8. ва̄сет̣т̣хасуттам̣

454. евам̣ ме сутам̣ – екам̣ самайам̣ бхагава̄ иччха̄нан̇гале [иччха̄нан̇кале (сӣ. пӣ.)] вихарати иччха̄нан̇галаванасан̣д̣е. тена кхо пана самайена самбахула̄ абхин̃н̃а̄та̄ абхин̃н̃а̄та̄ бра̄хман̣амаха̄са̄ла̄ иччха̄нан̇гале пат̣ивасанти, сеййатхидам̣ – чан̇кӣ бра̄хман̣о, та̄руккхо бра̄хман̣о, поккхараса̄ти бра̄хман̣о, джа̄н̣уссон̣и [джа̄н̣уссон̣ӣ (пӣ.), джа̄н̣усон̣ӣ (ка.)] бра̄хман̣о, тодеййо бра̄хман̣о, ан̃н̃е ча абхин̃н̃а̄та̄ абхин̃н̃а̄та̄ бра̄хман̣амаха̄са̄ла̄. атха кхо ва̄сет̣т̣хабха̄радва̄джа̄нам̣ ма̄н̣ава̄нам̣ джан̇гха̄виха̄рам̣ анучан̇каманта̄нам̣ анувичаранта̄нам̣ [анучан̇камама̄на̄нам̣ анувичарама̄на̄нам̣ (сӣ. пӣ.)] айамантара̄катха̄ удапа̄ди – ‘‘катхам̣, бхо, бра̄хман̣о хотӣ’’ти? бха̄радва̄джо ма̄н̣аво евама̄ха – ‘‘йато кхо, бхо, убхато суджа̄то ма̄тито ча питито ча сам̣суддхагахан̣ико йа̄ва саттама̄ пита̄махайуга̄ аккхитто анупаккут̣т̣хо джа̄тива̄дена – етта̄вата̄ кхо, бхо, бра̄хман̣о хотӣ’’ти. ва̄сет̣т̣хо ма̄н̣аво евама̄ха – ‘‘йато кхо, бхо, сӣлава̄ ча хоти ваттасампанно [ватасампанно (пӣ.)] ча – етта̄вата̄ кхо, бхо, бра̄хман̣о хотӣ’’ти. нева кхо асаккхи бха̄радва̄джо ма̄н̣аво ва̄сет̣т̣хам̣ ма̄н̣авам̣ сан̃н̃а̄петум̣, на пана асаккхи ва̄сет̣т̣хо ма̄н̣аво бха̄радва̄джам̣ ма̄н̣авам̣ сан̃н̃а̄петум̣. атха кхо ва̄сет̣т̣хо ма̄н̣аво бха̄радва̄джам̣ ма̄н̣авам̣ а̄мантеси – ‘‘айам̣ кхо, бхо бха̄радва̄джа, саман̣о готамо сакйапутто сакйакула̄ паббаджито иччха̄нан̇гале вихарати иччха̄нан̇галаванасан̣д̣е. там̣ кхо пана бхавантам̣ готамам̣ евам̣ калйа̄н̣о киттисаддо аббхуггато – ‘итипи со бхагава̄ арахам̣ самма̄самбуддхо виджджа̄чаран̣асампанно сугато локавидӯ ануттаро пурисадаммаса̄ратхи саттха̄ деваманусса̄нам̣ буддхо бхагава̄’ти. а̄йа̄ма, бхо бха̄радва̄джа, йена саман̣о готамо тенупасан̇камисса̄ма; упасан̇камитва̄ саман̣ам̣ готамам̣ етаматтхам̣ пуччхисса̄ма. йатха̄ но саман̣о готамо бйа̄кариссати татха̄ нам̣ дха̄ресса̄ма̄’’ти. ‘‘евам̣, бхо’’ти кхо бха̄радва̄джо ма̄н̣аво ва̄сет̣т̣хасса ма̄н̣авасса паччассоси.

