄сса митта̄ хонти, те саха̄йа̄. евам̣ кхо, бхиккхаве, саппурисо саппурисабхатти хоти.

‘‘катхан̃ча, бхиккхаве, саппурисо саппурисачинтӣ хоти? идха, бхиккхаве, саппурисо неваттабйа̄ба̄дха̄йа четети, на парабйа̄ба̄дха̄йа четети, на убхайабйа̄ба̄дха̄йа четети. евам̣ кхо, бхиккхаве, саппурисо саппурисачинтӣ хоти.

‘‘катхан̃ча, бхиккхаве, саппурисо саппурисамантӣ хоти? идха, бхиккхаве, саппурисо неваттабйа̄ба̄дха̄йа мантети, на парабйа̄ба̄дха̄йа мантети, на убхайабйа̄ба̄дха̄йа мантети. евам̣ кхо, бхиккхаве, саппурисо саппурисамантӣ хоти.

‘‘катхан̃ча, бхиккхаве, саппурисо саппурисава̄чо хоти? идха, бхиккхаве, саппурисо муса̄ва̄да̄ пат̣ивирато хоти, писун̣а̄йа ва̄ча̄йа пат̣ивирато хоти, пхаруса̄йа ва̄ча̄йа пат̣ивирато хоти, сампхаппала̄па̄ пат̣ивирато хоти. евам̣ кхо, бхиккхаве, саппурисо саппурисава̄чо хоти.

‘‘катхан̃ча, бхиккхаве, саппурисо саппурисакамманто хоти? идха, бхиккхаве, саппурисо па̄н̣а̄типа̄та̄ пат̣ивирато хоти, адинна̄да̄на̄ пат̣ивирато хоти, ка̄месумиччха̄ча̄ра̄ пат̣ивирато хоти. евам̣ кхо, бхиккхаве, саппурисо саппурисакамманто хоти.

‘‘катхан̃ча, бхиккхаве, саппурисо саппурисадит̣т̣хи хоти? идха, бхиккхаве, саппурисо евам̣дит̣т̣хи хоти – ‘аттхи диннам̣, аттхи йит̣т̣хам̣, аттхи хутам̣, аттхи сукатадуккат̣а̄нам̣ камма̄нам̣ пхалам̣ випа̄ко, аттхи айам̣ локо, аттхи паро локо, аттхи ма̄та̄, аттхи пита̄, аттхи сатта̄ опапа̄тика̄, аттхи локе саман̣абра̄хман̣а̄ саммаггата̄ самма̄пат̣ипанна̄ йе иман̃ча локам̣ паран̃ча локам̣ сайам̣ абхин̃н̃а̄ саччхикатва̄ паведентӣ’ти. евам̣ кхо, бхиккхаве, саппурисо саппурисадит̣т̣хи хоти.

‘‘катхан̃ча, бхиккхаве, саппурисо саппурисада̄нам̣ дети? идха, бхиккхаве, саппурисо саккаччам̣ да̄нам̣ дети, сахаттха̄ да̄нам̣ дети, читтӣкатва̄ да̄нам̣ дети, анапавит̣т̣хам̣ да̄нам̣ дети, а̄гаманадит̣т̣хико да̄нам̣ дети. евам̣ кхо, бхиккхаве, саппурисо саппурисада̄нам̣ дети.

‘‘со, бхиккхаве, саппурисо евам̣ саддхаммасаманна̄гато, евам̣ саппурисабхатти, евам̣ саппурисачинтӣ, евам̣ саппурисамантӣ, евам̣ саппурисава̄чо, евам̣ саппурисакамманто, евам̣ саппурисадит̣т̣хи; евам̣ саппурисада̄нам̣ датва̄ ка̄йасса бхеда̄ парам̣ маран̣а̄ йа̄ саппуриса̄нам̣ гати таттха упападжджати. ка̄ ча, бхиккхаве, саппуриса̄нам̣ гати? девамахаттата̄ ва̄ мануссамахаттата̄ ва̄’’ти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти.

чӯл̣апун̣н̣амасуттам̣ нит̣т̣хитам̣ дасамам̣.

девадахавагго нит̣т̣хито пат̣хамо.