455. атха кхо ва̄сет̣т̣хабха̄радва̄джа̄ ма̄н̣ава̄ йена бхагава̄ тенупасан̇камим̣су; упасан̇камитва̄ бхагавата̄ саддхим̣ саммодим̣су. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣдим̣су. екамантам̣ нисинно кхо ва̄сет̣т̣хо ма̄н̣аво бхагавантам̣ га̄тха̄хи аджджхабха̄си –

‘‘анун̃н̃а̄тапат̣ин̃н̃а̄та̄, тевиджджа̄ майамасмубхо;

ахам̣ поккхараса̄тисса, та̄руккхасса̄йам̣ ма̄н̣аво.

‘‘тевиджджа̄нам̣ йадаккха̄там̣, татра кевалиносмасе;

падакасма̄ веййа̄каран̣а̄ [но бйа̄каран̣а̄ (сйа̄. кам̣. ка.)], джаппе а̄чарийаса̄диса̄;

тесам̣ но джа̄тива̄дасмим̣, вива̄до аттхи готама.

‘‘джа̄тийа̄ бра̄хман̣о хоти, бха̄радва̄джо ити бха̄сати;

ахан̃ча каммуна̄ [каммана̄ (сӣ. пӣ.)] брӯми, евам̣ джа̄на̄хи чаккхума.

‘‘те на саккома н̃а̄петум̣ [сан̃н̃аттум̣ (пӣ.), сан̃н̃а̄петум̣ (ка.)], ан̃н̃аман̃н̃ам̣ майам̣ убхо;

бхавантам̣ пут̣т̣хума̄гама̄, самбуддхам̣ ити виссутам̣.

‘‘чандам̣ йатха̄ кхайа̄тӣтам̣, печча пан̃джалика̄ джана̄;

вандама̄на̄ намассанти, локасмим̣ готамам̣.

‘‘чаккхум̣ локе самуппаннам̣, майам̣ пуччха̄ма готамам̣;

джа̄тийа̄ бра̄хман̣о хоти, уда̄ху бхавати каммуна̄ [каммана̄ (сӣ. пӣ.)];

аджа̄натам̣ но пабрӯхи, йатха̄ джа̄нему бра̄хман̣а’’нти.

456. ‘‘тесам̣ во ахам̣ бйаккхиссам̣, (ва̄сет̣т̣ха̄ти бхагава̄)

анупуббам̣ йатха̄татхам̣;

джа̄тивибхан̇гам̣ па̄н̣а̄нам̣, ан̃н̃аман̃н̃а̄хи джа̄тийо.

‘‘тин̣аруккхепи джа̄на̄тха, на ча̄пи пат̣иджа̄наре;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

‘‘тато кӣт̣е пат̣ан̇ге ча, йа̄ва кунтхакипиллике;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

‘‘чатуппадепи джа̄на̄тха, кхуддаке ча махаллаке;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

‘‘па̄дударепи джа̄на̄тха, ураге дӣгхапит̣т̣хике;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

‘‘тато маччхепи джа̄на̄тха, удаке ва̄ригочаре;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

‘‘тато паккхӣпи джа̄на̄тха, паттайа̄не вихан̇гаме;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

‘‘йатха̄ ета̄су джа̄тӣсу, лин̇гам̣ джа̄тимайам̣ путху;

евам̣ наттхи мануссесу, лин̇гам̣ джа̄тимайам̣ путху.

‘‘на кесехи на сӣсехи, на кан̣н̣ехи на аккхӣхи;

на мукхена на на̄са̄йа, на от̣т̣хехи бхамӯхи ва̄.

‘‘на гӣва̄йа на ам̣сехи, на ударена на пит̣т̣хийа̄;

на сон̣ийа̄ на ураса̄, на самба̄дхе на метхуне [на самба̄дха̄ на метхуна̄ (ка.)].

‘‘на хаттхехи на па̄дехи, нан̇гулӣхи накхехи ва̄;

на джан̇гха̄хи на ӯрӯхи, на ван̣н̣ена сарена ва̄;

лин̇гам̣ джа̄тимайам̣ нева, йатха̄ ан̃н̃а̄су джа̄тису.

457. ‘‘паччаттан̃ча сарӣресу [паччаттам̣ сасарӣресу (сӣ. пӣ.)], мануссесветам̣ на виджджати;

вока̄ран̃ча мануссесу, саман̃н̃а̄йа павуччати.

‘‘йо хи кочи мануссесу, гораккхам̣ упаджӣвати;

евам̣ ва̄сет̣т̣ха джа̄на̄хи, кассако со на бра̄хман̣о.

‘‘йо хи кочи мануссесу, путхусиппена джӣвати;

евам̣ ва̄сет̣т̣ха джа̄на̄хи, сиппико со на бра̄хман̣о.

‘‘йо хи кочи мануссесу, воха̄рам̣ упаджӣвати;

евам̣ ва̄сет̣т̣ха джа̄на̄хи, ва̄н̣иджо со на бра̄хман̣о.

‘‘йо хи кочи мануссесу, парапессена джӣвати;

евам̣ ва̄сет̣т̣ха джа̄на̄хи, пессако [пессико (сӣ. сйа̄. кам̣. пӣ.)] со на бра̄хман̣о.

‘‘йо хи кочи мануссесу, адиннам̣ упаджӣвати;

евам̣ ва̄сет̣т̣ха джа̄на̄хи, чоро есо на бра̄хман̣о.

‘‘йо хи кочи мануссесу, иссаттхам̣ упаджӣвати;

евам̣ ва̄сет̣т̣ха джа̄на̄хи, йодха̄джӣво на бра̄хман̣о.

‘‘йо хи кочи мануссесу, порохиччена джӣвати;

евам̣ ва̄сет̣т̣ха джа̄на̄хи, йа̄джако со на бра̄хман̣о.

‘‘йо хи кочи мануссесу, га̄мам̣ рат̣т̣хан̃ча бхун̃джати;

евам̣ ва̄сет̣т̣ха джа̄на̄хи, ра̄джа̄ есо на бра̄хман̣о.

‘‘на ча̄хам̣ бра̄хман̣ам̣ брӯми, йониджам̣ маттисамбхавам̣;

бхова̄ди [бхова̄дӣ (сйа̄. кам̣.)] на̄ма со хоти, саче хоти сакин̃чано;

акин̃чанам̣ ана̄да̄нам̣, тамахам̣ брӯми бра̄хман̣ам̣.

458. ‘‘саббасам̣йоджанам̣ чхетва̄, йо ве на паритассати;

сан̇га̄тигам̣ висам̣йуттам̣ [висан̃н̃уттам̣ (ка.)], тамахам̣ брӯми бра̄хман̣ам̣.

‘‘чхетва̄ наддхим̣ [наддхим̣ (сӣ. пӣ.)] вараттан̃ча, санда̄нам̣ сахануккамам̣;

уккхиттапалигхам̣ буддхам̣, тамахам̣ брӯми бра̄хман̣ам̣.

‘‘аккосам̣ вадхабандхан̃ча, адут̣т̣хо йо титиккхати;

кхантӣбалам̣ бала̄нӣкам̣, тамахам̣ брӯми бра̄хман̣ам̣.

‘‘аккодханам̣ ватавантам̣, сӣлавантам̣ ануссадам̣;

дантам̣ антимаса̄рӣрам̣, тамахам̣ брӯми бра̄хман̣ам̣.

‘‘ва̄рипоккхарапаттева, а̄раггерива са̄сапо;

йо на лимпати ка̄месу, тамахам̣ брӯми бра̄хман̣ам̣.

‘‘йо дуккхасса паджа̄на̄ти, идхева кхайаматтано;

паннабха̄рам̣ висам̣йуттам̣, тамахам̣ брӯми бра̄хман̣ам̣.

‘‘гамбхӣрапан̃н̃ам̣ медха̄вим̣, магга̄маггасса ковидам̣;

уттаматтхамануппаттам̣, тамахам̣ брӯми бра̄хман̣ам̣.

‘‘асам̣сат̣т̣хам̣ гахат̣т̣хехи, ана̄га̄рехи чӯбхайам̣;

анокаса̄римаппиччхам̣, тамахам̣ брӯми бра̄хман̣ам̣.

‘‘нидха̄йа дан̣д̣ам̣ бхӯтесу, тасесу тха̄варесу ча;

йо на ханти на гха̄тети, тамахам̣ брӯми бра̄хман̣ам̣.

‘‘авируддхам̣ вируддхесу, аттадан̣д̣есу ниббутам̣;

са̄да̄несу ана̄да̄нам̣, тамахам̣ брӯми бра̄хман̣ам̣.

‘‘йасса ра̄го ча досо ча, ма̄но маккхо ча охито;

са̄сапорива а̄рагга̄, тамахам̣ брӯми бра̄хман̣ам̣.

459. ‘‘акаккасам̣ вин̃н̃а̄паним̣, гирам̣ саччам̣ удӣрайе;

йа̄йа на̄бхисадждже кин̃чи, тамахам̣ брӯми бра̄хман̣ам̣.

‘‘йо ча дӣгхам̣ ва рассам̣ ва̄, ан̣ум̣ тхӯлам̣ субха̄субхам̣;

локе адиннам̣ на̄дети [на̄дийати (сӣ. пӣ.)], тамахам̣ брӯми бра̄хман̣ам̣.

‘‘а̄са̄ йасса на виджджанти, асмим̣ локе парамхи ча;

нира̄са̄сам̣ [нира̄сайам̣ (сӣ. пӣ.)] висам̣йуттам̣, тамахам̣ брӯми бра̄хман̣ам̣.

‘‘йасса̄лайа̄ на виджджанти, ан̃н̃а̄йа акатхам̣катхим̣;

аматогадхам̣ ануппаттам̣, тамахам̣ брӯми бра̄хман̣ам̣.

‘‘йодхапун̃н̃ан̃ча па̄пан̃ча, убхо сан̇гам̣ упаччага̄;

асокам̣ вираджам̣ суддхам̣, тамахам̣ брӯми бра̄хман̣ам̣.

‘‘чандам̣ ва вималам̣ суддхам̣, виппасаннам̣ ана̄вилам̣;

нандӣбхавапариккхӣн̣ам̣, тамахам̣ брӯми бра̄хман̣ам̣.

‘‘йо имам̣ палипатхам̣ дуггам̣, сам̣са̄рам̣ мохамаччага̄;

тин̣н̣о па̄ран̇гато джха̄йӣ, анеджо акатхам̣катхӣ;

анупа̄да̄йа ниббуто, тамахам̣ брӯми бра̄хман̣ам̣.

‘‘йодхака̄ме пахантва̄на [пахатва̄на (сӣ.)], ана̄га̄ро париббадже;

ка̄мабхавапариккхӣн̣ам̣, тамахам̣ брӯми бра̄хман̣ам̣.

‘‘йодхатан̣хам̣ пахантва̄на, ана̄га̄ро париббадже;

тан̣ха̄бхавапариккхӣн̣ам̣, тамахам̣ брӯми бра̄хман̣ам̣.

‘‘хитва̄ ма̄нусакам̣ йогам̣, диббам̣ йогам̣ упаччага̄;

саббайогависам̣йуттам̣, тамахам̣ брӯми бра̄хман̣ам̣.

‘‘хитва̄ ратин̃ча аратим̣, сӣтӣбхӯтам̣ нирӯпадхим̣;

саббалока̄бхибхум̣ вӣрам̣, тамахам̣ брӯми бра̄хман̣ам̣.

‘‘чутим̣ йо веди сатта̄нам̣, упапаттин̃ча саббасо;

асаттам̣ сугатам̣ буддхам̣, тамахам̣ брӯми бра̄хман̣ам̣.

‘‘йасса гатим̣ на джа̄нанти, дева̄ гандхаббама̄нуса̄;

кхӣн̣а̄савам̣ арахантам̣, тамахам̣ брӯми бра̄хман̣ам̣.

‘‘йасса пуре ча паччха̄ ча, маджджхе ча наттхи кин̃чанам̣;

акин̃чанам̣ ана̄да̄нам̣, тамахам̣ брӯми бра̄хман̣ам̣.

‘‘усабхам̣ паварам̣ вӣрам̣, махесим̣ виджита̄винам̣;

анеджам̣ нха̄такам̣ [наха̄такам̣ (сӣ. пӣ.)] буддхам̣, тамахам̣ брӯми бра̄хман̣ам̣.

‘‘пуббенива̄сам̣ йо веди, сагга̄па̄йан̃ча пассати;

атхо джа̄тиккхайам̣ патто, тамахам̣ брӯми бра̄хман̣ам̣.

460. ‘‘саман̃н̃а̄ хеса̄ локасмим̣, на̄маготтам̣ пакаппитам̣;

саммучча̄ самуда̄гатам̣, таттха таттха пакаппитам̣.

‘‘дӣгхаратта̄нусайитам̣, дит̣т̣хигатамаджа̄натам̣;

аджа̄нанта̄ но [аджа̄нанта̄ ноти аджа̄нанта̄ ева (т̣ӣка̄)] пабрунти [пабруванти (сӣ. пӣ.)], джа̄тийа̄ хоти бра̄хман̣о.

‘‘на джачча̄ бра̄хман̣о [васало (сйа̄. кам̣. ка.)] хоти, на джачча̄ хоти абра̄хман̣о [бра̄хман̣о (сйа̄. кам̣. ка.)];

каммуна̄ бра̄хман̣о [васало (сйа̄. кам̣. ка.)] хоти, каммуна̄ хоти абра̄хман̣о [бра̄хман̣о (сйа̄. кам̣. ка.)].

‘‘кассако каммуна̄ хоти, сиппико хоти каммуна̄;

ва̄н̣иджо каммуна̄ хоти, пессако хоти каммуна̄.

‘‘чоропи каммуна̄ хоти, йодха̄джӣвопи каммуна̄;

йа̄джако каммуна̄ хоти, ра̄джа̄пи хоти каммуна̄.

‘‘еваметам̣ йатха̄бхӯтам̣, каммам̣ пассанти пан̣д̣ита̄;

пат̣иччасамуппа̄дадасса̄, каммавипа̄каковида̄.

‘‘каммуна̄ ваттати локо, каммуна̄ ваттати паджа̄;

камманибандхана̄ сатта̄, ратхасса̄н̣ӣва йа̄йато.

‘‘тапена брахмачарийена, сам̣йамена дамена ча;

етена бра̄хман̣о хоти, етам̣ бра̄хман̣амуттамам̣.

‘‘тӣхи виджджа̄хи сампанно, санто кхӣн̣апунаббхаво;

евам̣ ва̄сет̣т̣ха джа̄на̄хи, брахма̄ сакко виджа̄ната’’нти.

461. евам̣ вутте, ва̄сет̣т̣хабха̄радва̄джа̄ ма̄н̣ава̄ бхагавантам̣ етадавочум̣ – ‘‘абхиккантам̣, бхо готама, абхиккантам̣, бхо готама! сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – чаккхуманто рӯпа̄ни даккхантӣти – евамевам̣ бхота̄ готамена анекапарийа̄йена дхаммо пака̄сито. ете майам̣ бхавантам̣ готамам̣ саран̣ам̣ гаччха̄ма дхамман̃ча бхиккхусан̇гхан̃ча. упа̄саке но бхавам̣ готамо дха̄рету аджджатагге па̄н̣упетам̣ саран̣ам̣ гате’’ти.

ва̄сет̣т̣хасуттам̣ нит̣т̣хитам̣ ат̣т̣хамам̣.